მოკრძალებული შემოსავალი მნიშვნელოვნად ზღუდავს ჩვენს შესაძლებლობებს და ხელს გვიშლის ყოველდღიური სურვილების თუ სანუკვარი ოცნებების ასრულებაში.

ჩვენ გეტყვით, როგორ დაზოგოთ და დააგროვოთ ფული გონივრულად.

დაისახეთ მიზანი

თუ დაზოგავთ მხოლოდ იმისთვის, რომ უბრალოდ ფული გქონდეთ, დაზოგვა ძალიან გაგიჭირდებათ, რადგან ეს ზედმეტად ბუნდოვანი ფორმულირებაა, რომელიც არ იწვევს ადამიანის შთაგონებას. უმჯობესი იქნება გადაწყვიტოთ რისი შეზღუდვა გსურთ გარკვეული ხნით - მაგალითად, თქვენი მიზანია იპოთეკით სახლის შეძენა, რომელიც ბევრ პრობლემას მოგიგვარებთ; ან დიდი ხნის ნანატრი შვებულება, რომელიც გადაგტვირთავთ და მოგცემთ ახალ ძალას, ან ინსტიტუტში სწავლის საფასურის გადახდა; გადამზადების კურსების გავლა, რაც დაგეხმარებათ რადიკალურად შეცვალოთ თქვენი საქმიანობის სფერო და მეტი შემოსავალი მიიღოთ.

ფინანსური უსაფრთხოების განცდა დაბალი ხელფასით ძნელია, ამიტომ აუცილებელია დაისახოთ რაიმე დიდი მიზანი და ისწრაფოთ მის განსახორციელებლად.

შეადგინეთ გეგმა

რა ღირს თქვენი ოცნება? - დათვალეთ. ვთქვათ, ზღვაზე მოგზაურობისთვის 3000 ლარი გჭირდებათ, თქვენი შემოსავალი კი 1500 ლარია ყოველთვიურად - სცადეთ გახსნათ ანაბარი და თვეში 300 ლარის  გამოყოფით 10 თვეში მზად იქნებით ჩაალაგოთ ჩემოდანი, დარჩენილი ხელფასი კი გონივრულად გადაანაწილეთ.
ცხადია ამ დროის განმავლობაში ბევრი ცდუნება გექნებათ, მაგრამ როცა კონკრეტული გეგმა გექნებათ და თან ანაბრის ვალდებულებაც, მეტად მოინდომებთ.
მნიშვნელოვანია, მთლიანად არ დათმოთ წვრილმანი სიამოვნებები, ეს წარუმატებელი სტრატეგიაა და ასე შეიძლება ცხოვრების ხალისი დაკარგოთ - თუ გიყვართ კონცერტებზე ან რესტორნებში სიარული, შიგადაშიგ მიეცით თავს ამის უფლებაც, მაგრამ სანაცვლოდ სხვა ხარჯები შეამცირეთ.
დაზოგვა უნდა იყოს მაქსიმალურად უმტკივნეულო თქვენი ფსიქოლოგიური მდგომარეობისთვის.

გამოთვალეთ ხარჯები

როგორც კი ამას ჩვევად აქცევთ, ნათლად მიხვდებით სად დახარჯეთ ფული, რა ხარჯებს უნდა მიაქციოთ ყურადღება და ოპტიმიზაცია გაუწიოთ მათ.
გამოთვალეთ ხარჯები კვირაში რამდენჯერმე; შეგიძლიათ გაააქტიუროთ აპლიკაცია ტელეფონზე, რათა თვალყური ადევნოთ ხარჯებს - ეს დაგეხმარებათ არაფერი გამოტოვოთ და არ დაუშვათ შეცდომები სამომავლოდ.

რაზე დაზოგოთ ფული?

მოერიდეთ საკვების მიტანის სერვისებს, რესტორნებსა და კაფეებს. თავად შეიძინეთ ჯანსაღი პროდუქტები მაღაზიებში და თავად მოამზადეთ.
იპოვეთ პროდუქტის საბითუმო ობიექტები, დაუკავშირდით მეგობრებს და პერიოდულად ერთად წადით საყიდლებზე. იდეალურია, თუ დაგეგმავთ მთელი კვირის მენიუს, ყველა საჭირო ინგრედიენტების გათვალისწინებით.
ტანსაცმელი და სხვა სეზონური ნივთები შეიძინეთ უმეტესად არასეზონზე. მაგ.: ველოსიპედი ზამთარში, ქურთუკი ზაფხულში.



არ გააკეთოთ სპონტანური შესყიდვები. ყოველთვის წადით მაღაზიაში სიით. არ იყიდოთ არაფერი, რაც არ გჭირდებათ, თუნდაც დიდი ფასდაკლებით გადააწყდეთ, მაგრამ თუ სახლში მოდიხართ და ვერ იძინებთ რაიმე კონკრეტული ნივთის შეძენის სურვილით, მაშინ აუცილებლად წადით მეორე დღეს და შეიძინეთ.
ხშირად ეწვიეთ მეორადი ნივთების მაღაზიებს, იქ  იპოვით აბსოლუტურად ახალ ნივთებს მაღაზიის ფასის ნახევრად. ასევე შეგიძლიათ გაყიდოთ თქვენი ნივთები ინტერნეტით, მიიღოთ დამატებითი შემოსავალი და ამავდროულად გაათავისუფლოთ გარკვეული სივრცე სახლში.
ნუ მოგატყუებთ ბრენდები, გადაჭარბებული ფასები დიდი სახელების მწარმოებლებისთვის ხშირად არაადეკვატურია. დღეს ყველა შესაძლებლობაა, იპოვოთ მსგავსი ხარისხის პროდუქტი ნაკლებად ცნობილი ბრენდებისგან და დაზოგოთ სოლიდური თანხა.

შეიძინეთ აპლიკაციების საშუალებით

შეიძინეთ აპლიკაციების საშუალებით. ყველაფერი უფრო ძვირია ოფლაინში, ასე რომ, შეგიძლიათ ფიზიკურად ნახოთ და დაათვალიეროთ ნივთი, შემდეგ კი შეიძინოთ იგი ონლაინ მაღაზიაში ბევრად იაფად.
თვალი ადევნეთ აქციებს, თითქმის ყველა მაღაზია გვთავაზობს ამას. შეადგინეთ სია, საიდანაც ხშირად ყიდულობთ, დარეგისტრირდით და მიიღეთ სიახლეები სხვადასხვა მაღაზიებისგან. ნუ უგულებელყოფთ ბონუს ბარათებს: მართალია მათგან სარგებელი მინიმალურია, მაგრამ ყველგან მცირეოდენი დაზოგვით, საბოლოოდ დაზოგავთ მნიშვნელოვან თანხას.
ბევრი ადამიანი გულდასმით ემზადება „შავი პარასკევისთვის“ - რა თქმა უნდა, ბევრი მაღაზია ამ დღეს რეალურად არ ამცირებს ფასებს, მაგრამ თუ წინასწარ შეარჩევთ საჭირო ნივთს და გაარკვევთ მის საწყის ღირებულებას, მიხვდებით გიღირთ თუ არა მისი შეძენა.

დაზოგეთ კომუნალურები

დაზოგეთ წყალი და ელექტროენერგია, ნუ გახარჯავთ მათ არასაჭიროებისამებრ და გადაიხადეთ ყველა გადასახადი ერთდროულად.
გადახედეთ მობილური კომუნიკაციების, ინტერნეტის ტარიფებს: საკომუნიკაციო სერვისები სწრაფად იაფდება და წლების განმავლობაში ერთსა და იმავე ტარიფზე დარჩენა მიზანშეწონილი არ არის.

როგორ დააგროვოთ ფული ბანკის დახმარებით?

შექმენით შემნახველი ანგარიში საბანკო აპლიკაციაში. ეცადეთ რეგულარულად შეიტანოთ მცირე თანხები მასში. ამ შემთხვევაში, ფული საიმედოდ არის დაცული და მისი გამოყენება შესაძლებელია რამდენიმე წამში.
ალტერნატიული ვარიანტია თანხის დეპოზიტზე გადატანა: ამ შემთხვევაში, ვერ შეძლებთ მის მოხმარებას გარკვეული პერიოდის განმავლობაში, მაგრამ მიიღებთ პროცენტის წლიურ ზრდას.

ხშირად გამოიყენეთ ქეშბექ აპლიკაცია, ზოგჯერ ბრენდული მაღაზიები და პროვაიდერი ბანკები ერთობლივად საკმაოდ მაღალ ქეშბექს გვთავაზობენ, რაც ჩვენს ფინანსებს სოლიდურ შეღავათს უწევს.
მოითმინეთ, დაზოგეთ და ინებივრეთ!