ყველა მოდურ გოგონას თავისი შეხედულება აქვს იმაზე, თუ როგორია ნიუ-იორკელი ქალის სტილი. ბევრის ცნობიერებაში ნიუ-იორკული სტილი პოპულარული სერიალის, „ჭორიკანას“ გმირების სტილს უკავშირდება. ნიუ-იორკი, ეს არის ქალაქი, სადაც ყველა ცდილობს გამორჩეულად და შეუდარებლად ეცვას.

გთავაზობთ სტილის მთავარ წესებს - როგორ უნდა ჩაიცვათ ნიუ-იორკელივით:

1. ტყავის ქურთუკი წელიწადის ნებისმიერ დროს - ეს არის სამოსი, რომელიც არასოდეს გადადის მოდიდან. თქვენს გარდერობში მას განსაკუთრებული ადგილი უნდა ეკავოს.

2. უპირატესობა მიანიჭეთ შავ სამოსს - სხვადასხვა დროს განსხვავებული ფერის სამოსი შეიძლება იყოს მოდური, მაგრამ შავი არის ის ფერი, რომელიც არასოდეს გადადის მოდიდან. ნიუ-იორკის მკვიდრთა სტილის საიდუმლო სწორედ ეს ფერია. ასეთი ფერის სამოსში ყოველთვის ელეგანტური და მოდური იქნებით.

3. ფეხსაცმელი - ფეხსაცმელი ყველაზე მნიშვნელოვანია. სწორედ ლამაზი ფეხსაცმელი ქმნის ქალის უზადო ვიზუალს. ნუ შეგეშინდებათ იმის, რომ ზოგჯერ შეიძლება კომფორტზე უარის თქმა მოგიწიოთ. სილამაზე მსხვერპლს მოითხოვს. თუ გინდათ, რომ ნიუ-იორკელს დაემსგავსოთ, მაღალქუსლიანი ფეხსაცმელი უნდა შეიყვაროთ.

4. ჩანთა - ერთი რამ რის გარეშეც ნიუ-იორკელ ქალს ვერასოდეს ნახავთ, ეს მისი ხელჩანთაა. კლასიკურ, საშუალო ზომის და ხარისხიან ჩანთაში ფულს ნუ დაინანებთ. ის საუკეთესო გადაწყვეტილებაა.

5. აქსესუარები - არ გაიკეთოთ ძალიან ბევრი სამკაული. არჩევანი ნაზ და ელეგანტურ სამკაულზე შეაჩერეთ.

6. იზრუნეთ საკუთარ თავზე - იზრუნეთ ყველა დეტალზე. ნიუ-იორკელ ქალს ფრჩხილები როგორც ფეხებზე, ასევე ხელებზე ყოველთვის მოწესრიგებული აქვს. ყველა დეტალი მწყობრში უნდა იყოს.

7. სათვალე - არ აქვს მნიშვნელობა წვიმს, თუ მზეა, დღეა, თუ ღამეა, მოდური სათვალე ნიუ-იორკელი ქალის განუყოფელი ნაწილია.

8. თავდაჯერებულობა - რა თქმა უნდა, თავდაჯერებულობა არ არის სამოსი, მაგრამ ეს არის ის, რის გარეშეც ვერაფერს ვერ მოიხდენთ. ყველანაირი სამოსი თავდაჯერებულმა უნდა ატაროთ იმისთვის, რომ თქვენი ვიზუალი ყველასთვის თვალშისაცემი და სტილი მისაბაძი გახდეს.