იმის გარკვევა, თუ რა გვაინტერესებს, რა გვანიჭებს სიამოვნებას და რისი კეთება გვინდა ყოველდღიურად, საკუთარი გზის პოვნაში გვეხმარება.

თუმცა, ამ კითხვებზე პასუხის გაცემა ყოველთვის მარტივი არ არის. ქვემოთ მოცემული ცხრა რჩევა დაგეხმარებათ, უკეთ გაერკვეთ საკუთარ სურვილებში და აღმოაჩინოთ საქმიანობა, რომელიც ნამდვილად გიტაცებთ.

1. შეანელეთ ცხოვრების ტემპი

სამსახურსა და ოჯახურ ვალდებულებებს შორის ხშირად საკუთარი თავისთვის დრო აღარ გვრჩება. ყოველდღიური ფუსფუსისგან მცირე შესვენებაც კი დაგეხმარებათ, უკეთ გაიაზროთ თქვენი სურვილები. სცადეთ იოგა, გაისეირნეთ ლანჩის შესვენებაზე ან მიიღეთ თბილი აბაზანა - შეარჩიეთ ის, რაც განტვირთვაში დაგეხმარებათ.

2. გაიხსენეთ, რა გიყვარდათ ბავშვობაში

ბავშვობის ინტერესები ზოგჯერ მიგვანიშნებს იმ საქმიანობაზე, რომელიც ზრდასრულ ასაკშიც შეიძლება გვხიბლავდეს. თოჯინებისთვის ტანსაცმელს კერავდით, მოთხრობებს წერდით, კალათბურთს თამაშობდით თუ კერძების მომზადება გიყვარდათ?



გაიხსენეთ, რა გიტაცებდათ ყველაზე მეტად და დაფიქრდით, შეგიძლიათ თუ არა ამ ინტერესების დაბრუნება თქვენს ცხოვრებაში.

3. გაარკვიეთ, რა არ მოგწონთ

საკუთარი სურვილების გასაგებად მნიშვნელოვანია იმის ცოდნაც, რას ვერ იტანთ. თუ სამსახურში გარკვეული დავალებები მუდმივად გაღიზიანებთ ან ყოველდღიური საქმიანობის დიდი ნაწილი უკმაყოფილებას იწვევს, დაფიქრდით მიზეზებზე. ეს დაგეხმარებათ, გამორიცხოთ ის მიმართულებები, რომლებიც თქვენთვის შესაფერისი არ არის.

4. შექმენით შთაგონების დაფა

შეაგროვეთ ფოტოები, ჟურნალებიდან ამოჭრილი სტატიები და სხვა მასალა, რომელიც დადებით ემოციებს იწვევს. განათავსეთ ისინი ერთ დაფაზე და დააკვირდით, რა თემები მეორდება. შესაძლოა, ასე უკეთ დაინახოთ, რა გაინტერესებთ და რისკენ გიწევთ გული.

5. დაფიქრდით, რას გააკეთებდით ანაზღაურების გარეშე

რა საქმეს დათანხმდებოდით ხუთი წლის განმავლობაში ისე, რომ სანაცვლოდ ფულს არ იღებდეთ? შესაძლოა, ეს წიგნების დალაგება, ბავშვებისთვის კითხვის სწავლება ან ძაღლების გასეირნება იყოს. პასუხი მიგანიშნებთ, რომელი საქმიანობა განიჭებთ იმდენ სიამოვნებას, რომ მისი შესრულება მხოლოდ ანაზღაურების გამო არ გიღირთ.

6. დაუთმეთ დრო იმას, რაც გსიამოვნებთ

ცხოვრება მხოლოდ მოვალეობების შესრულება და სხვებზე ზრუნვა არ არის. გაიხსენეთ, ბოლოს როდის გააკეთეთ რამე მხოლოდ საკუთარი სიამოვნებისთვის. საყვარელი საქმიანობისთვის დროის გამოყოფა ყოველდღიურობას უფრო სასიამოვნოს გახდის და შესაძლოა, ახალი ინტერესების აღმოჩენაშიც დაგეხმაროთ.

7. ნაკლები ისაუბრეთ და მეტი იმოქმედეთ

მიზნებზე საუბარი მარტივია, მათი განხორციელება კი კონკრეტულ ნაბიჯებს მოითხოვს. თუ წიგნის დაწერა, ახალი საქმის დაწყება ან კარიერული წინსვლა გსურთ, განსაზღვრეთ, რით შეგიძლიათ დაიწყოთ. მცირე, თანმიმდევრული მოქმედებები ოცნებების რეალობად ქცევის შესაძლებლობას ზრდის.

8. ჰკითხეთ მეგობრებს

ზოგჯერ ახლობლები ჩვენს შესაძლებლობებსა და ინტერესებს უფრო ნათლად ხედავენ, ვიდრე თავად ჩვენ. ჰკითხეთ მეგობრებს, რაში გამოგარჩევენ სხვებისგან, რა გხიბლავთ და როდის გხედავენ ყველაზე ბედნიერს. მათმა პასუხებმა შესაძლოა, საკუთარი თავის შესახებ ახალი რამ დაგანახოთ.

9. წერეთ

აზრების ფურცელზე გადატანა მათ დალაგებაში დაგეხმარებათ. არ არის აუცილებელი, კონკრეტულ თემას მიჰყვეთ ან ტექსტი ვინმეს აჩვენოთ. უბრალოდ წერეთ იმაზე, რაც გაწუხებთ, გახარებთ ან გაინტერესებთ. თავისუფალმა წერამ შესაძლოა ისეთი სურვილები და იდეები გამოგიკვეთოთ, რომლებზეც მანამდე არ დაფიქრებულხართ.

თქვენ რა გეხმარებათ საკუთარი სურვილებისა და ცხოვრებისეული მიზნების უკეთ გააზრებაში?