აზრი, რომ პლანეტაზე არიან ქალები, რომლებიც წარმატებულნი არიან კარიერაში, ზრდიან შვილებს, ზრუნავენ მეუღლეზე და არ ივიწყებენ საკუთარ თავსაც, ხშირად მითია, რაც ქმნის არასრულფასოვნების კომპლექსს ნორმალურ ქალებში.

იშვიათად ხდება, როცა ადამიანები ბედნიერ ოჯახურ ცხოვრებას და კარიერას ერთმანეთს უთანხმებენ. სამწუხაროდ ბევრისთვის ეს ნამდვილი გამოცდაა.

დაადგინეთ პრიორიტეტები

თუ გსურთ მიიღოთ ბალანსი ყოველდღიურ ცხოვრებაში, უნდა გაერკვეთ, რა არის უფრო მნიშვნელოვანი თქვენთვის და ამის მიხედვით ააწყოთ ცხოვრება. დაფიქრდით, რაზე ხარჯავთ დროის უმეტეს ნაწილს - პროფესიული გამოწვევების გადაჭრაში თუ საყვარელ ადამიანებთან ურთიერთობაში?
თუ თქვენი ცხოვრების უმეტესი ნაწილი შრომას ეთმობა, მაშინ აღმოჩნდება, რომ ეს არის თქვენი პრიორიტეტი, თქვენ კარიერისტი ხართ. ეს არც კარგია და არც ცუდი - თქვენ უბრალოდ ასეთ ცხოვრებას ირჩევთ.



ადამიანი, რომელსაც სურს მუდმივად ბავშვებთან ერთად გაატაროს დრო, მაგრამ ამავე დროს აიძულებს საკუთარ თავს იმუშაოს - უკმაყოფილოა და განიცდის დისბალანსს.
მათ, ვისაც სურს საკუთარი თავის განვითარება, მაგრამ თავს ვალდებულად თვლის, დაუთმოს ყოველი დღე ოჯახს, ასევე არ არის ძალიან კმაყოფილი თავისი ცხოვრებით.

ასე რომ, თუ გყავთ ოჯახი, ეს რა თქმა უნდა, ყურადღებას მოითხოვს,  თუმცა, თუ თქვენი მიზნები სცილდება ოჯახს და მოითხოვს თქვენგან ენერგიას სტაბილურობის და თავდაჯერებულობის შესანარჩუნებლად, უნდა შეთანხმდეთ ოჯახის წევრებთან და საკუთარ თავთანაც პრიორიტეტებზე, მაგრამ ისე, რომ თქვენი ოჯახი გახდეს არა შემზღუდველი, არამედ პირიქით, თქვენი მხარდამჭერი.

ოჯახი - მოტივატორი

ოჯახის წევრების მხარდაჭერა ხშირად შეიძლება გახდეს კარიერის ზრდის საფუძველი და ახალი მიღწევების შთაგონება - რამდენად ძლიერია მხარდაჭერა, დამოკიდებულია იმაზე, როგორი ცხოვრების პარტნიორი აირჩიეთ და როგორი პარტნიორი ხართ თავად თქვენ.

ოჯახში პარტნიორი არის ის, ვინც იღებს მეორეს არა როგორც ფუნქციების ერთობლიობას, რომელიც ცოლს ან ქმარს უნდა ჰქონდეს, არამედ როგორც პიროვნებას, ვისთან ერთადაც იქმნება აწმყო და მომავალი. კარგ პარტნიორობას ხელს უწყობს საერთო მიზნების არსებობა, ნდობა და მოსმენის უნარი - მნიშვნელოვანია, გესმოდეთ, როგორ უნდა მოეპყროთ პარტნიორს და როგორ გადასცეთ თქვენი სურვილები მას.

დროის მენეჯმენტი - ოჯახი და დასვენება

ჰარმონიული ურთიერთობისთვის არსებობს ოქროს წესი: სწორად გამოვყოთ დრო ოჯახისთვის და პიროვნული თუ პროფესიული განვითარებისთვის.

ჩვენ ყველას გვაქვს განსხვავებული პრიორიტეტები და საჭიროებები, მაგრამ თუ გულწრფელად გავაზიარებთ ოჯახის წევრებთან ჩვენს სურვილებს, აუცილებლად მივალთ შეთანხმებამდე, ამისთვის საჭიროა წინასწარ დაგეგმოთ შვებულება ოჯახთან შეთანხმებით, ხშირად ეს შეიძლება იყოს მათთან ერთად დროის გატარება, ან მეგობრებთან ერთად დასვენება.



ასევე, დაუთმეთ დრო საკუთარ თავს - ოჯახური ბედნიერებისა თუ სამუშაოსთვის ძალისხმევის დახარჯვისას, არ უნდა დაივიწყოთ საკუთარი თავი. თქვენს განრიგში ყოველთვის უნდა იყოს დრო, რომელიც ეძღვნება იმას, რაც პირადად თქვენთვის მნიშვნელოვანია. ზოგიერთისთვის ეს იქნება პროფესიული განვითარება: კურსებზე დასწრება, სპეციალიზებული ლიტერატურის კითხვა და დავალებებიც კი, რომელთა შესრულებაც სამუშაო დღის განმავლობაში ვერ მოახერხეთ. სხვებისთვის ეს არის ჰობი, საყვარელ ადამიანებთან დროის გატარება ან სულაც სპა თერაპია.

დროის დეფიციტი და განაწყენებული ოჯახის წევრები
ნორმალურია, რომ საყვარელი ადამიანები ჩვენგან ყურადღებას ითხოვენ და სურთ მეტი დრო გაატარონ ჩვენთან, მაგრამ მაშინ, როცა ამას ვერ ახერხებთ, ისინი ღიზიანდებიან.

გაღიზიანება, წყენა - შეუსრულებელი მოლოდინებია. ასეთ დროს, როგორც წესი ოჯახის წევრებსა და თქვენს შორის არ არის სწორი და ჯანსაღი კომუნიკაცია, ამიტომაც მათ ეგოისტურად უჭირთ თქვენი ამ მდგომარეობაში ნახვა და აღქმა.

მსგავსი უთანხმოებები ხშირი რომ არ იყოს შეძლებისდაგვარად შეთანხმდეთ, როგორ იქნება თქვენი ცხოვრება ორგანიზებული და  შეასრულოთ დაპირებები. მაგალითად, როდის იმუშავებთ და როდის გაატარებთ დროს ოჯახთან ერთად. თუ პირობა ვერ შეასრულეთ, აღიარეთ, რომ ცდილობთ მეტი ყურადღება მიაქციოთ ოჯახს და სხვა დროს აუცილებლად გამოასწორეთ ეს.

რაც არ უნდა პრიორიტეტული იყოს სამუშაო, აჩვენეთ ოჯახის წევრებს, რომ ისინი ყველაზე მნიშვნელოვანი ადამიანები არიან თქვენთვის. აუხსენით, რომ თქვენ მუშაობთ მათთან მეტი დროის გასატარებლად და მათი მდგომარეობის გასაადვილებლად. მაგალითად, თუ თქვენ სამსახურში ხართ და თქვენი პარტნიორი კი იძულებულია საყოფაცხოვრებო პრობლემები გადაჭრას, შეეხიდეთ მას თუნდაც ფინანსურად, ეცადეთ თანაბრად გადაინაწილოთ ფუნქციები ოჯახში და პატივი სცეთ ერთმანეთის როლს.

და ბოლოს: როდესაც ცდილობთ ოჯახისა და კარიერის შერწყმას, არ გჭირდებათ დაეყრდნოთ კლიშეებს: „ქალისთვის მთავარია ოჯახი“ ან „მამაკაცისთვის სამუშაო პირველ ადგილზე უნდა იყოს“.

იყავით გულწრფელი საკუთარ თავთან. აირჩიეთ ის, რაც თქვენს გულს სურს, აკეთეთ ის, რაც ნამდვილად გაინტერესებთ, რისი კეთებაც ნამდვილად მოგწონთ, მაშინ მიზნები მიიღწევა უფრო მარტივად, უფრო ეფექტურად და, რა თქმა უნდა, მეტი სიამოვნებით.