თავისუფალ დროს ხშირად ტელეფონს ვიღებთ ან რაიმე გასართობს ვეძებთ. გვიჭირს არაფრის კეთება, თუმცა ფსიქოლოგების აზრით, მოწყენილობასაც აქვს დადებითი მხარე - ის დასვენებისა და ფიქრის საშუალებას გვაძლევს.

რატომ სჭირდება ზოგ ადამიანს მუდმივი გართობა?

ზოგიერთ ადამიანს სხვებზე მეტად უყვარს აქტიური ცხოვრება, სიახლეები და თავგადასავლები. ეს ექსტრავერსიის ერთ-ერთი გამოვლინებაა.

ასეთ ადამიანებს შეიძლება გაუჭირდეთ მშვიდი შაბათ-კვირის სახლში გატარება, თავისუფალი საღამო ან ისეთი საქმის კეთება, რომელიც დიდ ინტერესს არ იწვევს. მუდმივი აქტიურობის სურვილი ზოგჯერ დასვენების შესაძლებლობასაც გვართმევს.

რატომ გავურბივართ მოწყენილობას?

როცა მოგვწყინდება, ხშირად ტელეფონს ვიღებთ, სოციალურ ქსელებს ვათვალიერებთ ან მეგობრებს ვუკავშირდებით. ეს დროებით გვართობს, მაგრამ რაც უფრო ხშირად ვიქცევით ასე, მით უფრო გვიჭირს თავისუფალი დროის გატარება გასართობის გარეშე.

ამ ჩვევის გამო ნაკლები დრო გვრჩება ფიქრისთვის, დღის გააზრებისა და დასვენებისთვის. არადა, ზოგჯერ კარგი იდეები სწორედ მაშინ გვიჩნდება, როცა არაფერს ვაკეთებთ.

მოწყენილობისგან გაქცევამ შეიძლება არასასურველი გადაწყვეტილებებიც მიგვაღებინოს: მაგალითად, მეგობრებთან წავიდეთ მაშინაც კი, როცა დაღლილები ვართ, ან შაბათ-კვირა გეგმებით გავავსოთ, როცა დასვენება გვჭირდება. პრობლემა გართობა კი არა, ის არის, როცა მხოლოდ მოწყენილობის შიშით ვმოქმედებთ.

როგორ შევეჩვიოთ არაფრის კეთებას?

დაიწყეთ მცირე ნაბიჯებით:

• გაისეირნეთ მუსიკისა და პოდკასტის გარეშე.

• რიგში დგომისას ტელეფონს მაშინვე ნუ შეამოწმებთ.

• რამდენიმე წუთით დაჯექით გარეთ და დაისვენეთ.

• მოწყენილობისას მაშინვე ნუ დაიწყებთ სხვა გასართობის ძებნას.

თავიდან შეიძლება მოუსვენრობა იგრძნოთ, მაგრამ მიეცით საკუთარ თავს რამდენიმე წუთი. დროთა განმავლობაში აღმოაჩენთ, რომ არაფრის კეთება არც ისე რთულია.

სანამ რაიმე გეგმას დათანხმდებით, დაფიქრდით: ნამდვილად გსურთ იქ წასვლა თუ უბრალოდ არ გინდათ, რომ სხვების გართობას ჩამორჩეთ?

რატომ გვჭირდება სიმშვიდე?

აქტიური ცხოვრება და ადამიანებთან ურთიერთობა სასიამოვნოა, მაგრამ მუდმივი დატვირთვაც დამღლელია. თუ დასვენება და საკუთარ თავთან მარტო ყოფნა გიჭირთ, ყოველდღიურობაში ცოტა თავისუფალი დრო დატოვეთ.

ყოველი წუთის გართობით შევსება აუცილებელი არ არის - ზოგჯერ მოწყენილობაც გვჭირდება.