არ გწერთ, არ გილაიქებთ, შეხვედრას არ გთავაზობთ, მაგრამ თითქმის ყველა სთორის ნახულობს. ნაცნობი სიტუაციაა?

დაშორების შემდეგ შეიძლება ადამიანთან ურთიერთობა საერთოდ აღარ გქონდეთ, თუმცა სოციალური ქსელების საშუალებით ყოფილი პარტნიორი მაინც ადევნებდეს თვალს თქვენს ცხოვრებას.

ის ყოველდღიურად ჩნდება სთორის მნახველების სიაში, მაგრამ არაფერს გწერთ. რატომ ხდება ასე?

შესაძლოა, ეს უბრალოდ ჩვევაა

როცა ადამიანთან ურთიერთობაში ვართ, მისი ცხოვრების შესახებ ყოველდღე რაღაცას ვიგებთ. დაშორების შემდეგ ეს ჩვევა მაშინვე არ ქრება.

შესაძლოა, ყოფილი თქვენს სთორის უბრალოდ ჩვევის გამო ნახულობს და ამაზე დიდად არც ფიქრობს. ეს ავტომატურად არ ნიშნავს, რომ დაბრუნება ან ურთიერთობის აღდგენა სურს.

შეიძლება უბრალოდ აინტერესებდეს, როგორ ცხოვრობთ

ბუნებრივია, დაგაინტერესოს იმ ადამიანის ცხოვრება, რომელიც ოდესღაც შენთვის მნიშვნელოვანი იყო.

შესაძლოა, ყოფილს აინტერესებდეს, რას აკეთებთ, როგორ შეიცვალა თქვენი ცხოვრება, სად მოგზაურობთ ან უბრალოდ როგორ ხართ. ზოგჯერ ეს მხოლოდ ცნობისმოყვარეობაა და არა გრძნობა.

შეიძლება აინტერესებდეს, ბედნიერი ხართ თუ არა მის გარეშე

ყოფილი შესაძლოა თქვენს ცხოვრებას იმის გასაგებადაც აკვირდებოდეს, როგორ ხართ მის გარეშე.

შეიძლება სურდეს, ნახოს, როგორ შეიცვალა თქვენი ცხოვრება დაშორების შემდეგ. შესაძლოა, უბრალოდ აინტერესებდეს, როგორ გრძნობთ თავს.

შესაძლოა, ურთიერთობას ბოლომდე ვერ ელევა

ზოგჯერ ადამიანი ურთიერთობას ასრულებს, მაგრამ ემოციურად ჯერ კიდევ ვერ შორდება.

ყოფილი შეიძლება აღარ გწერდეთ, რადგან არ იცის, როგორ დაგელაპარაკოთ ან თქვენი პასუხის ეშინია. სთორის ნახვა კი საშუალებას აძლევს, თქვენზე რაღაც მაინც იცოდეს, პირდაპირი საუბრის გარეშე.

რატომ გვაღელვებს ეს?

ყოფილის სახელის დანახვამ სთორის მნახველებში შეიძლება ბევრი რამ გაგვახსენოს.

შეიძლება გაგვიჩნდეს კითხვები: „ისევ ვაინტერესებ?“ „მომწერს?“ „ვენატრები?“

მაგრამ მხოლოდ სთორის ნახვა ამ კითხვებზე პასუხს არ გვაძლევს. არ ვიცით, რატომ ნახა კონკრეტული სთორი და რას ფიქრობს ამ დროს.

სწორედ ამიტომ ვიწყებთ სიტუაციის ჩვენსებურად ახსნას და იმაზე ფიქრს, რაც შეიძლება საერთოდ არ იყოს რეალობა.

შეიძლება მისი ყურადღების გამო თქვენც შეიცვალოთ

თუ მუდმივად ამოწმებთ, ნახა თუ არა ყოფილმა თქვენი სთორი, მისი ყურადღება თქვენთვის უკვე ზედმეტად მნიშვნელოვანი ხდება.

შეიძლება ფოტოს ან ვიდეოს გამოქვეყნების დროსაც გაიფიქროთ: „ამას რომ ნახავს, რას იფიქრებს?“

ასე ყოფილი, მიუხედავად იმისა, რომ თქვენს ცხოვრებაში აღარ არის, მაინც იწყებს გავლენის მოხდენას თქვენს გადაწყვეტილებებზე.

რა უნდა გააკეთოთ?

პირველ რიგში, ნუ ეცდებით თითოეული ნახვისთვის განსაკუთრებული მნიშვნელობის მინიჭებას.

თუ ადამიანს თქვენთან საუბარი სურს, შეუძლია პირდაპირ მოგწეროთ. მხოლოდ სთორის ნახვა არაფერს ამტკიცებს.

თუ ეს თქვენთვის არაფერს ნიშნავს, არაფრის შეცვლა არ არის საჭირო. მაგრამ თუ მისი ნახვები გაღიზიანებთ, გაწუხებთ ან იმედს გიჩენთ, შეგიძლიათ სთორის ნახვის შესაძლებლობა შეუზღუდოთ.

ეს შურისძიება არ არის. ზოგჯერ უბრალოდ საკუთარი სიმშვიდისთვის საზღვრის დაწესებაა.

და ბოლოს, საკუთარ თავს ერთი კითხვა დაუსვით: რატომ გაღელვებთ, რომ ყოფილი თქვენს სთორის უყურებს?

სოციალურ ქსელში რაღაცის გამოქვეყნებისას უმჯობესია იმაზე იფიქროთ, თავად რა გინდათ გააზიაროთ და არა იმაზე, რას იფიქრებს კონკრეტული ადამიანი.

ყოფილი თქვენს სთორის უყურებს თუ არა, მისი არჩევანია. თქვენ კი შეგიძლიათ გადაწყვიტოთ, რამდენად მისცემთ ამ ფაქტს უფლებას, თქვენს განწყობაზე იმოქმედოს.