შეგიმჩნევიათ, რომ სტანდარტული სამუშაო გრაფიკით ეფექტურობის შენარჩუნება გრძელვადიან პერსპექტივაში თითქმის შეუძლებელია? დაუსრულებელი საქმეები გროვდება, დოკუმენტები მაგიდაზე იდება და კვირის ბოლოს გადაღლილობისგან ენერგია ნულამდე ეცემა.

ხშირად გვშურს ფრილანსერების, რომლებიც თავად წყვეტენ, როდის დაიწყონ მუშაობა, თუმცა პროდუქტიულობის გაზრდა ოფისის თანამშრომლებსაც შეუძლიათ.

მთავარი საიდუმლო საკუთარი ბიორიტმების მოსმენაშია. ფსიქოლოგები გვირჩევენ, რომ სამუშაო დღე არა საათს, არამედ ორგანიზმის შინაგან რიტმს მოვარგოთ.

რა არის ქრონო-რიტმი?

სანამ დამსაქმებელი კლასიკურ 9-დან 6-მდე გრაფიკს გიკარნახებთ, თქვენს ორგანიზმს თამაშის თავისი წესები აქვს. შინაგანი საათი განსაზღვრავს, რა დროს არის თქვენი გონება ყველაზე ფხიზელი და როდის სჭირდება სხეულს დასვენება.

ადამიანის ბიორიტმების კლასიკური სქემა ასე გამოიყურება:

• 06:00 – 10:00: ორგანიზმის გამოღვიძება;

• 10:00 – 15:00: აქტივობის პიკი;

• 15:00 – 21:00: ენერგიის ნელი კლება;

• 21:00 – 06:00: აღდგენის ფაზა და ძილი.
  
  

თუმცა, ეს ზოგადი ფორმულა ყველაზე არ მუშაობს. იმისათვის, რომ მაქსიმუმს მიაღწიოთ, უნდა იცოდეთ, რომელ „ფრინველთა“ კატეგორიას მიეკუთვნებით: ტოროლა, ღამურა თუ მტრედი.

ინსტრუქცია ქრონოტიპების მიხედვით: როგორ ვიმუშაოთ ეფექტურად?

1. ტოროლა

თუ დილით ადრე ადგომა თქვენთვის პრობლემა არ არის, ე.წ. „ოქროს საათები“ სწორედ დღის პირველ ნახევარში გაქვთ.

• 08:00 – 12:00: ეს თქვენი პიკია. ამ დროს დაგეგმეთ ყველაზე რთული პროექტები, მნიშვნელოვანი მოლაპარაკებები, ხელშეკრულებების გაფორმება და ანალიტიკური ანგარიშები.

• სადილის დრო: აუცილებლად დაისვენეთ. ნუ ეცდებით საქმეების სწრაფად დასრულებას, რადგან ამ დროს ენერგია საგრძნობლად იკლებს.

• 13:00-ის შემდეგ: დაკავდით მეორეხარისხოვანი, რუტინული საქმეებით, რომლებიც დიდ კონცენტრაციას არ მოითხოვს. საღამოს კი იოგა ან მედიტაცია საუკეთესოა ძალების აღსადგენად.
  
  

2. ღამურა

თუ დილით გონების გახსნა გიჭირთ, ნუ დასჯით საკუთარ თავს სიზარმაცის განცდით. თქვენი დრო ნაშუადღევს მოდის.

• 08:00 – 12:00: დაკავდით მარტივი ადმინისტრაციული დავალებებით, უპასუხეთ მეილებს ან დაგეგმეთ კვირის სტრატეგია. თქვენი ორგანიზმი ამ დროს ჯერ კიდევ „ირთვება“.

• 13:00 – 18:00: ეს იდეალური დროა ძირითადი დატვირთვისთვის. ნებისმიერი რთული საქმე ამ მონაკვეთში ბევრად სწრაფად მოგვარდება.

• 18:00-ის შემდეგ: მიუხედავად იმისა, რომ ენერგია ჯერ კიდევ გაქვთ, მოერიდეთ ტელევიზორთან ან ტელეფონთან დიდხანს ჯდომას. სჯობს, ეს ენერგია სპორტდარბაზში დახარჯოთ, რომ სტრესი მოიხსნათ.
  
  

3. მტრედი

ეს ყველაზე დაბალანსებული ქრონოტიპია, რომლისთვისაც სტანდარტული 9-დან 6-მდე გრაფიკი მეტ-ნაკლებად მისაღებია.

• თანაბარი დატვირთვა: გადაანაწილეთ საქმეები ბლოკებად - 60 წუთი მუშაობა, 20 წუთი შესვენება.

• 14:00 – 16:00: ტრადიციულად, ამ დროს დაღლილობა გეტყობათ. ეცადეთ, ეს ორი საათი მსუბუქ დავალებებს დაუთმოთ ან უბრალოდ წაიხემსოთ.

• 17:00-ის შემდეგ: ნელ-ნელა შეამცირეთ ტემპი და სამუშაო დღე მცირე გასეირნებით დაასრულეთ.

საკუთარი შინაგანი რიტმის ცოდნა არც ფუფუნებაა და არც დროებითი ტრენდი - ეს არის ჯანსაღი დამოკიდებულება საკუთარი თავის მიმართ. თუ გაქვთ შესაძლებლობა, თუნდაც მცირედით შეცვალოთ თქვენი დღის განრიგი, აუცილებლად სცადეთ. შედეგს პროდუქტიულობასა და განწყობაზე მალევე იგრძნობთ!