ბრიტანეთის სამეფო ოჯახი უმძიმესი კრიზისის წინაშეა. სანამ მსოფლიო პრინც ენდრიუს მოულოდნელ დაკავებას განიხილავს, „ეპშტეინის ფაილებში“ კიდევ ერთი სკანდალური დოკუმენტი გავრცელდა: აღმოჩნდა, რომ იორკის ყოფილი ჰერცოგინია, სარა ფერგიუსონი, წლების განმავლობაში პედოფილი მილიარდერის, ჯეფრი ეპშტეინის ფინანსურ კმაყოფაზე იმყოფებოდა.

პრინცი გისოსებს მიღმა: რა მოხდა სენდრინგემში?

ბრიტანეთი დრამატულმა კადრებმა შეძრა - პოლიციის ავტოკოლონამ პრინც ენდრიუს ახალი საცხოვრებელი ალყაში მოაქცია. 66 წლის პრინცი, რომელიც სამეფო ტახტის რიგით მერვე მემკვიდრეა, დაკავებულია. მას ბრალად სამსახურებრივი უფლებამოსილების ბოროტად გამოყენება ედება.

ბუკინგემის სასახლეში პანიკაა, თუმცა მეფე ჩარლზმა მკაცრი პოზიცია დაიკავა: „კანონის წინაშე ყველა თანასწორია“. პოლიცია ჩხრეკას ატარებს როგორც ენდრიუს ახალ სახლში, ისე მის ყოფილ რეზიდენციაში, ვინძორში.

„15 წელი მე ვინახავდი“ - ეპშტეინის აღსარება

სკანდალის ეპიცენტრშია ენდრიუს ყოფილი ცოლი, სარა ფერგიუსონი („ფერგი“). ახლად აღმოჩენილი იმეილები ამტკიცებს, რომ ჯეფრი ეპშტეინი მას ფინანსურად 1996 წლიდან, პრინცთან განქორწინების დღიდან ეხმარებოდა.

მიმოწერაში ეპშტეინი პირდაპირ ამბობს, რომ 15 წლის განმავლობაში ის იყო ჰერცოგინიას ფარული სპონსორი. ეს ინფორმაცია სრულად ანგრევს ფერგიუსონის ვერსიას, თითქოს მან ეპშტეინისგან მხოლოდ მცირე თანხა ისესხა ვალების დასაფარად. ირკვევა, რომ პედოფილი მილიარდერი ფაქტობრივად „ყიდულობდა“ სამეფო ოჯახთან სიახლოვეს.

ჰერცოგინია მიმალვაშია: სად გაქრა „ფერგი“?

სანამ მისი ყოფილი ქმარი ციხეშია, სარა ფერგიუსონი ბრიტანეთიდან გაუჩინარდა. გავრცელებული ინფორმაციით, ის საფრანგეთის ალპებიდან არაბეთის საემიროებში გადავიდა.

მისი ფინანსური იმპერია ინგრევა - ექვსი ბიზნესი გაკოტრების პირასაა. ინსაიდერები ამბობენ, რომ ფერგიუსონი სასოწარკვეთილია და ახლო აღმოსავლეთში მდიდარ მფარველებს ეძებს, რადგან ბრიტანეთში ის „პერსონა ნონ გრატად“ გამოცხადდა.

პრინცესების დანგრეული ცხოვრება

ამ საშინელი სკანდალის შუაგულში პრინცესები, ბეატრისი და ევგენია აღმოჩნდნენ. საზოგადოებას ახლა ერთი კითხვა აქვს: ვისი ფულით ფინანსდებოდა მათი მდიდრული ცხოვრება და გაუთავებელი არდადეგები? მტკიცებულებები აჩვენებს, რომ დედას გოგონები ეპშტეინთან სადილზე ციხიდან მისი გამოსვლისთანავე მიჰყავდა.



პრინცესები „განადგურებულები და შოკირებულები“ არიან იმით, რომ მათი მშობლების კავშირი სექსუალურ დამნაშავესთან იმაზე ღრმა აღმოჩნდა, ვიდრე ვინმეს წარმოედგინა.