ხანდახან ყველაზე მეტად, რაც გვჭირდება, ერთი გემრიელი ყავა, თბილი პლედი და ისეთი ისტორიაა, რომელიც პირველივე წუთიდან ჩაგვითრევს. მინი-სერიალები სწორედ ამისთვის შეიქმნა - ისინი არ გვავალდებულებენ თვეები ველოდოთ ახალ სეზონს, პირიქით, რამდენიმე საათში მთელ ცხოვრებას გვაჩვენებენ.

დღეს იმ სერიალებზე გიამბობთ, სადაც ქალები არიან მთავარი გმირები: ძლიერები, სუსტები, შეცდომებითა და დიდი ამბიციებით. მოემზადეთ, ეს სია თქვენს “Watchlist“-ს აუცილებლად დაამშვენებს

1. სირენები - Sirens

Netflix-ის ეს ახალი ჰიტი შავი კომედიისა და დრამის იდეალური ნაზავია. სიუჟეტი სამ ქალზეა, რომლებიც ფუფუნებაში ცხოვრობენ, თუმცა მათი ცხოვრება შორსაა იდეალურისგან. სერიალი საინტერესოდ ეხება ქალების მიმართ საზოგადოების მოლოდინებსა და იმ "ნიღბებს", რომელთა ტარებაც ყოველდღიურად გვიწევს.

2. ყველაფერი მისი ბრალია - All Her Fault

თუ ფსიქოლოგიური თრილერები გიყვართ, ეს სერიალი თქვენთვისაა. სარა სნუკი (Succession-ის ვარსკვლავი) განასახიერებს დედას, რომლის შვილიც მოულოდნელად ქრება. ეს არის ამბავი დანაშაულის გრძნობაზე, დედობრივ ინსტინქტსა და იმ საიდუმლოებზე, რომლებიც ყველაზე ახლო მეგობრებსაც კი შეიძლება ჰქონდეთ.

3. ვაშლის ძმარი - Apple Cider Vinegar

ეს არის "თითქმის ნამდვილი ამბავი, რომელიც ტყუილზეა დაფუძნებული". სერიალი მოგვითხრობს გოგონაზე, რომელიც სოციალურ ქსელში Wellness-ინფლუენსერი ხდება და ამტკიცებს, რომ მძიმე სენი ჯანსაღი კვებით დაამარცხა. ისტორია ამბიციაზე, პოპულარობის წყურვილსა და იმ ზღვარზეა, რომელსაც ქალები წარმატებისთვის გადააბიჯებენ.

4. დიდი პატარა ტყუილები - Big Little Lies

კლასიკა, რომელიც trend.ge-ს სიაში ყოველთვის უნდა იყოს. რამდენიმე ქალის გადაჯაჭვული ბედი, საოცარი ესთეტიკა და მძიმე თემები -ოჯახური ძალადობიდან დაწყებული, ქალური სოლიდარობით დასრულებული.

5. სექსის მოლოდინში - Dying for Sex

მიშელ უილიამსი ასრულებს ქალის როლს, რომელიც მძიმე დიაგნოზის შემდეგ გადაწყვეტს, ცხოვრების დარჩენილი ნაწილი საკუთარი სექსუალობისა და სურვილების შესწავლას დაუთმოს. ეს არის ძალიან გულწრფელი, სევდიანი და ამავდროულად სიცოცხლის მოყვარული სერიალი ქალის სხეულსა და თავისუფლებაზე.

6. ემიგრანტები - Expats

ჰონგ-კონგის ფონზე გაშლილი სამი ქალის ისტორია. ნიკოლ კიდმანის გმირი ცდილობს გაუმკლავდეს ოჯახურ ტრაგედიას. სერიალი საოცარი ვიზუალით გვიჩვენებს, როგორ შეუძლია ერთმა შემთხვევამ სამუდამოდ შეცვალოს სრულიად უცხო ქალების ბედი.

7. ტოქსიკური ქალაქი - Toxic Town

რეალურ ამბავზე დაფუძნებული დრამა დედებზე, რომლებიც სამრეწველო დაბინძურების წინააღმდეგ იბრძვიან თავიანთი შვილების გადასარჩენად. ეს არის სერიალი ქალების ძალაზე, რომლებსაც შეუძლიათ სისტემა შეცვალონ.

8. გაკვეთილები ქიმიაში - Lessons in Chemistry

50-იანი წლების ამერიკა და ნიჭიერი ქალი-ქიმიკოსი, რომელიც სამზარეულო შოუს მეშვეობით ქალებს არა მხოლოდ რეცეპტებს, არამედ საკუთარი უფლებებისთვის ბრძოლას ასწავლის. ესთეტიკური და შთამაგონებელი სანახაობაა.

9. მოსამსახურე - Maid

ამბავი ახალგაზრდა დედაზე, რომელიც ტოქსიკურ ურთიერთობას გაურბის და ცდილობს, შვილს უკეთესი მომავალი შეუქმნას. სერიალი საოცრად რეალისტურად გვიჩვენებს იმ სირთულეებს, რასაც მარტოხელა დედები აწყდებიან.

10. მხეცი ჩემში - The Beast In Me

კლერ დეინსი ასრულებს მწერალი ქალის როლს, რომელიც შვილის დაკარგვის შემდეგ ჩაკეტილ ცხოვრებას ეწევა, თუმცა მეზობლად დასახლებული იდუმალი მამაკაცი მასში ინტერესს აღვიძებს. ეს არის დაძაბული თრილერი ტრავმასა და გადარჩენაზე.