ალბათ, სადმე შეგხვედრია ტერმინი მანიფესტაცია - ვიდეოებში, სტატიებსა თუ ჟურნალებში. მანიფესტაცია უფრო და უფრო პოპულარული გახდა ბოლო რამდენიმე წლის განმავლობაში. ხშირად ის ასოცირდება მიზიდულობის კანონთან და პოზიტიური აზროვნების ძალასთან.

თუმცა, რა არის მანიფესტაცია და როგორ შეიძლება მისი გამოყენება ჩვენი მიზნებისა და ოცნებების მისაღწევად?

მანიფესტაცია არის ჩვენივე ქვეცნობიერის გამოვლინება, ჩვენი სურვილებისა და განზრახვების რეალობად გარდაქმნის პროცესი, რომელიც მოითხოვს ფიქრების კონცენტრაციასა და დისციპლინას.

ეს არის რწმენა, რომ ჩვენ გვაქვს ძალა შევქმნათ ცხოვრება, რომელიც გვინდა. თუმცა, სასურველი შედეგების მისაღებად, აუცილებელია, ჩვენი ფიქრები და ქმედებები ემთხვეოდეს ქვეცნობიერის სურვილებს.

სანამ, მანიფესტაციის სხვადასხვა ხერხს მიმართავ შენი ოცნებების ასასრულებლად, აუცილებელია განსაზღვრო, თუ რა გინდა სინამდვილეში. საჭიროა, გქონდეს კონკრეტული და რეალური პასუხები. ამ პასუხების მისაღებად კი მნიშვნელოვანია ობიექტურად შეაფასო საკუთარი თავი - შენი ღირებულებები, მისწრაფებები, მიზნები. მხოლოდ მას შემდეგ, რაც გექნება მკაფიო ხედვა, თუ რა გინდა, შეგიძლია მიმართო შენი ფიქრები და ენერგია შენივე მიზნებისკენ.

რადგან უკვე ასე თუ ისე გვესმის მანიფესტაციის არსი, გავეცნოთ დადასტურებულ ხერხებს და ერთი ნაბიჯით მივუახლოვდეთ ჩვენს ლამაზ ოცნებებს:

1. მანიფესტაციის ერთ-ერთი მთავარი პრინციპი პოზიტიური ხედვაა.

საჭიროა, უარი თქვათ საკუთარი თავის ნეგატიური ეპითეტებით დახასიათებაზე, ჩაგრულისა თუ წაგებულის როლის მორგებასა და შეზღუდულ რწმენებზე. ამის ნაცვლად, მოიზიდე პოზიტიური ენერგიები, ფიქრები და მოიპოვე საკუთარი შესაძლებლობებისა და პოტენციალის რწმენა.

2. მანიფესტაციისთვის ასევე მნიშვნელოვანია ვიზუალიზაცია.

თვალები დახუჭე და წარმოიდგინე, რომ უკვე მიაღწიე სასურველ შედეგს - იყავი კონკრეტული და შეეცადე დაინახო თუ რა გაცვია შენს წარმოდგენებში, ვისთან ერთად აღნიშნავ ამ წარმატებას, სად ხარ და რას გრძნობ, როცა მიიღე ის, რაც ასე ძალიან გინდოდა. შეგიძლია, ამ პრაქტიკას მედიტაციის სახე მისცე და ივარჯიშო ყოველდღიურად. თუ ფანტაზია არ გაძლევს იმის საშუალებას, რომ მკაფიოდ დაინახო საკუთარი თავი მომავალში, ამობეჭდე ფოტო - მასალა, რომელიც ასახავს შენს ოცნებებს და გააკარი თვალსაჩინო ადგილას.

3. მიუხედავად იმისა, რომ ვიზუალიზაცია და პოზიტიური ხედვა ძლიერ საფუძველს ქმნის, გადამწყვეტ როლს მაინც მოქმედება თამაშობს.

გაწერე მარტივი და შენთვის ხელმისაწვდომი გეგმა და მიჰყევი მას ყოველდღიურად. ყველაფერი რასაც მოიმოქმედებ შენივე ოცნებებისკენ უნდა იყოს მიმართული. გახსოვდეს, რომ ამას აუცილებლად დასჭირდება დრო და ძალისხმევა, თუმცა, საბოლოოდ შენი გარდასახვის შედეგი ფასდაუდებელი იქნება!