BLIKVANGER 2017 წლის Mercedes-Benz Fashion Week Tbilisi-ის ყველაზე გამორჩეულ ბრენდად შეგვიძლია მივიჩნიოთ. იგი განსხვავებულის შეხამებით ერთიანობას ქმნის, რომელიც უდაოდ ყველასგან გამორჩეულია. 

BLIKVANGER როგორც ბრენდი, გამუდმებით ხაზს უსვამს ადამიანების, მრავალფეროვან და განსხვავებულ ხასიათებს. BLIKVANGER-ს არასოდეს ეშინია გააცოცხლოს ადამიანის მრავალწახნაგოვანი შინაგანი სამყარო და ხაზი გაუსვას მის ტემპერამენტს. ამის გამო, "BLIKVANGER - ან EYE CATCHER" - ხშირად ასეც მოიხსენიებენ ბრენდს. 

BLIKVANGER ქმნის მათთვის, ვისაც არასოდეს ეშინია გაბედოს, გარისკოს, გაერთოს, იმხიარულოს, იყოს უკიდურესად მოდური, ჰქონდეს უსაზღვრო სტილის შეგრძნება და ბოლომდე მიიღოს ცხოვრებისგან ის სიამოვნება, რისი საშუალებაც აქვს. 

ბრენდის ინსპირაცია არასოდეს არის ერთი, კონკრეტული თემატიკა. მისი კოლექციები სუნთქავს ყველაფრით - ადამიანებით, ბუნებით, ხელოვნებით, ფერებით, არქიტექტურით, ხმებით... აღსანიშნავია, რომ ეს მხოლოდ ერთი მხარეა, რაც, საბოლოოდ BLIKVANGER-ის კოლექციას აცოხლებს. ხშირად, ბრენდის კოლექციები, ზოგადად ცხოვრების შეგრძნებით ინსპირირებულია. 

საინტერესოა ვინ დგას BLIKVANGER-ის უკან?! TREND. მოხარულია გაცნობოთ, რომ ბრენდს დიზაინერი ანა ოდიშელიძე ქმნის, რომელიც თავდაპირველად საქართველოს ტექნიკურ უნივერსიტეტში არქიტექტურის მიმარტულებით სწავლობდა. მოგვიანებით, მან თბილისის სახელმწიფო სამხატვრო აკადემია დაამთავრა. ამის შემდეგ კი, საქართველოს კულტურისა და ძეგლთა დაცვის სამინისტროს დაფინანსებით, დიზაინერი სწავლის გასაგრძელებლად იტალიაში, კერძოდ, ფლორენციაში გაემგზავრა. გარდა ამისა, ანა ოდიშელიძე საკმაოდ დიდ განათლებას ფლობს მოდის მარკეტინგის სფეროშიც. 

ანა ერთ-ერთია იმ ადამიანებს შორის, რომლებსაც სჯერათ, რომ გამუდმებული შრომა უსაფუძვლო არ არის და რომ მხოლოდ ამ გზით შეიძლება წარმატების მიღწევა. ხელოვნებისა და მოდის ერთიანობა არის ის, რაც დიზაინერის ინტერესის სფეროებს განსაზღვრავს. დიზაინერს ერთი საინტერესო ჰობიც აქვს - მოდაზე დაკვირვება. ნებისმიერი დეტალი, ნებისმიერი ასპექტი თუ გარემოება, იქნება ეს ვარცხნილობა, საუბრისა თუ ცეკვის მანერა, წიგნის კითხვის პროცესი, ადამიანთა თავშეყრის ადგილები, ფილმები, გავლენას ახდენს მოდაზე და ცვლის მას. ანა ოდიშელიძეს თქმით, ყველაფერს თავისი მოდა აქვს.

TREND. გთავაზობთ BLIKVANGER-ის 2017/2018 წლის შემოდგომა/ზამთრის სრული კოლექციის ჩვენების ფოტოებს: