ახალი წლის დღესასწაულებამდე ხარჯების ორგანიზება თითქმის ყოველთვის რთულია. გიზიარებთ ფინანსური ექსპერტების რჩევებს, რომლებიც დაგეხმარებათ ფულის ფლანგვის თავიდან აცილებაში.

ფინანსური მდგომარეობის გაანალიზება

ჩამოწერეთ თქვენი შემოსავალი და ხარჯები. პირველ რიგში, ეს დაგეხმარებათ გაიგოთ, რამდენად ხართ მზად თანხა დახარჯოთ ზეიმებზე; მეორეც, ნახავთ, რა თანხის დაზოგვა გჭირდებათ ახალი წლის შემდეგ საყოფაცხოვრებო საჭიროებებისთვის. დანაზოგი მნიშვნელოვანია არა მხოლოდ მომავალი დაგეგმილი ხარჯებისთვის, არამედ მოულოდნელი სიტუაციებისთვისაც, როგორიცაა მანქანის ან სახლის შეკეთება.

ბიუჯეტის ლიმიტების დაწესება

წინასაახალწლოდ დააწესეთ ლიმიტები საჩუქრებსა და სასურსათო პროდუქტებზე. განსაზღვრეთ თანხა, რომლის დახარჯვაც გსურთ და მკაცრად დაიცავით ეს ბიუჯეტი. რეკომენდებულია საჩუქრებზე თქვენი მთლიანი ბიუჯეტის არაუმეტეს 10-15%-ის დახარჯვა. უფრო დიდი შენაძენები, ეცადეთ გაცილებით ადრე გააკეთოთ.
რაც შეეხება ჩაცმულობას, არ არის აუცილებელი, ყველაფერი ახალი შეიძინოთ ახალი წლის იერსახისთვის. კარგად დაათვალიერეთ გარდერობი: შესაძლოა, მხოლოდ ახალი ფეხსაცმელი ან სამკაული საკმარის იყოს თქვენი საახალწლო იერსახის განახლებისთვის. ხოლო თუ ნამდვილად გსურთ ახალი სადღესასწაულო კაბა და განსაკუთრებული შემთხვევისთვის ემზადებით, სცადეთ კაბის ქირაობა სალონიდან.

საყიდლების სიის შედგენა

შეადგინეთ კერძების, პროდუქტებისა და საჩუქრების სია - ეს დაგეხმარებათ თავიდან აიცილოთ ზედმეტი ხარჯები და დაგეგმოთ სუფრაზე საკვების რაოდენობა სტუმრების რაოდენობის მიხედვით. ბევრი ნივთის (მაგალითად, ალკოჰოლის და დაკონსერვებული პროდუქტების) წინასწარ შეძენა შესაძლებელია, რაც დაგიზოგავთ დროსა და ფულს. საჩუქრების მკაფიოდ განსაზღვრული აღწერა და რაოდენობა დაგეხმარებათ თავიდან აიცილოთ მოულოდნელი ხარჯები.

საუკეთესო შეთავაზებების პოვნა

მას შემდეგ, რაც გადაწყვეტთ, რა იქნება თქვენს სადღესასწაულო სუფრაზე, მოძებნეთ ბიუჯეტური ვარიანტები. გამოიყენეთ ონლაინ მაღაზიები და სავაჭრო პლატფორმები ფასების შესადარებლად და ფასდაკლებების მოსაძებნად. ყურადღება მიაქციეთ სხვადასხვა აქციებსა და პრომო კოდებს, რაც დაგეხმარებათ თანხის დაზოგვაში.

გართობაზე ხარჯების ოპტიმიზაცია

ფულის დაზოგვისთვის სახლში დარჩენა არ არის საჭირო. დღესასწაულებზე უამრავი უფასო, საინტერესო ღონისძიება, კონცერტი და წარმოდგენაა. შეგიძლიათ უფასო საციგურაო მოედანზე ან ყინულის სლაიდზე წასვლა, თოვლიან ქალაქში გასეირნება ან სავაჭრო ცენტრის მონახულება - ბევრი სავაჭრო ცენტრი დღესასწაულების დროს უფასო გასართობ პროგრამებს გვთავაზობს.

შეგიძლიათ ახლობლების გარემოცვაში მოაწყოთ ინტერაქტიული აქტივობები: ახალი წლის კინომარათონი, დესერტების მომზადების სესია ან სამაგიდო თამაშების საღამო. ასე არა მხოლოდ დაამყარებთ კავშირს საყვარელ ადამიანებთან, არამედ იგრძნობთ სადღესასწაულო სულისკვეთებასაც.