ახალი სერიალი „Elle“, რომელიც საკულტო ფილმის Legally Blonde პრიკველია, მაყურებელს ელ ვუდსის ახალგაზრდობის წლებზე მოუყვება.

მოვლენები პირველი ფილმის ამბებამდე ექვსი წლით ადრე ვითარდება და ელს სკოლის პერიოდში გვიჩვენებს - ამჯერად სიეტლის გრანჟის ეპოქაში, სადაც მისი მკვეთრი ვარდისფერი სტილი ნაცრისფერ ჩაცმულ გარემოს სრულიად ეწინააღმდეგება.

ელ ვუდსი ეკრანზე პირველად 2001 წელს გამოჩნდა და პერსონაჟმა საოცრად დიდი კვალი დატოვა. მან მაყურებელს „Bend and Snap“-ის ცნობილი მოძრაობა, თმის მოვლის წესები და რაც მთავარია, საკუთარი თავის რწმენა დაამახსოვრა.

ფილმს 2003 წელს გაგრძელება მოჰყვა, შემდეგ კი შეიქმნა წარმატებული მიუზიკლი. ფილმის სცენარი 2021 წელს XXI საუკუნის ერთ-ერთ საუკეთესო სცენარადაც დასახელდა.

წარმატება საკუთარი თავის დაკარგვის გარეშე

თავდაპირველად ელს ერთი მიზანი აქვს - ყოფილი შეყვარებულის დაბრუნება. თუმცა მალევე მისი მთავარი მიზანი საკუთარი შესაძლებლობების დამტკიცება ხდება.

ელისთვის ჰარვარდში მოხვედრა საკუთარი თავის შეცვლას არ ნიშნავს. პირიქით - ის ყველგან თავის სტილსა და ინდივიდუალობას ინარჩუნებს. უნივერსიტეტში ჩასაბარებელ ვიდეოშიც კი საკუთარ თავს ისე წარმოაჩენს, როგორც თავად სურს, სასამართლოში კი კლიენტს თავიდან ბოლომდე ვარდისფერში ჩაცმული იცავს.

მისი ლეპტოპიც კი, რომელიც ბოლოს უფრო პრაქტიკული მოდელით უნდა ჩაანაცვლოს, თვალშისაცემი ნარინჯისფერია, მაშინ როცა გარშემო ყველა შავ ლეპტოპს იყენებს.

ელ ვუდსის მთავარი გზავნილი სწორედ ეს არის: შეგიძლია შეიცვალო, განვითარდე და წარმატებას მიაღწიო ისე, რომ საკუთარი თავი არ დაკარგო.

ფილმებში ქალებს ხშირად „ცვლიან“ - ელს კი საკუთარი თავი მოსწონს

ბევრ ფილმში ქალ პერსონაჟს გარეგნობის შეცვლით „აუმჯობესებენ“ - იხსნის სათვალეს, იცვლის ვარცხნილობას და უცებ ყველასთვის მიმზიდველი ხდება.

ელ ვუდსის შემთხვევაში კი ყველაფერი პირიქითაა. ის სათვალეს იკეთებს, ჰარვარდის პროფესორებისა და თანაკურსელების დაცინვის მიუხედავად კი არასდროს ცდილობს, წარმატების სხვისეულ წარმოდგენას მოერგოს.

მას შეუძლია შესანიშნავი რეზიუმე შექმნას, მაგრამ ისიც კი ვარდისფერი და სურნელოვანი იქნება.

ქალი, რომელსაც ვერ დააკნინებენ

ელ ვუდსის განსაკუთრებულობა მხოლოდ ამბიციაში არ არის. ის საკუთარ მიზნებს თავდაჯერებულობით, მაგრამ ამავდროულად სიკეთითა და თანაგრძნობით აღწევს.

თავდაპირველად მისი მეტოქე ვივიან კენსინგტონიც კი საბოლოოდ ელით შთაგონებული ხდება. ის ხედავს ქალს, რომელიც უარს ამბობს, საკუთარი თავის მნიშვნელობა მხოლოდ იმიტომ შეამციროს, რომ სხვები - განსაკუთრებით მამაკაცები - მას სათანადოდ არ აფასებენ.

ელისთვის გამარჯვება მხოლოდ ჰარვარდის დამთავრება ან იურისტობა არ არის. ის გზად ნამდვილ მეგობრობასაც პოულობს.

იგივე გავლენას ახდენს ის პაულეტზეც, რომელსაც საკუთარი ღირსების დაბრუნებაში ეხმარება, ხოლო მკაცრ პროფესორ სტრომველს თავდაპირველი ეჭვი საბოლოოდ პატივისცემით ეცვლება.

ელ ვუდსი ახალ თაობას უბრუნდება

ახალ პრიკველში ახალგაზრდა ელ ვუდსს ახალბედა მსახიობი ლექსი მინეტრი განასახიერებს. მან როლი სწორედ ელ ვუდსის ჰარვარდის მისაღები ესეს საკუთარი, კრეატიული ინტერპრეტაციით წარდგენის შემდეგ მიიღო.

ელ ვუდსის პერსონაჟი დღესაც აქტუალურია, რადგან ბევრმა ახალგაზრდა ქალმა იცის, რას ნიშნავს, როცა სხვები სათანადოდ არ გაფასებენ ან შესაძლებლობებს გარეგნობით, სტილითა თუ სტერეოტიპებით განსაზღვრავენ.

ელ ვუდსის პასუხი კი მარტივია:

„ყოველთვის უნდა გჯეროდეს საკუთარი თავის.“