გემრიელად ჭამა და ამასთან, წონაში დაკლებაც პლანეტის ქალების უდიდესი დილემაა, ამ გამოწვევის წინაშე დგანან ქალბატონები, რომლებიც ოცნებობენ გამხდარ ფიგურაზე, მაგრამ ამავდროულად არ შეუძლიათ უარი თქვან საყვარელ საკვებზე, განსაკუთრებით კი ღამით. რატომღაც, საკვები საღამოს საათებში უფრო გემრიელი და სასურველი ხდება.

ჩვენ გეტყვით, რა შეგიძლიათ მიირთვათ საღამოს თამამად ზედმეტი კილოგრამების მომატების შიშის გარეშე?

გამომცხვარი ვაშლი

რატომ არის ღუმელში გამომცხვარი ვაშლი კარგი ღამის შიმშილის დასაკმაყოფილებლად? პასუხი მარტივია - ახალი, ხრაშუნა და წვნიანი ვაშლი მადას აღვივებს. ამიტომ ვაშლის ღუმელში გამოცხობა ყოველთვის კარგი გადაწყვეტილებაა. უფრო მეტიც, თუ გამომცხვარ ვაშლს ცოტაოდენ თაფლს და დარიჩინს დაუმატებთ, ის ადვილად ჩაანაცვლებს ნებისმიერ დესერტს, ამასთან, ვაშლში შემავალი ნივთიერებები ხელს უწყობს მშვიდ ძილს.

სოკო

რა თქმა უნდა, არ უნდა მიირთვათ სოკო არაჟნის სოუსში ან შემწვარი კარტოფილით. უმჯობესია შემოიფარგლოთ მოხარშული ან ორთქლზე მოხარშული შამპინიონით. სხვათა შორის, თუ სოკოს ყველა წესის მიხედვით მოამზადებთ, შეგიძლიათ მიიღოთ დიეტური და ამავდროულად წარმოუდგენლად გემრიელი კერძები. თუმცა, დაკონსერვებულ სოკოსთან სიფრთხილე გმართებთ - მომზადებული პროდუქტის დიდმა რაოდენობამ შესაძლოა ნეგატიური გავლენა იქონიოს ღვიძლზე.

ნუში

ნუში ნოყიერი და ჯანსაღი პროდუქტია, ამიტომ ის საკმაოდ შესაფერისია საღამოსთვის. ნუში არამარტო შიმშილის დაკმაყოფილებაში დაგეხმარებათ, არამედ ორგანიზმს B ვიტამინებითა და მაგნიუმით მოამარაგებს. თუმცა ფრთხილად იყავით: იმისდა მიუხედავად, რომ ნუში ორგანიზმისთვის სასარგებლო ნივთიერებებით სავსეა, ის ასევე ძალიან კალორიულია, ამიტომ ეცადეთ დაიცვათ ზომიერება.

ქათმის მკერდის ხორცი

ასეთი ხორცი ყველაზე დიეტურია, ის შეიცავს დიდი რაოდენობით ცილას, რაც ხელს უწყობს სწრაფ დანაყრებას. ღუმელში გამომცხვარ ან უმარილოდ მოხარშულ მკერდის ხორცში ცხიმი პრაქტიკულად არ არის.
თუ გსურთ ღამით გემრიელი სენდვიჩი მიირთვათ, შეცვალეთ თქვენი საყვარელი ძეხვი ქათმის ხორცით და არ შეგეშინდეთ ზედმეტი კილოგრამების მომატების.

ფაფა

ფაფა შესანიშნავი საშუალებაა შიმშილის დასაკმაყოფილებლად, როგორც დილით, ასევე საღამოს. თუმცა, სასურველია ფაფა მოხარშოთ არა ცხიმიან რძეში, არამედ წყალში, მარილის და შაქრის გარეშე. მხოლოდ ამის შემდეგ იქნება ის სასარგებლო და ოდნავადაც არ მოუტანს ზიანს თქვენს ფიგურას.
თუ არ შეგიძლიათ უშაქროდ მიირთვათ, მაშინ შაქარი ჩაანაცვლეთ თაფლით ან ხილის ჩირით.

ნიახური

ამ პროდუქტის სასარგებლო თვისებები ცნობილია, თუმცა მისი სპეციფიკური გემო ყველას არ მოსწონს და ეს განსაკუთრებით ეხება უმ ნიახურს. თუმცა, ის აბსოლუტურად უკალორიო მწვანილია და მისი დიდი რაოდენობით მიღება არანაირ საფრთხეს არ წარმოადგენს თქვენი ფიგურისთვის. გარდა ამისა, ის შეიცავს წყალს და ბოჭკოს, რაც იმას ნიშნავს, რომ ის სწრაფად დაგანაყრებთ და მშვიდად დაიძინებთ.

სუში

რულეტის საშუალო ულუფა შეიცავს დაახლოებით 350 კილოკალორიას, ხოლო ცხიმის შემცველობა საკმაოდ დაბალია - 3,6 გრამი გთხოვთ გაითვალისწინოთ: სუში უნდა იყოს ახალი, ანუ სასურველია იაპონური კერძი მიირთვათ მისი მომზადებისთანავე. ასე რომ, საუკეთესო ვარიანტია თავად მოამზადოთ, რაც სულაც არ არის ისეთი მარტივი, როგორც ერთი შეხედვით ჩანს.

რძე

ყველა ქალმა, რომელიც მკაცრად აკონტროლებს ფიგურას, უნდა ახსოვდეს, რომ მუდმივი შეზღუდვების გამო, მის სხეულში კალციუმის დონე იკლებს, რაც იმას ნიშნავს, რომ რძე არის ზუსტად ის, რაც გჭირდებათ არა მხოლოდ შიმშილის დასაკმაყოფილებლად, არამედ სხეულის აღდგენისთვის. კალციუმის გარდა რძე შეიცავს დაახლოებით 20 აუცილებელ ამინომჟავას. თუმცა, არ უნდა დაგვავიწყდეს, რომ რძე ასევე შეიცავს არც ისე სასარგებლო ნივთიერებას - ლაქტოზას, სხვა სიტყვებით რომ ვთქვათ, რძის შაქარს, ამიტომაც საღამოს მისი მიღებისას ზომიერება გვმართებს; ერთი ჭიქა რაფინირებული რძე სრულიად საკმარისი იქნება საღამოს საათებში.