პრინცი ჰარისა და მეგან მარკლის დიდ ბრიტანეთში დაბრუნება ბოლო კვირების ერთ-ერთი ყველაზე განხილვადი თემაა. ბევრმა ეს სამეფო ოჯახთან ექვსწლიანი დაპირისპირების შემდეგ შერიგების ნიშნად აღიქვა, თუმცა საბოლოო დასკვნების გაკეთება ჯერ ნაადრევია.

„მეგზიტი“ - ასე უწოდეს ჰარისა და მეგანის მიერ სამეფო მოვალეობებზე უარის თქმასა და ქვეყნიდან წასვლას 2020 წელს. გადაწყვეტილებას წინ უძღოდა წყვილის არაერთი დაპირისპირება ოჯახის წევრებთან. სასექსები საუბრობდნენ მეგანის მიმართ არასათანადო დამოკიდებულებაზე, რასიზმზე და მედიის მუდმივ ზეწოლაზე.

მიუხედავად იმისა, რომ ისინი მშვიდი ცხოვრების დაწყებას გეგმავდნენ, მომდევნო წლებში ჰარიმ და მეგანმა კონფლიქტის მიმართ ინტერესი ინტერვიუებით, მემუარებითა და დოკუმენტური ფილმებით კვლავ გააღვივეს.

ახლა მათი დაბრუნება ისეთივე მოულოდნელი აღმოჩნდა, როგორც 2020 წელს წასვლა. წყვილმა სამეფო ოჯახი გადაწყვეტილების წინაშე დააყენა და, გავრცელებული ინფორმაციით, მეფე ჩარლზ III-ს დაბრუნების გეგმების შესახებ წინასწარ არც კი აცნობა.

მთავარი პრობლემა კვლავ უილიამთან ურთიერთობაა

ჰარი კვლავ არ ურთიერთობს ძმასთან, პრინც უილიამთან და, მედიის ცნობით, მასთან ერთად საჯარო ღონისძიებებზე გამოჩენას არ გეგმავს.

ყოფილი სამეფო კორესპონდენტის, პიტერ ჰანტის შეფასებით, უილიამი შესაძლოა ძმის დაბრუნებით უკმაყოფილო იყოს. მისი თქმით, ექვს წელზე მეტი დასჭირდა ძმებს შორის ურთიერთობის გაუარესებას და შეუძლებელია, ყველაფერი რამდენიმე კვირაში მოგვარდეს.

„ეს ხანგრძლივი პროცესი იქნება“, - ამბობს ჰანტი.

ამასთან, ჰარის აღარ აქვს გადასახადის გადამხდელების ხარჯზე სამეფო დაცვა და ის კვლავ აგრძელებს სასამართლო დავებს ბრიტანულ მედიასთან, მათ შორის The Sun-ის გამომცემლებთან.

დაბრუნდება თუ არა სამეფო დაცვა?

ბრიტანული საზოგადოების ნაწილს ასევე აინტერესებს, ხომ არ დაუბრუნდებათ ჰარისა და მეგანს გადასახადის გადამხდელების მიერ დაფინანსებული დაცვა. ამ საკითხზე ოფიციალური დადასტურება ჯერ არ არსებობს.

ბრიტანეთის პრემიერ-მინისტრმა ენდი ბერნჰემმა მხოლოდ განაცხადა, რომ ეს წყვილის პირადი საქმეა და დეტალების განხილვაზე უარი თქვა.

არსებობს კიდევ ერთი კითხვა: ხომ არ გამოიყენებენ ჰარი და მეგანი დაბრუნებას ახალი კომერციული პროექტებისთვის? ჟურნალ Majesty-ის მმართველი რედაქტორის, ჯო ლიტლის თქმით, საზოგადოებაში კვლავ გაჩნდება კითხვა, ხომ არ გააფორმა წყვილმა მედიასთან ახალი შეთანხმება.

ამიტომ, მიუხედავად იმისა, რომ ჰარისა და მეგანის დაბრუნებამ შერიგების იმედი გააჩინა, სამეფო ოჯახში არსებული პრობლემების საბოლოოდ მოგვარებაზე საუბარი ჯერ ნაადრევია.