ასაკის მატება ცვლილებების პროცესია. ამ პერიოდში უკეთ ვიაზრებთ საკუთარ სურვილებსა და პრიორიტეტებს, თუმცა წარსულზე ფიქრს ზოგჯერ სინანულიც ახლავს.

მილენიალებისთვის, რომლებიც 45 წლის ასაკს უახლოვდებიან, ცხოვრების ამ ეტაპზე გადასვლა მხოლოდ კარიერულ და მატერიალურ მიზნებს არ უკავშირდება. მნიშვნელოვანია საკუთარი თავის მიღება, შეცდომებთან შეგუება და შინაგანი სიმშვიდის პოვნა.

აი, 11 რამ, რაც ცხოვრების ახალ ეტაპს სინანულის გარეშე შეგახვედრებთ.

1. იყავით საკუთარი თავის ერთგული

მილენიალების თაობამ ახალგაზრდობის დიდი ნაწილი სოციალურ ქსელებში გაატარა, სადაც ხშირად ცხოვრების იდეალიზებულ სურათს ვხედავთ. ამიტომ მნიშვნელოვანია, უარი თქვათ სხვებისთვის შექმნილ იმიჯზე და მიიღოთ საკუთარი ნამდვილი სახე.

ფსიქოლოგ კორტნი უორენის განმარტებით, ავთენტურობა ნიშნავს, იყო საკუთარი თავის ერთგული და იმოქმედო საკუთარი ღირებულებების შესაბამისად. ამისთვის საჭიროა, იცოდეთ, რა არის თქვენთვის მნიშვნელოვანი, მიიღოთ ძლიერი და სუსტი მხარეები და დააფასოთ საკუთარი ინდივიდუალობა.

2. შეცდომები გამოცდილებად აქციეთ

წარსულ შეცდომებზე მუდმივი ფიქრი ხელს გვიშლის, დავინახოთ ის მცირე გამარჯვებები, რომლებსაც წლების განმავლობაში მივაღწიეთ.

განვითარების ფსიქოლოგის, დებორა ჰაიზერის თქმით, ადამიანის ემოციური ცხოვრება კმაყოფილებასა და სინანულს შორის მერყეობს. კმაყოფილებას მაშინ ვგრძნობთ, როცა ჩვენს ცხოვრებას აზრი აქვს და ჯანსაღ ურთიერთობებში ვართ ჩართული. სინანული კი ჩნდება მაშინ, როცა ვფიქრობთ, რომ წარსულში რაღაც უკეთ შეგვეძლო გაგვეკეთებინა.

თუმცა მაშინ იმ ცოდნითა და შესაძლებლობებით ვმოქმედებდით, რომლებიც იმ მომენტში გვქონდა. ამ ფაქტის მიღება წარსულთან შეგუებასა და განვითარებაში გვეხმარება.

3. მოითხოვეთ თქვენი შრომის შესაბამისი ანაზღაურება

სამსახურით კმაყოფილებისთვის ფული ერთადერთი ფაქტორი არ არის, თუმცა მნიშვნელოვანი ადგილი უჭირავს. ხშირად საკუთარი თავის დაბალი შეფასება შემოსავალზეც აისახება - გვგონია, რომ მეტს არ ვიმსახურებთ და სათანადო ანაზღაურებასაც არ ვითხოვთ.

ჰარვარდის ბიზნესსკოლის რეკომენდაციით, მნიშვნელოვანია იცოდეთ საკუთარი ფასი, დამსაქმებელს კი აჩვენოთ, რა წვლილი შეგაქვთ კომპანიაში და რას შეძლებთ მომავალში.

მოლაპარაკებამდე განსაზღვრეთ სასურველი ანაზღაურება და ის ზღვარი, რომლის ქვემოთაც დათმობაზე წასვლა არ გიღირთ.

4. შეიყვარეთ საკუთარი თავი

საკუთარი სურვილებისა და ღირებულებების შესაბამისად ცხოვრება რთულია, თუ საკუთარ თავს არ იღებთ. ცხოვრების ამ ეტაპზე გაქვთ შესაძლებლობა, თავიდან განსაზღვროთ პრიორიტეტები და გადაწყვიტოთ, როგორ გსურთ მომდევნო წლების გატარება.

5. ნუ მოითხოვთ საკუთარი თავისგან სრულყოფილებას

მილენიალების ბევრი წარმომადგენელი იმ გარემოში გაიზარდა, სადაც შრომისმოყვარეობა წარმატებისა და ბედნიერების მთავარ პირობად მიიჩნეოდა. განსაკუთრებით ქალებს ხშირად ასწავლიდნენ, რომ მათი ღირებულება პროდუქტიულობითა და მიღწევებით განისაზღვრებოდა.

თუმცა მაღალი მიზნების დასახვასა და სრულყოფილების მუდმივ მოთხოვნას შორის ზღვარი არსებობს. სრულყოფილებისკენ სწრაფვამ შესაძლოა სიამოვნება დაგაკარგვინოთ და ჩვეულებრივი მიზნებიც გადაულახავ დაბრკოლებად აქციოს.

6. იზრუნეთ საკუთარ თავზე რეგულარულად

მილენიალების თაობამ თავის მოვლა ხშირად ფუფუნებასთან დააკავშირა — ძვირადღირებულ კოსმეტიკასთან, სასიამოვნო აბაზანასთან და სხვა მცირე სიამოვნებებთან.

თუმცა საკუთარ თავზე ზრუნვა მხოლოდ ამით არ შემოიფარგლება. ის ემოციურ მდგომარეობაზე ზრუნვასაც გულისხმობს. შეარჩიეთ ისეთი ჩვევები, რომელთა შენარჩუნებაც შეგიძლიათ და რომლებიც თქვენს საჭიროებებს შეესაბამება.

7. შეამცირეთ შინაგანი კრიტიკოსის გავლენა

დააკვირდით, როდის იწყებთ საკუთარი თავის მკაცრ კრიტიკას. ასეთ დროს ეცადეთ, საკუთარ თავს მეტი თანაგრძნობით მოექცეთ. შინაგანი კრიტიკოსი შესაძლოა ბოლომდე არ გაქრეს, მაგრამ მისი გავლენის შემცირება შესაძლებელია.

8. დაიცავით პირადი საზღვრები

დაახლოებით 40 წლის ასაკში განსაკუთრებით მნიშვნელოვანია იმის გააზრება, რომ დრო და ენერგია ძვირფასი რესურსებია. მათი ყველასთვის დათმობა აუცილებელი არ არის.

დაფიქრდით, რა გეხმარებათ დასვენებაში და რისთვის გჭირდებათ ყოველდღიურად დრო. შესაძლოა, კვირა დილით რამდენიმე საათი მხოლოდ საკუთარი თავისთვის გინდოდეთ ან კვირის შუაში იოგას გაკვეთილზე სიარული გსიამოვნებდეთ.

ასევე შეზღუდეთ ურთიერთობა იმ ადამიანებთან, რომლებიც თქვენს ნდობას არღვევენ, დისკომფორტს გიქმნიან ან ემოციურად გფიტავენ.

9. იმოგზაურეთ მარტო

მარტო მოგზაურობა საკუთარ თავთან უფრო ახლოს გაცნობის შესაძლებლობაა. ახალი ადგილების დამოუკიდებლად აღმოჩენა გეხმარებათ, სხვაგვარად შეხედოთ სამყაროს, მართოთ მოლოდინები და გაუმკლავდეთ მოულოდნელ სირთულეებს.

ამისთვის აუცილებელი არ არის ძვირადღირებული მოგზაურობა. შეგიძლიათ, რამდენიმე საათით ახლომდებარე ქალაქში წახვიდეთ ან საკუთარ ქალაქში მარტო გაისეირნოთ და ნაცნობ ადგილებს ტურისტის თვალით შეხედოთ.

10. ნუ შეგეშინდებათ ემოციების გამოხატვის

მილენიალების ახალგაზრდობის პერიოდში პოპულარული იყო ირონიული დამოკიდებულება და ემოციების დამალვა. ხშირად უფრო მნიშვნელოვანი იყო, სხვების თვალში თავდაჯერებული და უდარდელი გამოჩენილიყავი.

თუმცა ასაკის მატებასთან ერთად სასარგებლოა ამ ჩვევის შეცვლა. საკუთარი სისუსტეებისა და ემოციების გაზიარება ადამიანებთან უფრო ღრმა კავშირის დამყარებაში გვეხმარება.

11. მიიღეთ ადამიანი, რომელიც ხდებით

ასაკის მატებასთან ერთად სხეული, პრიორიტეტები და სურვილები იცვლება. ეს ბუნებრივი პროცესია და მასთან შეგუება ცხოვრების ახალი ეტაპის მიღების ნაწილია.

შესაძლოა, ახალგაზრდობის უდარდელი წლები გენატრებოდეთ, თუმცა მნიშვნელოვანია, ყურადღება აწმყოზე გადაიტანოთ, დააფასოთ განვლილი გზა და ინტერესით შეხედოთ მომავალს.

შუახნის ასაკი ცხოვრების დასასრული კი არა, სრულიად ახალი დასაწყისია.