ტრავმული კავშირი ძლიერი ემოციური მიჯაჭვულობაა იმ ადამიანთან, რომელიც ერთდროულად ტკივილსაც და ნუგეშსაც განიჭებთ. ეს არ არის მხოლოდ ტოქსიკური ურთიერთობა, არამედ დამოკიდებულების რთული მექანიზმი, რომელიც დაფუძნებულია ძალადობისა და „თაფლობის თვის“ ციკლურ მონაცვლეობაზე.

TREND გიზიარებთ ტოქსიკური ურთიერთობის რამდენიმე ნიშანს, რაც დაგეხმარებათ სწრაფად დააღწიოთ თავი უსარგებლო კავშირს.

აღმავლობისა და დაღმასვლის ციკლი

ურთიერთობები არ არის მხოლოდ გაუთავებელი კამათი; ის ასევე მოიცავს - ნაზ სიტყვებს, გულწრფელ საუბრებს, ვნებიან სექსს; „თაფლობის თვის“ პერიოდი ქმნის განსაკუთრებული კავშირის განცდას. კონფლიქტის შემდეგ კი, თქვენი ტვინი უგულებელყოფს გამაფრთხილებელ ნიშნებს და ეჭიდება „კარგ“ მომენტებს, რაც გარწმუნებთ, რომ ურთიერთობა ღირს გადარჩენად - ეს ქმნის მიჯაჭვულობის მანკიერ ციკლს.



ცდილობთ, კონფლიქტის თავიდან ასაცილებლად ქცევა შეცვალოთ, პარტნიორის ცუდ საქციელში საკუთარ თავს ადანაშაულებთ: „ნეტავ ეს საუბარი სხვანაირად წარმემართა“, „ნეტავ ამ შეტყობინებებზე ასე მძაფრად არ მეპასუხა“ - თვითდადანაშაულება გარწმუნებთ, რომ „კარგი“ მომენტებისთვის ცუდი მოპყრობა უნდა აიტანოთ.

მეგობრებსა და ოჯახის წევრებს შორდებით, გეშინიათ უკმაყოფილების - ეს ნორმალური არ არის! ხშირად სამყარო ერთ ადამიანამდე დადის და ვერ ხედავთ, რამდენად არაჯანსაღი გახდა ურთიერთობა, მაგრამ მარტოობის შიში გაიძულებთ, დარჩეთ მასთან.

მის გარეშე არ იცით ვინ ხართ

თქვენი თვითშეფასება მჭიდრო კავშირშია თქვენს ურთიერთობასთან. მცირეხნიანი განშორებაც კი იწვევს დაკარგვის ძლიერ შიშს. დამოუკიდებლობა ქრება და საკუთარ თავს პარტნიორის პრიზმით ხედავთ. ნებისმიერი დისტანცია პანიკას იწვევს: „მიმატოვებს?“, „აღარ ვუყვარვარ?“, „ვინ ვარ მე მის გარეშე?“ - აღიარეთ, რომ ეს ტრავმული კავშირია და არა სიყვარული, ნუ მისცემთ რომანტიკულ მოგონებებს უფლებას, მოგატყუონ. დაარქვით ყველაფერს თავისი სახელი.

ენდეთ მათ, ვისაც ენდობით

ტოქსიკურ კავშირზე ისაუბრეთ იმ ადამიანთან, ვისაც ენდობით.
ობიექტური პერსპექტივა დაგეხმარებათ სიტუაციის ისეთად დანახვაში, როგორიც არის, გახსოვდეთ, თქვენ თვითკმარი ხართ და შეგიძლიათ იპოვოთ ბედნიერება ამ არაჯანსაღი ურთიერთობის გარეთაც.

ყურადღება მიაქციეთ გამაფრთხილებელ ნიშნებს

ადვილი არაა იგნორირება გაუკეთოთ კრიტიკულ მომენტებს ურთიერთობაში, როდესაც თქვენი პარტნიორი კვლავ მომხიბვლელი ხდება, მაგრამ გაიხსენეთ ნებისმიერი ქცევა, რომელიც გულს გტკენთ. მნიშვნელოვანია, დარჩეთ ობიექტური და ჩაიწეროთ თქვენი გრძნობები, ეს დაგეხმარებათ უკეთ გაიგოთ ურთიერთობა სასიამოვნო მომენტების ზედმეტად რომანტიზების გარეშე.

იფიქრეთ გამოსავალზე

„უბრალოდ წასვლის“ იდეა არარეალურია, ამიტომ გირჩევთ, პროცესი ეტაპებად დაყოთ:

• დატვირთეთ თქვენი გრაფიკი პარტნიორთან დაუკავშირებელი აქტივობებით

• ხშირად მოინახულეთ მეგობრები

• თანდათანობით შეზღუდეთ ტექსტური შეტყობინებები და კომუნიკაცია სოციალურ მედიაში

• მიმართეთ თერაპევტს, მას შეუძლია დაგეხმაროთ ემოციურ სირთულეებთან გამკლავებაში

• თუ თქვენი უსაფრთხოება რისკის ქვეშაა, დაუკავშირდით ოჯახში ძალადობის ცხელ ხაზს

ტრავმული ურთიერთობისგან თავის დაღწევა რთულია, მაგრამ შესაძლებელი. პირველი ნაბიჯი პრობლემის აღიარებაა, შემდეგი ნაბიჯებისთვის კი ხშირად მხოლოდ სურვილიც უკვე გადამწყვეტი მნიშვნელობისაა.