ზამთრის ცივ ამინდშიც შეგიძლიათ ელეგანტურად და მოდურად გამოიყურებოდეთ დახვეწილი აქსესუარების დახმარებით.

TREND გიზიარებთ ნაკლებად გავრცელებულ გადაწყვეტილებებს, რათა შექმნათ ინდივიდუალური სტილი, გაამრავალფეროვნოთ და გაახალისოთ ზამთრის სტილი და მკაცრი კლიმატი და სამკაულის ბრწყინვალება ერთმანეთს შეუხამოთ.

მასიური ყელსაბამები

რატომ არ უნდა ატაროთ მასიური მეტალის ყელსაბამი ქაშმირის ბლუზაზე ან თუნდაც ქურთუკზე, როგორც ამას აკეთებდნენ მოდის სახლები Givenchy და Vetements? - გარდა აშკარა კომფორტისა, ასეთი აქსესუარები გარეგნობას მაქსიმალურ ექსტრავაგანტურობას მატებს.

შანელის მოდის სახლი დიდი ხანია თავის სავიზიტო ბარათად მრავალსაფეხურიან, მასიურ ყელსაბამებს აღიარებს, ვირჯინი ვიარდი გვთავაზობს მასიური ჯაჭვების და ყელსაბამების ტარებას კლასიკური ტვიდის ქურთუკზეც კი, ასე რომ, თუ გსურთ ზამთრის ისედაც სადა და მოკრძალებული ჩაცმულობა გაახალისოთ, თამამად შეგიძლიათ ატაროთ მასიური მეტალის ყელსაბამები.

სამაჯურები და ბეჭდები ხელთათმანზე

ალბათ ყველაზე დრამატული სტილისტური გადაწყვეტილება, რომელიც ასევე ცუდ მანერებად ითვლებოდა ახლო წარსულში, მაგრამ დღეს მიღებულია წამყვანი მოდის ბრენდების მიერ, არის სამაჯურები და სხვა სამკაულები ხელთათმანზე.



რა თქმა უნდა, თუ ასეთ ვარიანტს განვიხილავთ, განსაკუთრებით ხელსაყრელი იქნება თხელი ფაქტურისგან დამზადებული მაღალტოტიანი ხელთათმანი, რომელიც შეგიძლიათ ატაროთ დახურულ სივრცეშიც კი. მთავარია, შეინარჩუნოთ სისადავე და ხელზე დაიტოვოთ მხოლოდ ერთი დეტალი, მაგალითად მხოლოდ სამაჯური, ან ბეჭედი, რადგან ვულგარული შთაბეჭდილება არ მოახდინოთ გარშემომყოფებზე.

ქამრები და ჯაჭვები

ზამთარში ყველაზე აქტუალური აქსესუარი ქამარია. დიზაინერები გვთავაზობენ მას ახლებურად შეხედოთ, როგორც სამკაულს. იქნება ეს მძივებიანი სარტყელი, რომელიც აკრავს ქურთუკს, თუ წელზე ჯაჭვების მიმოფანტვა ნაქსოვ კაბაზე, ასეთი დეტალი თქვენს სტილს პომპეზურობას და ბზინვარებას შემატებს.



მოდა კიდევ ერთხელ არის შთაგონებული სუბკულტურებით, ამიტომ Dior-ისა და Moschino-ს სახლები გვთავაზობენ ყურადღება მიაქციოთ მასიურ ჯაჭვებს ყველა კონფიგურაციით.

გრძელი ჯაჭვის საყურეები

იმისათვის, რომ საყურეები არ დაიკარგოს ქუდების და საყელოების ფონზე, უმჯობესია უპირატესობა მიანიჭოთ საყურის გრძელ და მოდურ ვარიანტებს. ამასთანავე, მსგავს საყურეებთან ერთად შეგიძლიათ ატაროთ ვინტაჟური სათვალე, რაც კიდევ უფრო გაუსვამს ხაზს თქვენს სტილს და ინდივიდუალობას.

ბროშები და გულსაბნევები

დიდი გულსაბნევები და ბროშები დიდი ხანია არ კარგავს აქტუალობას მოდის ინდუსტრიაში. ამჯერად, დიზაინერებმა ბროშებით მორთეს და გაახალისეს სხვადასხვა ფაქტურის ქურთუკები, მათ შორის ტყავის ქურთუკებიც. უპირატესობა მიანიჭეთ მეტალის მასიურ გულსაბნევებს.

გენდერული ნეიტრალიტეტი

თამამად შეგიძლიათ ატაროთ თქვენი პარტნიორის სათვალე, მამაკაცური სტილის ჯაჭვები, სამაჯურები ან სულაც მაჯის საათი. მსგავსი აქსესუარები თქვენს სისადავეს და ძლიერ ხასიათს უფრო მეტად გაუსვამს ხაზს და სხვების ყურადღებასაც მალე დაიმსახურებთ