საძინებლის მოწყობისას ჩვენ დიდ ყურადღებას ვაქცევთ დიზაინს, ფერსა და დეკორს, თუმცა ხშირად გვავიწყდება ერთი მნიშვნელოვანი დეტალი - საწოლის სიმაღლე იატაკიდან. ბევრმა არც კი იცის, რომ სწორედ ამ ნიუანსზეა დამოკიდებული ჩვენი ყოველდღიური კომფორტი და ძილის ხარისხი.

უნივერსალური გადაწყვეტილება არ არსებობს, რადგან საწოლის იდეალური დონე თქვენს ფიზიკურ მონაცემებსა და ჩვევებზეა დამოკიდებული.

არსებობს თუ არა იდეალური სიმაღლე?

გამოცემა RealSimple-ის ექსპერტები აღნიშნავენ, რომ საწოლის სიმაღლე ინდივიდუალურია. მაგალითად:

• ბავშვებისთვის: უმჯობესია დაბალი საწოლები - ისინი უფრო უსაფრთხოა და პატარებს დამოუკიდებლად სარგებლობა უადვილდებათ.

• ზრდასრულებისთვის: საჭიროა შედარებით მაღალი კონსტრუქცია, რაც სხეულის უკეთეს მხარდაჭერას უზრუნველყოფს. საშუალოდ, კომფორტული დონე იატაკიდან 43–56 სანტიმეტრია. სწორედ ამ დიაპაზონში მიიღწევა ბალანსი მოხერხებულობასა და მოძრაობის სიმსუბუქეს შორის.

როგორ მოქმედებს სიმაღლე ძილის ხარისხზე?

თავისთავად სიმაღლე პირდაპირი ფაქტორი არ არის, თუმცა ის მჭიდროდ არის დაკავშირებული მატრასის კონსტრუქციასთან. სწორად შერჩეული კომბინაცია:

• უნარჩუნებს ხერხემალს ბუნებრივ მდგომარეობას;

• ამცირებს დატვირთვას სახსრებზე;

• თავიდან გვაცილებს ღამის დისკომფორტს.

ზედმეტად დაბალი საწოლი: მოუხერხებელია დაჯდომისა და ადგომისას, სხეული შეიძლება იმაზე მეტად „ჩაიძიროს“, ვიდრე საჭიროა. ზედმეტად მაღალი საწოლი: ქმნის ზედმეტ დატვირთვას მუხლებზე, განსაკუთრებით დაბალი ტანის ადამიანებისთვის.

როგორ გამოვთვალოთ თქვენთვის იდეალური სიმაღლე?

ამისათვის უმარტივესი მეთოდი არსებობს - ორიენტირი თქვენი მუხლებია:

1. დაჯექით სკამზე ისე, რომ ფეხები იატაკზე გედგათ და მუხლები 90-გრადუსიან კუთხეს ქმნიდეს.

2. გაზომეთ მანძილი იატაკიდან ბარძაყის ქვედა ნაწილამდე.

3. სწორედ ეს ნიშნული უნდა იყოს თქვენი საწოლის საერთო სიმაღლე (მატრასთან ერთად).
   
   

მნიშვნელოვანია: ადგომისას ფეხები სრულად უნდა ეხებოდეს იატაკს, არ უნდა გიწევდეთ დაძაბვა ან ზედმეტი ძალისხმევა წამოდგომისთვის.

თუ მატრასი რბილია, შეგიძლიათ რამდენიმე სანტიმეტრით მაღალი ვარიანტი აირჩიოთ, რადგან დაჯდომისას ის მაინც დაიწევს. თუ მყარ მატრასს ანიჭებთ უპირატესობას, ზუსტად დაიცავით გაზომილი პარამეტრები.