2026 წლის პირველი ნახევარი მოკლე ვარცხნილობებისა და სხვადასხვა ტიპის კარეს ეპოქა იყო. თუმცა შემოდგომის მოახლოებასთან ერთად ტენდენცია იცვლება - გრძელი თმა ისევ აქტუალური ხდება, ოღონდ ამჯერად უფრო ბუნებრივი, მსუბუქი და მდიდრული იერით.

სტილისტების თქმით, თანამედროვე გრძელი თმა ნაკლებად „გადაპრანჭული“ უნდა იყოს. მთავარი აქცენტი კეთდება ჯანსაღ თმაზე, ბზინვარებაზე, მოძრაობასა და რბილ ტალღებზე.

„რამდენიმე წლის განმავლობაში მოკლე და მკვეთრად ფორმირებული ვარცხნილობები იყო პოპულარული, ახლა კი გრძელი თმა კვლავ გლამურულად გამოიყურება“, - ამბობს ცნობილი სტილისტი მიტჩელ რამაზონი.

ასაკი შეუზღუდავია

ერთ-ერთი მთავარი ცვლილება ისიცაა, რომ გრძელი თმა აღარ მიიჩნევა მხოლოდ ახალგაზრდებისთვის განკუთვნილ სტილად. თუ ადრე ქალები შუა ასაკში ხშირად ავტომატურად ირჩევდნენ მოკლე ვარცხნილობას, დღეს თმის მოვლის თანამედროვე საშუალებები საშუალებას იძლევა, 50 და 60 წლის ასაკშიც გრძელი და ჯანსაღი თმა შეინარჩუნოთ.

ამის კარგი მაგალითები არიან ვიქტორია ბექჰემი, სანდრა ბულოკი, დემი მური და ჯენიფერ ლოპესი.

პანდემიის პერიოდში ბევრმა ქალმა თმის გაზრდა დაიწყო, შემდეგ კი მოკლე ვარცხნილობებს დაუბრუნდა. ახლა კი გრძელი თმა კვლავ ბრუნდება - უფრო ბუნებრივი და ჯანსაღი იერით.

როგორი გრძელი თმაა მოდური 2026 წელს?

წლევანდელ ტენდენციებში განსაკუთრებით ჩანს რბილი ტალღები, მოცულობითი ფენები და 90-იანი წლების სტილის მოცულობითი დავარცხნა. თმა უფრო ბუნებრივად უნდა გამოიყურებოდეს - თითქოს სპეციალურად არც კი დაგიყენებიათ.

2026 წლის Met Gala-ზე სწორედ ასეთი ვარცხნილობები ჭარბობდა. ნიკოლ კიდმანი და მისი ქალიშვილი სანდი როუზი სწორი, გრძელი თმით გამოჩნდნენ.

ჯენიფერ ლოპესიც წითელ ხალიჩაზე წელის სიგრძის, ბუნებრივად ჩამოშლილი თმით გამოჩნდა.

მთავარი პირობა - ბზინვარება და ჯანსაღი იერი

გრძელი თმის მთავარი მახასიათებელი დღეს ბზინვარებაა. მნიშვნელოვანია არა მხოლოდ ვარცხნილობა, არამედ თავად თმისა და თავის კანის მდგომარეობა.

სასურველია მსუბუქი მოვლის საშუალებებისა და თერმული დამცავი პროდუქტების გამოყენება, რომლებიც თმას არ დაამძიმებს. ასევე მნიშვნელოვანია ცხელი ხელსაწყოების გამოყენების შეზღუდვა, რადგან გრძელ თმაზე დაზიანებული ბოლოები განსაკუთრებით შესამჩნევი ხდება.

სტილისტები თმის ბოლოების შეჭრას დაახლოებით 8–12 კვირაში ერთხელ გვირჩევენ. თუ თმა ხშირად ზიანდება, ეს ინტერვალი შესაძლოა უფრო მოკლე იყოს.

ძალიან გრძელი - კი, მაგრამ არა უსიცოცხლო

გრძელი თმა აუცილებლად ერთ სიგრძეზე შეჭრილი არ უნდა იყოს. ფენები და სახის ირგვლივ მსუბუქი ღერები ვარცხნილობას მოცულობას მატებს.

თუ თმა ზედმეტად მძიმე და სწორი ხაზით არის შეჭრილი, მას შეუძლია სახის ვიზუალურად დამძიმება. ამიტომ ბოლოების ოდნავ დარბილება და ფენების დამატება ვარცხნილობას უფრო მსუბუქსა და თანამედროვე იერს აძლევს.

მთავარი წესია: 2026 წლის გრძელი თმა უნდა იყოს ბუნებრივი, მოვლილი, მსუბუქი და ბზინვარე.