როცა გარეთ აუტანელი სიცხეა, ჩვენი პირველი ინსტინქტი ყინულიანი წყლის დალევაა. თუმცა, აღმოჩნდა, რომ ორგანიზმის ჰიდრატაციისთვის (წყლის ბალანსის შესანარჩუნებლად) არსებობს უფრო ეფექტური იარაღიც. როგორც ექიმები ამბობენ, თურმე წყალზე მეტად ორგანიზმს რძე ატენიანებს.

რატომ მაინცდამაინც რძე?

შეიძლება უცნაურად ჟღერს, მაგრამ ექსპერტის განმარტებით, რძე გაუწყლოებას წყალზე უკეთ უმკლავდება. აი, რატომ:

• ნელი შეწოვა: რძე შეიცავს შაქარს (ლაქტოზას), ცილებსა და ცხიმებს. ეს შემადგენლობა ანელებს კუჭის დაცლის პროცესს, რის გამოც სითხე ორგანიზმიდან მომენტალურად კი არ გამოიყოფა, არამედ დიდხანს რჩება მასში.

• მინერალების ბალანსი: რძეში არის ნატრიუმი, რომელიც „აკავებს“ წყალს ორგანიზმში და არ აძლევს მას ოფლთან ერთად სწრაფად დაკარგვის საშუალებას.

ალტერნატივა ვეგანებისთვის: თუ ცხოველურ რძეს არ სვამთ, ექიმი გვირჩევს სოიოს რძეს. ის მდიდარია ელექტროლიტებით, რომლებიც სიცხეში წყლის ბალანსის აღდგენას ეხმარება.

კიდევ რა დავლიოთ და ვჭამოთ სიცხეში?

თუ რძე ცხელ ამინდში თქვენთვის მაინც მძიმე პროდუქტია, ექსპერტები სხვა საინტერესო ალტერნატივებსაც გვთავაზობენ:

• ქოქოსის წყალი – ბუნებრივი ელექტროლიტების ნამდვილი ბომბი.

• კიტრი და კიტრის წვენი – შედგება თითქმის 95% წყლისგან და შესანიშნავად აგრილებს.

• საზამთრო – ზაფხულის კლასიკა, რომელიც გემრიელადაც განაყრებთ და სითხითაც აგავსებთ.

როგორ მივხვდეთ, რომ ორგანიზმს წყალი აკლია?

გაუწყლოება (დეჰიდრატაცია) ჩუმად გვეპარება. აუცილებლად მიაქციეთ ყურადღება ამ სიმპტომებს:

• ძლიერი წყურვილი და პირის სიმშრალე

• იშვიათი ტუალეტი და მუქი ყვითელი შარდი

• თავბრუსხვევა, ქრონიკული დაღლილობა და მშრალი ტუჩები

მნიშვნელოვანია: თუ საქმე რთულ სიმპტომებამდე მივიდა (გონების არევა, ძლიერი ძილიანობა, გულისცემის აჩქარება), სასწრაფოდ მიმართეთ ექიმს! მანამდე კი, მიირთვით სითხე მცირე ყლუპებით და ხშირად.