რა არის კოსტა-ბრავა?

კოსტა-ბრავა, ეს არის სანაპირო რეგიონი ესპანეთში, რომელიც ბარსელონას ჩრდილო აღმოსავლეთიდან იწყება და საფრანგეთის საზღვრამდე გრძელდება. მისი სახელი, სიტყვა-სიტყვით ითარგმნება როგორც „ველური სანაპირო“. ამბობენ, რომ ეს სახელი დაკავშირებულია შემოდგომა-ზამთრის ამინდთან, როდესაც ამ ადგილებში ცივი ქარებით ამოძრავებული ზღვა ველური და საშიში ხდება. ზღაპრული სილამაზის, არაჩვეულებრივი კლიმატის და მომხიბლავი სანაპიროების გამო, კოსტა-ბრავას მთავარი ბიზნესი - მეთევზეობა, ჯერ კიდევ გასული წლის 50-იან წლებში ტურიზმით ჩანაცვლდა. ასე დაიბადა მსოფლიოში სახელგანთქმული საკურორტო ზონა - კოსტა-ბრავა. ადგილი, რომელზეც ყველა ადამიანი ოცნებობს.



რა უნდა ვნახო კოსტა-ბრავაზე?

ხმელთაშუა ზღვის კლიმატის გამო, ტურისტული სეზონი აქ აღდგომაზე იწყება და სექტემბრის ბოლოს მთავრდება. ამ დროს სანაპირო ქალაქები სავსეა დამსვენებლებით და საცხოვრებელი ბინის ფასები ასტრონომიულ მაჩვენებლამდე იზრდება.

კოსტა-ბრავა განთქმულია ისეთი ადგილებით როგორებიცაა ლორე დე მარი, წმინდა კლოტილდეს ბაღები, ქალაქი ჟირონა, ბანიოლეს ტბა, ბესალუს ციხე-ქალაქი, ტოსა დე მარი, ქალაქი ვარდები, ესპანეთის ვენეცია და რაღა თქმა უნდა - სალვადორ დალის სახლ-მუზეუმი. აქ შეხვდებით კატალონიურ ციხე-სიმაგრეებს, სათევზაო პორტებსა და ნავსადგურებს, ესპანური კულტურის მრავალფეროვნებას, ვიწრო ქუჩებს და ყველაფერს, რაც ზღაპრული დასვენებისთვის არის საჭირო.




რამდენად ხელმისაწვდომია სანაპიროზე სტუმრობა?

იმისთვის, რომ ეს ყველაფერი საკუთარი თვალით იხილოთ, ყველაზე მარტივი და იაფი გზაა, ბარსელონიდან გაჰყვეთ ავტობუსს ან მატარებელს. უნდა აღინიშნოს, რომ ესპანეთის მეორე დედაქალაქიდან კოსტა-ბრავასკენ სარკინიგზო გზა ქვიშიან სანაპიროს მიუყვება. ეს კი, კიდევ დამოუკიდებელი ღირსშესანიშნაობაა. ავტობუსით დაახლოებით 1-1.5 საათია საჭირო, რომ სასურველ ლოკაციაზე აღმოჩნდეთ, მატარებლით კი, დაახლოებით 2 საათი. რაც შეეხება ფასს, ორივე გზა დაახლოებით 25-30 ევრო დაგიჯდებათ.


აქვე, ნუ შეგეშინდებათ ძვირადღირებული საცხოვრებლების - კოსტა-ბრავა იმდენად ახლოა ბარსელონასთან, რომ შეგიძლიათ დილაადრიან გაეშუროთ და საღამოს უკან დაბრუნდეთ. დღის განმავლობაში კი ნამდვილად მოასწრებთ მყუდრო ქალაქითა და ულამაზესი სანაპიროთი ტკბობას. ხოლო თუ ბიუჯეტში შეზღუდული არ ხართ, ჩვენი რეკომენდაციაა, რომ კოსტა-ბრავას რამდენიმე დღე დაუთმოთ. მშვიდად ჩამოიაროთ ძველი ქალაქები და დატკბეთ ესპანური სტუმართმოყვარეობით.



საქართველოდან ბარსელონაში ყველაზე ხელმისაწვდომ ფასად ქუთაისიდან გაფრინდებით. მაგალითად, სექტემბრის თვეში, მაშინ როდესაც კოსტა-ბრავაზე საკურორტო სეზონი პიკშია, Wizz Air-ის რეისზე ქუთაისი-ბარსელონას და ბარსელონა-ქუთაისის ბილეთებს, დაახლოებით 700 ლარად შეიძენთ.

თუ გავითვალისწინებთ, რომ ბარსელონა და კოსტა-ბრავა მსოფლიოში ერთ-ერთი ყველაზე მოთხოვნადი და ძვირადღირებული მიმართულებებია, დაგვეთანხმებით, რომ ეს ნამდვილად ხელსაყრელი ფასია!

ბედნიერ მოგზაურობას გისურვებთ!