უელსის პრინცი აპირებს იურიდიული გზებით შეაჩეროს ჰარისა და მეგან მარკლის მიერ დაგეგმილი „ამაზრზენი“ დოკუმენტური ფილმი, რომელიც პრინცესა დაიანას გარდაცვალების 30 წლისთავს ეძღვნება.

ბრიტანეთის სამეფო ოჯახში დაპირისპირება პიკს აღწევს. გავრცელებული ინფორმაციით, პრინცი უილიამი მზად არის სამართლებრივი კონსულტაციები გაიაროს საკუთარი ძმის, პრინც ჰარის წინააღმდეგ. დავის მიზეზი ჰარის გეგმებია - გადაიღოს დოკუმენტური ფილმი მათი დედის, პრინცესა დაიანას გარდაცვალების წლისთავთან დაკავშირებით. წყაროები უცხოურ მედიასთან საუბრისას აცხადებენ, რომ მომავალი მეფისთვის ეს პროექტი „ამაზრზენი და ღრმად შეურაცხმყოფელია“.



დაშორებულ ძმებს შორის მორიგი კონფლიქტის ეპიცენტრი Netflix-ის დოკუმენტური ფილმია, რომლის პრემიერაც 2027 წლის აგვისტოში, დაიანას პარიზში ტრაგიკული დაღუპვიდან ზუსტად სამი ათწლეულის შემდეგ იგეგმება.

Netflix-ის პროექტი და კომერციული ინტერესები

41 წლის ჰარი და 44 წლის მეგან მარკლი ამ პროექტს სტრიმინგ გიგანტთან გაფორმებული მრავალმილიონიანი კონტრაქტის ფარგლებში ავითარებენ. ფილმი მიზნად ისახავს დაიანას ცხოვრების, მისი მედიასთან და მონარქიასთან ურთიერთობისა და მისი გარდაცვალების შვილებზე გავლენის დეტალურ განხილვას.



ინსაიდერების თქმით, დაიანას ისტორიის კომერციულ პროდუქტად ქცევამ ძმებს შორის ძველი ჭრილობები ხელახლა გახსნა. თუმცა, ჰარი უკან დახევას არ აპირებს.

„ჰარი სრულიად დარწმუნებულია, რომ დედის ხსოვნის უკვდავყოფა მისი, როგორც შვილის, თანდაყოლილი უფლებაა. მის გონებაში დაიანას მემკვიდრეობა არ არის ინსტიტუტის საკუთრება და ის არ საჭიროებს ძმის თანხმობას,“ - აცხადებს წყარო.

მეგან მარკლის როლი - უილიამის მთავარი „ტრიგერი“

უილიამის გაბრაზებას კიდევ უფრო ამძაფრებს მეგან მარკლის აქტიური როლი კადრს მიღმა. პრინცი მიიჩნევს, რომ მეგანის მხრიდან დაიანას მემკვიდრეობაზე გავლენის მოხდენა ან ამით სარგებლის მიღება ყოველგვარ პირად ზღვარს სცდება. ის ამას აღიქვამს არა როგორც პატივისცემას, არამედ როგორც დედის ღალატს.

მეორე მხრივ, ჰარის მოტივაცია წლების განმავლობაში დაგროვილი წყენიდან მოდის. ის თვლის, რომ მონარქიამ ვერ დაიცვა დაიანა კრიტიკულ მომენტებში და, შესაბამისად, სამეფო ოჯახს არ აქვს მორალური უფლება, იყოს მისი ლეგენდის ერთადერთი მცველი.

Netflix - „წითელი ხაზი“ უელსის პრინცისთვის

პრინცი უილიამისთვის Netflix-თან თანამშრომლობა განსაკუთრებით მტკივნეული თემაა. მას არასდროს დაუმალავს ზიზღი სერიალ „გვირგვინის“ (The Crown) მიმართ.
„Netflix-ი უილიამისთვის უდიდესი ტრიგერია. ეს პროექტი მისთვის იმ ომის ხელახლა დაწყებას ჰგავს, რომელიც მას დასრულებული ეგონა,“ - ამბობს ინსაიდერი.

უილიამი მიიჩნევს, რომ დედის ცხოვრების „კომერციალიზაცია მოგების მიზნით გლობალური პლატფორმისთვის თავად დაიანასაც კი შეაძრწუნებდა.

სასახლის მკაცრი პოზიცია

მიუხედავად იმისა, რომ 2017 წელს ძმებმა ერთად იმუშავეს BBC-ის დოკუმენტურ ფილმზე, ხოლო 2021 წელს ერთობლივად გახსნეს დაიანას ქანდაკება კენსინგტონის სასახლეში, დღეს სიტუაცია რადიკალურად შეცვლილია.

სასახლის მრჩეველი აფრთხილებს:
„უილიამი მზად არის, ეს დავა ბოლომდე მიიყვანოს. ის აქტიურად სწავლობს ყველა შესაძლო დაბრკოლებას - იურიდიული გზებიდან დაწყებული, ინსტიტუციური გავლენით დასრულებული. ის გამოიყენებს ნებისმიერ ბერკეტს, რათა ეს პროექტი შეაჩეროს.“