ზაფხულის მიწურულს სტრიმინგ-პლატფორმები საინტერესო სიახლეებსა და საყვარელი შოუების გაგრძელებას გვთავაზობენ.

წელს უკვე არაერთი კარგი სერიალი ვიხილეთ. იანვარში ეკრანებს დაუბრუნდა „პიტის საავადმყოფო“ და „ინდუსტრია“, გამოვიდა „სამეფო კარის თამაშების“ ახალი ისტორიაც - „შვიდი სამეფოს რაინდი“. „ბრიჯერტონების“ მეოთხე სეზონმა საერთოდ ააფეთქა სოციალური ქსელები.

ზაფხულობით კინოსამყაროში ჩვეულებრივ სიწყნარეა ხოლმე - ყველანი შემოდგომის დიდ პრემიერებს ელოდებიან. თუმცა, რეჟისორებმა არც აგვისტოში დაგვტოვეს საინტერესო სანახაობის გარეშე. აი, 5 სერიალი, რომელსაც ზაფხულის ბოლოს უნდა ადევნოთ თვალი:

1. „ტედ ლასო“ (Ted Lasso)

Apple TV-ს პოპულარული კომედია ფეხბურთის მწვრთნელზე ბრუნდება! მთავარ როლში კვლავ ჯეისონ სუდეიკისს ვიხილავთ. გადაღებები გასულ წელს დაიწყო და მაყურებელი კვლავ შეხვდება ყველა საყვარელ პერსონაჟს. მთავარი სიახლე კი ის არის, რომ ამჯერად ტედ ლასო „რიჩმონდის“ ქალთა საფეხბურთო გუნდს გაწვრთნის. მე-4 სეზონი ეკრანებზე მსოფლიო ჩემპიონატის დასრულებისთანავე გამოვა.

2. „სტერლინგ პოინტი“ (Sterling Point)

ეს გახლავთ ახალი ახალგაზრდული დრამა, რომლის პრემიერაც 5 აგვისტოს Prime Video-ზე შედგება. სიუჟეტის ცენტრშია 17 წლის ენი, რომელიც ნიუ-იორკში, ტყუპ ძმასთან და საყვარელ მამინაცვალთან ერთად გაიზარდა. გოგონას ცხოვრება რადიკალურად იცვლება, როცა ბაბუისგან მემკვიდრეობით იღებს საიდუმლოებით მოცულ კუნძულს კანადაში. ახალ გარემოში ის იძენს მეგობრებს, პოულობს სიყვარულს და თავისი ოჯახის ფარულ წარსულს ახდის ფარდას.

3. „ფარნები“ (Lanterns)

სუპერგმირული დეტექტივი ეკრანებზე 16 აგვისტოს გამოვა. სერიალი ორ პოლიციელზე მოგვითხრობს, რომლებიც ამერიკის პატარა ქალაქში მომხდარ მკვლელობას იძიებენ. ჩვეულებრივი დანაშაულის მიღმა ისინი გაცილებით მასშტაბურ და ბნელ შეთქმულებას წააწყდებიან.

4. Outer Banks

სერიალის თაყვანისმცემლებს მეხუთე, დასკვნითი სეზონი ელოდებათ, რომელიც 20 აგვისტოს გამოვა. განძის ძიების პარალელურად, მთავარ გმირებს საკმაოდ მძიმე გამოცდა ელით - მათ უნდა იძიონ შური თავიანთი მეგობრის მკვლელობაზე, რომელიც გასული სეზონის ფინალში საკუთარმა მამამ მოკლა.

5. „ნამსხვრევები“ (Shards)

ეს სერიალი 1981 წლის ლოს-ანჯელესში გადაგვიყვანს. ის მოგვითხრობს მდიდარი ოჯახების შვილებზე, რომლებიც პრესტიჟულ კერძო სკოლაში სწავლობენ. მთავარი გმირი, სკოლის მოსწავლე ბრეთი, გამოსაშვებ წელს ფუფუნებაში, წვეულებებსა და უდარდელობაში ატარებს. თუმცა, ყველაფერი იცვლება, როდესაც მათ კლასში ახალი მოსწავლე გადმოდის, რომელსაც ბნელი წარსული და საშიში საიდუმლოებები ახლავს.