მენოპაუზა არის ქალის ცხოვრების ნორმალური ეტაპი, როდესაც მას მენსტრუაციული ციკლი უწყდება და მის ორგანიზმში ჰორმონალური ცვლილებები იწყება.

ხშირად მენოპაუზის დაწყება ზედმეტ სტრესსა და დაბნეულობას უკავშირდება, რადგან ბევრი მითი თუ ტყუილ-მართალი გვესმის ამ თემის ირგვლივ. დროა დავამსხვრიოთ მითები და ცხოვრების ამ მნიშვნელოვან ეტაპს უფრო მშვიდად შევხვდეთ:

1. მენოპაუზის ასაკი

მენოპაუზის დაწყების რამე ფიქსირებული ასაკი არ არსებობს. ყველა ქალის ცხოვრებაში ეს სხვადასხვა დროს ხდება და განპირობებულია  რამდენიმე ფაქტორით, მათ შორის წამყვანია გენეტიკა, ცხოვრების წესი და ზოგადი ჯანმრთელობა. სასურველია იცოდეთ მენოპაუზის გამაფრთხილებელი ნიშნები და სიმპტომები და პირველი ნიშნებისას ისაუბროთ ექიმთან ამის შესახებ.

2. მენოპაუზა და ფსიქიკური ჯანმრთელობა

მენოპაუზა ხშირად ასოცირდება განწყობის ცვალებადობასთან და ემოციურ ცვლილებებთან, მაგრამ ეს არ არის ფსიქიკური ჯანმრთელობის კრიზისი. ამ მდგომარეობამ შეიძლება გამოიწვიოს სტრესის, შეშფოთების და თუნდაც მოწყენილობის განცდა. მნიშვნელოვანია, ამ დროს უპირატესობა მიანიჭოთ საკუთარი თავის მოვლას, საჭიროების შემთხვევაში მიმართოთ პროფესიონალ ფსიქოთერაპევტს და შეინარჩუნოთ პოზიტიური განწყობა. მენოპაუზა ასევე შეიძლება იყოს საკუთარი თავის აღმოჩენისა და პიროვნული ზრდის დრო.

3. წონის მატება

ამ პერიოდში წონის მატება გარდაუვალია და ეს მუდმივად რჩება ქალების საერთო პრობლემად, თუმცა მისი თავიდან აცილება შესაძლებელია. დიეტის დაცვა, რეგულარული ვარჯიში და ცხოვრების წესის ცვლილება ხელს შეუწყობს წონის მატების თავიდან აცილებას ან მართვას ცხოვრების ამ ფაზაში.

4. მენოპაუზა სექსუალური ცხოვრების დასასრულია?

ერთ-ერთი ყველაზე გავრცელებული მცდარი წარმოდგენა მენოპაუზის შესახებ არის ის, რომ თითქოს თქვენი სექსუალური ცხოვრება ახლა სრულდება. მენოპაუზამ შეიძლება გავლენა მოახდინოს სექსუალურ ჯანმრთელობაზე, მაგრამ ეს არ ნიშნავს, რომ ინტიმური ურთიერთობა დასრულდა. ამ პრობლემების გადასაჭრელად უამრავი სამკურნალო საშუალება არსებობს. ზოგიერთ ქალს შეიძლება ჰქონდეს ესტროგენის დაქვეითება, რამაც შეიძლება გამოიწვიოს სიმშრალე და ტკივილი საშოში. ამ საკითხის მოგვარება შესაძლებელია საშოში დამატენიანებელი საშუალებების გამოყენებითა და ვარჯიშებით.

5. ალები და ღამის ოფლიანობა

მენოპაუზის არასასიამოვნო ვაზომოტორული სიმპტომების მართვის სხვადასხვა გზა არსებობს, როგორიცაა ალები და ღამის ოფლიანობა. ალები, როდესაც სახე და სხეულის ზედა ნაწილი განიცდის უეცარ, ექსტრემალურ სიწითლეს და მხურვალებას, რაც ხშირად იწვევს დისკომფორტს. ღამის ოფლიანობის დროს კი შესაძლოა ღამე შექმნილმა დისკომფორტმა გაგაღვიძოთ, რაც მენოპაუზის ტიპური გვერდითი მოვლენაა.

როგორც წესი, მენოპაუზის თანმდევი სიმპტომები 4-6 წელი უფრო მკვეთრად გამოხატულია ხოლმე, შემდეგ კი ნელ-ნელა ყველა ქალი ეგუება ამ სიმპტომებს და ცხოვრებაც უფრო მარტივი ხდება.