ლონდონის ვესტ-ენდში, ქარიან ამინდში სეირნობისას, შეუძლებელია ყურადღება არ მიაქციოთ ეპატაჟურ ქალბატონს, რომელსაც გვერდით ნამდვილი გიგანტი - გერმანული დოგი მოჰყვება. ეს „Ugly Betty”-ს ვარსკვლავი, ვანესა უილიამსი და მისი ერთგული მეგობარი, როსკოა.

ამჟამად 63 წლის ვანესა ლონდონის Dominion Theatre-ში საკულტო მიუზიკლში, „ეშმაკი ატარებს პრადას“, მირანდა პრისლის როლს ასრულებს. თუმცა, მისი წარმატებული კარიერის მიღმა სევდიანი ისტორია იმალება, რომლის გადალახვაშიც სწორედ 6 წლის როსკო დაეხმარა.

„ის ჩემი ემოციური საყრდენია“

2024 წელი მსახიობისთვის ტრაგიკული აღმოჩნდა. მისი დედა, ჰელენი, ლონდონში შვილის პრემიერაზე ჩამოვიდა, თუმცა ღვიძლის მწვავე უკმარისობით გარდაიცვალა. სულ რაღაც 6 კვირაში კი ვანესას მეორე ძაღლი - როსკოს დაც დაეღუპა.



„დედაჩემის გარდაცვალება დიდი ტრავმა იყო. სპექტაკლები არ ჩამიშლია, რადგან სცენა ყურადღების გადატანაში მეხმარებოდა, მაგრამ შინაგანად როსკო მჭირდებოდა. ის ნიუ-იორკიდან ლონდონში გადმოვიყვანე, რათა ჩემი ფსიქიკური მდგომარეობა შემენარჩუნებინა,“ - ამბობს ვანესა.
დღეს როსკოს სპეციალური საყელური უკეთია წარწერით - „ემოციური მხარდაჭერის ცხოველი“. მიუხედავად იმისა, რომ ბრიტანეთში ეს სტატუსი ოფიციალურად აღიარებული არ არის, მსახიობს უფლებას აძლევენ, ძაღლი თეატრში ატაროს.

ცხოვრება თეატრის კულისებში

როსკო ნამდვილი თეატრალია. ის ყოველდღე დაყვება ვანესას რეპეტიციებსა თუ სპექტაკლებზე. სანამ ვანესა სცენაზე მირანდა პრისლის მკაცრ ამპლუაშია, როსკო მის საგრიმიოროში, დიდ საწოლზე წევს და სპექტაკლს უსმენს. როგორც კი წარმოდგენა სრულდება, ის მაშინვე კართან დგება - იცის, რომ შინ წასვლის დროა.

საინტერესო ფაქტები როსკოს შესახებ:

• „ის ნამდვილი ცხენია!“ – ამ ფრაზას ვანესა ყოველდღე ისმენს გამვლელებისგან.

• გიგანტური „ბავშვი“: მიუხედავად ზომისა, როსკოს ჰგონია, რომ პატარა ლეკვია და მუდმივად სურს ვანესას კალთაში ჩაუჯდეს.

• უსაფრთხოება: მსახიობი ამბობს, რომ ღამით ლონდონის ქუჩებში როსკოსთან ერთად სეირნობისას თავს სრულიად უსაფრთხოდ გრძნობს - მისი ზომა ნებისმიერ თავდამსხმელს დააფრთხობს.
  
  

კავშირი „ბეტმენთან“ და ელტონ ჯონთან

როსკოს პოვნის ისტორიაც ჰოლივუდურია. ვანესამ ეს ჯიში მას შემდეგ შეიყვარა, რაც მისმა კოლეგამ, ამერიკა ფერერამ, გადასაღებ მოედანზე თავისი დოგი მიიყვანა. საბოლოოდ, მსახიობმა ძაღლი ბერტ უორდისგან (ბეტმენის ორიგინალური სერიალის „რობინი“) აიყვანა, რომელიც გიგანტური ჯიშების გადარჩენითაა დაკავებული.
ახლა ვანესა ლონდონში მარტო ცხოვრობს (2021 წელს მესამე ქმართან განქორწინების შემდეგ), თუმცა მარტოობას სულაც არ გრძნობს.



მის ცხოვრებაში არის საყვარელი საქმე, მუსიკა, რომელსაც სპექტაკლისთვის თავად ელტონ ჯონი წერს, და რაც მთავარია - ოთხფეხა მეგობარი, რომელიც მას ყველა სირთულის გადალახვაში ეხმარება.

ოქტომბერში ვანესა ლონდონურ სეზონს დაასრულებს და სავარაუდოდ, როსკოსთან ერთად ბროდვეის დასაპყრობად გაემგზავრება.