ჩვენ გვიყვარს ჩვენი მეგობრები, თუმცა ზოგჯერ შეიძლება ვიყოთ უხეშები და უყურადღებოები მათ მიმართ, ხშირად უნებლიეთ, უბრალოდ იმიტომ, რომ არ დავუთმეთ საკმარისი დრო, ან დაუფიქრებლად ვესაუბრეთ.

მეგობრობა ძალიან დინამიური და ადაპტირებადია, ამიტომ, თუ ორივე მხარე მზად არის ადაპტაციისთვის, შეცდომები შეიძლება გამოსწორდეს და ნებისმიერი ბზარი განიკურნოს.

TREND გიზიარებთ მეგობრების მხრიდან ყველაზე ხშირად დაშვებულ შეცდომებს და გირჩევთ, როგორ გამოვასწოროთ ისინი.

1. მხარდაჭერა თუ მორალის კითხვა?

მეგობარი გიზიარებთ პრობლემას, თქვენ კი მაშინვე იწყებთ რჩევას და მისი შეცდომების მითითებას, მხარდაჭერის შეთავაზების ნაცვლად.
ადამიანებს ხშირად ეს საუკეთესო განზრახვით მოსდით: გტკივა როგორ იტანჯება შენი მეგობარი და გინდა დაეხმარო, გგონია, რომ პრობლემა უკეთ გესმის, მაგრამ იმ ადამიანისთვის, ვისაც თქვენი მხარდაჭერა სჭირდება, რათა ისაუბროს და თავად გაარკვიოს ყველაფერი, ეს ქცევა შეიძლება დამამცირებლად ჟღერდეს.



რჩევა: იმის ნაცვლად, რომ დაუყოვნებლივ უთხრათ მეგობარს, თუ რას აკეთებს არასწორად, გამოხატეთ თანაგრძნობა, შემდეგ კი შეგიძლიათ ჰკითხოთ, ამ მომენტში მას მხარდაჭერა ურჩევნია თუ რჩევა და შესაბამისად იმოქმედეთ.

2. სოციალური შეკრებები

შეიძლება იფიქროთ, რომ თქვენს მეგობარს არ აინტერესებს თქვენს მიერ მოწვეული ადამიანები. მაგალითად, შეიძლება გქონდეთ წყვილების შეკრება და თქვენი მეგობარი მარტოხელაა, ან შეიძლება გქონდეთ კითხვის კლუბი და თქვენს მეგობარს კითხვა არ უყვარდეს, მაგრამ თუ მუდმივად გამორიცხავთ მას თქვენი სოციალური წრიდან, ეს შეურაცხმყოფელი იქნება.



რჩევა: შეეცადეთ არ ივარაუდოთ, რაში სურს ან არ სურს მონაწილეობა მიიღოს თქვენს მეგობარმა და ყოველთვის მოიწვიეთ ის წვეულებაზე, მიეცით საშუალება თავად გადაწყვიტოს, სურს თუ არა დასწრება.

3. მეგობრის დროის განკარგვა

ხშირად გგონიათ, რომ თქვენი მეგობარი უნდა მოვიდეს თქვენს თხოვნაზე ნებისმიერ დროს, შეასრულოს თქვენი მოთხოვნები და დავალებები და გაატაროს თქვენთან იმდენი დრო, რამდენიც გჭირდებათ, თითქოს მას არ ჰქონდეს საკუთარი ცხოვრება, საჭიროებები და გეგმები.



რჩევა: ყოველთვის ჰკითხეთ მეგობარს, აქვს თუ არა თავისუფალი დრო და მზადაა თუ არა, თქვენთან ერთად დროის გასატარებლად.

4. მნიშვნელოვანი მოვლენების არ აღნიშვნა

როდესაც ჩვენი მეგობრები განიცდიან მტკივნეულ მოვლენებს, როგორიცაა დაშორება, სამსახურის დაკარგვა ან საყვარელი ადამიანის გარდაცვალება, ბევრმა ჩვენგანმა არ იცის რა თქვას - განსაკუთრებით თუ აქამდე არ განგვიცდია მსგავსი რამ. პირიქით, როდესაც მეგობრები განიცდიან დადებით მოვლენებს, როგორიცაა ახალი ურთიერთობა ან სამსახური, შეიძლება ვივარაუდოთ, რომ მათ არ სჭირდებათ ჩვენი მილოცვა, რადგან ისინი ძალიან დაკავებულები არიან, ან ეს არც ისე მნიშვნელოვანია; თუმცა, დუმილი ხშირად აღიქმება როგორც გულგრილობა.



რჩევა: ეს შეცდომა ადვილად გამოსწორებადია. მოკლე შეტყობინება, როგორიცაა "შენზე ვფიქრობ" ან "როგორ ხარ?", საკმარისია იმის საჩვენებლად, რომ თქვენ ზრუნავთ მასზე და მის გვერდით ხართ.

5. შეხვედრების ხშირი გაუქმება

რა თქმა უნდა, ყველას აქვს მოულოდნელი გარემოებები, რომლებიც მოითხოვს გეგმების შეცვლას, მაგრამ როდესაც ეს ხშირად ხდება, ეს სიგნალია, რომ ეს ურთიერთობა თქვენთვის პრიორიტეტული არ არის.

რჩევა: მიუხედავად იმისა, რომ შეხვედრების დროდადრო გაუქმება მისაღებია, თქვენ მაინც უნდა იყოთ პასუხისმგებელი თქვენს ქმედებებზე, თუ მეგობრობა თქვენთვის მნიშვნელოვანია.
თუ შეხვედრის გაუქმება გჭირდებათ, დროულად დაუკავშირდით მეგობარს და შესთავაზეთ სხვა დრო.

6. მეგობრის ცხოვრებისეული გარემოებების არგათვალისწინება

ჩვენ ხშირად იმდენად ვართ კონცენტრირებულნი ჩვენს ცხოვრებაზე, რომ სრულიად უგულებელვყოფთ მეგობრების ცხოვრებაში მიმდინარე მოვლენებს, რაც შეიძლება წყენის წყაროდ იქცეს.

მაგალითად, შეიძლება ძალიან განაწყენდეთ მეგობრისგან იმის გამო, რომ სხვა ქალაქში თქვენს ქორწილში არ მოვიდა, მიუხედავად იმისა, რომ მისი არყოფნა გულგრილობის გამო არ იყო, არამედ იმიტომ, რომ მას ფინანსური პრობლემები ჰქონდა ან შვილების დამტოვებელი არ ყავდა.
ამ ფაქტს კომუნიკაციის ნაკლებობა იწვევს, ამიტომ გამოსავალი, რა თქმა უნდა, გულწრფელი საუბრების ჩართვაა.



წყენა მაშინ ჩნდება, როდესაც ვინმეს ქმედებებს, რომლებიც სინამდვილეში არ არსებობს, აზრს ვანიჭებთ. მაგალითად, ქორწილის შემთხვევაში, თუ თქვენს მეგობარს ეტყვით, თუ რამდენად გენატრებოდათ და რამდენად გაწუხებდათ მისი არყოფნა და ის აგიხსნით, თუ რატომ ვერ მოვიდა, წყენა გაქრება.

როგორც კი დაიწყებთ თქვენი გრძნობების ღიად გამოხატვას, ვარაუდების გარეშე ან ერთმანეთისგან დისტანცირების გარეშე, თქვენ შორის კავშირი მხოლოდ გაძლიერდება.