მაშინ, როცა ბექჰემების უფროსი ვაჟის, ბრუკლინისა და დანარჩენი ოჯახის დაპირისპირება პიკს აღწევს, დევიდ და ვიქტორია ბექჰემებმა გადაწყვიტეს, მსოფლიოს „ბედნიერი ოჯახის“ იდეალური კადრები აჩვენონ.

მიზეზი უმცროსი ვაჟის, კრუზის 21 წლის იუბილეა, რომელიც ლონდონში, ნამდვილ ვარსკვლავურ გარემოში აღნიშნეს.

გრანდიოზული წვეულება უფროსი ძმის გარეშე

კვირა საღამოს, ლონდონის პრესტიჟულ რესტორანში The Maine Mayfair, ბექჰემებმა ნამდვილი "The Grand Beatle Ball" მოაწყვეს. წვეულებას ესწრებოდნენ 51 წლის ვიქტორია, 50 წლის დევიდი, 23 წლის რომეო და 14 წლის ჰარპერი. თუმცა, ოჯახის „განდგომილი“ წევრი, 26 წლის ბრუკლინი, სტუმრების სიაში არ იყო.

ვიქტორიამ ინსტაგრამზე ემოციური პოსტი გამოაქვეყნა: „კრუზის დაბადების დღეს ნაადრევად ვზეიმობთ! ძალიან გვიყვარხარ!“ დევიდმა კი დაამატა: „გვიყვარს შენი დღესასწაული, კრუზი. წუხელ ოთახში ბევრი სიყვარული ტრიალებდა“.

მუსიკალური დებიუტი და Spice Girls-ის კოქტეილები

კრუზი, რომელიც მუსიკალურ კარიერას აქტიურად აშენებს, სცენაზე მსოფლიოს ნომერ პირველ The Beatles-ის ტრიბიუტ-ბენდთან ერთად ავიდა და 1969 წლის ჰიტზე Something გიტარის სოლო შეასრულა.

სტუმრებს შორის იყო ვიქტორიას ყოფილი მეგობარი გოგონების ბენდიდან, ემ ბანტონიც. წვეულებაზე სპეციალური კოქტეილებიც კი მომზადდა: ერთს კრუზის ახალი სინგლის პატივსაცემად For Your Love ერქვა, მეორეს კი - Spice Girls-ის ლეგენდარული ჰიტის, Wannabe-ს სახელი.

დაპირისპირება ბრუკლინთან: ვინ ვის დაუბლოკა გზა?

სანამ ოჯახი ლონდონში მხიარულობდა, ბრუკლინ ბექჰემი ოკეანის გაღმა დარჩა. ძმებს შორის კონფლიქტი უკვე რამდენიმე თვეა მწვავდება. კრუზი ამტკიცებს, რომ უფროსმა ძმამ ის დაბლოკა, თუმცა ბრუკლინმა გასულ თვეში გამოქვეყნებულ 6-გვერდიან განცხადებაში საპირისპირო თქვა:

„რომეო და კრუზი სოციალურ ქსელებში ჩემს წინააღმდეგ იერიშის მისატანად გამოგზავნეს, რის შემდეგაც მათ მოულოდნელად დამბლოკეს გასულ ზაფხულს“.

იმ დროს, როცა ოჯახი კრუზს ადღეგრძელებდა, ბრუკლინმა ინსტაგრამზე თავის მეუღლეს, ნიკოლა პელტცს ვალენტინობის დაგვიანებული პოსტი მიუძღვნა და პირობა დადო, რომ მას „სამუდამოდ დაიცავს“.