„უბრალოდ მოიქეცით ისე, თითქოს არ გაინტერესებთ. დაიწყეთ ფლირტი სხვასთან - მიეცით საშუალება, რომ დაგედევნოთ!“ - მსგავსი ფრაზები ალბათ ბევრს გსმენიათ, მაგრამ ცოტამ თუ იცის, რომ ეჭვიანობის მანიპულირება ურთიერთობის დანგრევის პირველი ნაბიჯია.

TREND გიზიარებთ, რატომ არ არის ეჭვიანობის მანიპულირება საუკეთესო იდეა.

მოკლევადიანი შედეგები

დიახ, შესაძლებელია, რომ მამაკაცმა უფრო ხშირად დარეკოს, უფრო ეჭვიანობდეს და „იბრძოლოს“ თქვენი ყურადღებისთვის, მაგრამ არც კი იფიქროთ, რომ დაკარგვის შიშით მისი სიყვარული უფრო ძლიერი იქნება. თუ მამაკაცი მხოლოდ საკუთარი მყიფე ეგოს დანგრევის შიშით არ განებებთ თავს, ასეთი ურთიერთობა ისედაც განწირულია.

პარტნიორის უნდობლობა

ეჭვის საფუძვლის განზრახ შექმნით, ურთიერთობას სერიოზულ საფრთხეს უქმნით. ერთხელ დარღვევის შემდეგ ნდობის აღდგენას შეიძლება წლები დასჭირდეს, რის შემდეგაც ნებისმიერი არასწორი ნაბიჯი მას ანადგურებს.

განშორების რისკი

წარმოიდგინეთ, რომ პარტნიორი თქვენს თამაშში არ ერთვება - ის უბრალოდ დგება და მიდის. თავდაჯერებული მამაკაცებისთვის ასეთი ქცევა გამოწვევის ნაცვლად, წითელი ხაზებია. ისინი მიუთითებენ უმწიფრობაზე და პრობლემების პირდაპირ გადაჭრის უუნარობაზე. ამიტომაც, ამ ნაბიჯით არა ვნების ტალღა, არამედ იმედგაცრუება და ინტერესის დაკარგვა შეიძლება განიცადოთ მამაკაცისგან.

თვითშეფასების განადგურება

მანიპულირება ყოველთვის სისუსტისა და უძლურების ნიშანია. თითქოს აღიარებთ: „მე ვერ ვიღებ იმას, რაც მინდა, ამიტომ უნდა მოვიტყუო“ - ეს ქმნის მანკიერ წრეს, რომელშიც რაც უფრო მეტს მანიპულირებთ, მით ნაკლებად ღირებულად გრძნობთ თავს.

ორმხრივი მანიპულირება

ხშირად ურთიერთობებში, ერთმანეთის ქცევას სარკისებურად ვიმეორებთ. თუ კოლეგასთან ფლირტს დაიწყებთ, პარტნიორსაც იგივეს გაკეთების უფლებას აძლევთ. შედეგად, ასეთი ურთიერთობები პარტნიორობის ნაცვლად მუდმივ ბრძოლად იქცევა და რაც მთავარია, ეს პრობლემას უფრო ამწვავებს.

როგორ გავაუმჯობესოთ ურთიერთობები ეჭვიანობის მანიპულირების გარეშე

ისწავლეთ პრობლემებზე საუბარი
ჯანსაღი ურთიერთობისთვის დიალოგი ერთადერთი სწორი გზაა. თუ მამაკაცისგან ყურადღება და სითბო გაკლიათ, პირდაპირ გამოხატეთ ეს: „შენი ყურადღება მაკლია და ეს მწყინს, როგორ ფიქრობ, შაბათ-კვირა ქალაქგარეთ ერთად რომ გავატაროთ?“ - ასეთი ფრაზები ბრალდებებს არ გადმოსცემს და ღია დიალოგს იწვევს.

გააანალიზეთ გრძნობები

ეჭვიანობით ურთიერთობის გამოცდის სურვილი ხშირად არა წყვილში არსებულ პრობლემებზე, არამედ ჩვენს შინაგან დაუცველობაზე მიუთითებს. ამიტომ, თუ ხშირად შფოთავთ, გირჩევთ, ფსიქოლოგთან იმუშაოთ, ვიდრე პარტნიორზე იმანიპულიროთ.

კონფლიქტის ნაცვლად ეძებეთ გამოსავალი

სხვასთან ფლირტის იმიტაციის ნაცვლად, უბრალოდ შესთავაზეთ ისეთი რამ, რაც დაგაახლოებთ. მაგალითად, უთხარით: „წავიდეთ იმ კონცერტზე/გამოფენაზე/ფილმზე, რომელზეც ვფიქრობდით“ ან „მოდი, უბრალოდ ვისაუბროთ“ - ამ გზით, თქვენს ენერგიას არა კონფლიქტში, არამედ კავშირის განმტკიცებაში დახარჯავთ.

იმუშავეთ თვითშეფასებაზე

ვინმეს გრძნობების „დადასტურების“ საჭიროება ხშირად დაბალი თვითშეფასების ნიშანია, ამიტომ ფუჭად ნუ დახარჯავთ ენერგიას და ეცადეთ თავად გახდეთ თავდაჯერებულობის მთავარი წყარო, რადგან როდესაც საკუთარ ღირებულებაში დარწმუნებული ხართ, აღარ გჭირდებათ სხვებისგან მუდმივად დადასტურება.

რაც არ უნდა იყოს, გახსოვდეთ, გულწრფელობა და გახსნილობა სიყვარულის მთავარი საფუძველია. თუ ურთიერთობაში პრობლემებია, ნუ შენიღბავთ მათ ცრუ ემოციებით და გახსოვდეთ, ნამდვილი სიყვარული არის ის, როდესაც არაფრის მტკიცება არ გჭირდებათ.