ქართული მოდის სამყაროსა და მოდის მოყვარულთათვის ყველაზე მნიშვნელოვანი დღეები Mercedes-Benz Fashion Week Tbilisi დასრულდა. პროექტის ორგანიზატორებმა კვირეულის ფარგლებში, როგორც ქართველ, ასევე უცხოელ სტუმრებს დაუვიწყარი სანახაობა აჩუქეს. 

უამრავი ნიჭიერი ქართველი დიზაინერის ჩვენება, განსაკუთრებული და განსხვავებული დებიუტანტები, წარმატებული და მსოფლიო მასშტაბის უცხოელი დიზაინერი - ეს ყველაფერი ქართული მოდის მოყვარულთათვის Mercedes-Benz Fashion Week Tbilisi-ს ორგანიზატორებმა უზრუნველყვეს. 

ბუნებრივია, კვირეულის დახურვა, როგორც არა ერთი ამ სეზონზე გამართული ჩვენება, განსხვავებული და განმაცვიფრებელი აღმოჩნდა. Mercedes-Benz Fashion Week Tbilisi ძალიან წარმატებულმა დიზაინერმა, BESSARION-მა დაუვიწყარი ჩვენებით დახურა. 

BESSARION ქართველი დიზაინერია, რომელიც საცხოვრებლად, წლების წინ მოსკოვში გადავიდა და სწორედ მოსკოვში, 2008 წელს შექმნა თავისი საუცხოო ბრენდი. 

BESSARION-ის კოლექციები ეფექტური ქსოვილებისა და ფერების ინტენსიური შეხამრებით გამოირჩევა. როგორც ცნობილია, დიზაინერის შემოქმედება DIANA KRALL-ის მუსიკით არის ინსპირირებული, დორეან გრეის პერსონაჟითა, სერგეი ფარაჯანოვის შემოქმედებით და ა.შ. 

BESSARION-ის შემოქმედებაში ყოველთვის იგრძნობა საქმის მიმართ უნიკალური დამოკიდებულება, გულრწფელი სიყვარული და სტილის განსაკუთრებული შეგრძნება. 

მიუხედავად იმისა, რომ დიზაინერი წლებია საქართველოში არ ცხოვრობს და მის საზღვრებს გარეთ საქმიანობს, მისი კოლექციები, როგორც თავად ამბობს საქართველოს ნოსტალგიით, ქართული არქიტექტურითა და ხელოვნებით არის ინსპირირებული. BESSARION სწავლის დასრულების შემდეგ აქტიურად მონაწილეობდა უამრავ საერთაშორისო მოდის კონკურსში და მას არა ერთი პირველი ადგილის ჯილდო აქვს მოპოვებული. BESSARION-ის კოლექციები ექსკლუზიურად არის გამოფენილი VERBA შოურუმში, მოსკოვში. 

დიზაინერის 2017/18 წლის შემოდგომა-ზამთრის კოლექცია ძირითადად შავ ფერებში გახლდათ გადაწყვეტილი. თამამი, ორიგინალური, უხეში, ქალური და სექსუალური სილუეტები მომდევნო შემოდგომა-ზამთრის სეზონისთვის, როგორც ჩანს ძალიან აქტუალური იქნება. ამ ტენდენციას ინდივიდუალური და საავტორო ხედვით, ფერთა კონტრასტით, კიდევ ერთხელ გაუსვა ხაზი BESSARION-მა.

TREND. გთავაზობთ ფოტოებს BESSARION-ის ჩვენებიდან:

ფოტო: ქეთა კანდელაკი

BO-9 IMG_2020.jpg