პიარის სპეციალისტების მიმართ მთელ მსოფლიოში გავრცელებული სტერეოტიპული წინასწარგანწყობა მოქმედებს და ამ მხრივ არც ჩვენ ვართ გამონაკლისი: საქართველოში პიარ-სპეციალისტებს მოდურად ჩაცმულ „ტუსოვშიკებს“ უწოდებენ. თავად ამ პროფესიის წარმომადგენლებმა კი კარგად იციან, რას ნიშნავს თავი საზოგადოებრივ ურთიერთობებს მიუძღვნა.

უკვე მეოთხე წელია ზედიზედ, რაც ამერიკელი მეცნიერები სტატისტიკურად ადასტურებენ, რომ პიარი ყველაზე სტრესული პროფესიების ათეულში შედის: 2014-ში CareerCast-ის სტრესული პროფესიების რეიტინგში პიარს მე-6 ადგილი ეკავა, გასულ წელს კი — მე-5. თანაც, ამ ათეულში პიართან ერთად ისეთი პროფესიები იყო მოხსენიებული, რომლებიც ადამიანებს ფიზიკური საფრთხის წინაშეც კი აყენებს — მაგალითად, სამხედროების, მეხანძრეების და პილოტების სამუშაო. საინტერესოა ისიც, რომ რეიტინგის მე-8 ადგილი გაზეთის რეპორტიორის პროფესიას ეკავა.

 საკითხავია, რატომ ითვლება პიარ-სპეციალისტის, ივენთ-მენეჯერის ან ჟურნალისტების სამუშაო ისეთივე სტრესულ და სარისკო პროფესიად, როგორებიცაა მაგალითად სამხედროების სამუშაო? — CareerCast-ის განმარტებით, ამ პროფესიის ადამიანებს შესასრულებელი სამუშაოს მოსწრება მუდმივად მოკლე ვადებში უწევთ და თანაც საზოაგდოებას ერთი სული აქვს, როდის გააკრიტიკებს მათ.

 გადახედე ყველაზე რთული პროფესიების 10-ეულს, შეიძლება მოულოდნელად იქ შენი სამუშაოც აღმოაჩინო :)

1. სამხედრო სამსახურის პერსონალი

2. სამხედრო გენერალი

3. მეხანძრე

4. პილოტი

5. ღონისძიების კოორდინატორი

6. საზოგადოებასთან ურთიერთობის მენეჯერი

7. კორპორაციის აღმასრულებელი მენეჯერი

8. გაზეთის რეპორტიორი

9. პოლიციის ოფიცერი

10. ტაქსის მძღოლი

სხვათა შორის, CareerCast-მა 10 ყველაზე ნაკლებად სტრესული პროფესიაც გამოაქვეყნა. 2014 წლის მონაცემებით, ყველაზე არასტრესული სამუშაო აუდიოლოგებს აღმოაჩნდათ (ამ პროფესიის ადამიანებს სმენის პრობლემების დადგენა და მკურნალობა ევალებათ); გასულ წელს კი — უნივერსიტეტის პროფესორებს.

მოკლედ, ამ სტატისტიკის გჯერა თუ არა, შენი საქმეა, მაგრამ მაინც გირჩევთ, თუ პიარ-სპეციალისტის პროფესია გაინტერესებს, გახსოვდეს, რომ ის მხოლოდ მოდურად გამოწყობას და ღონისძიებებზე სიარულს არ მოითხოვს!