სიცხეში, სტრესის ან ფიზიკური დატვირთვის დროს ოფლის გამოყოფა სრულიად ნორმალურია და უმრავლესობა ამ პრობლემას მარტივად უმკლავდება დეზოდორანტებისა თუ ანტიპერსპირანტების საშუალებით, მაგრამ ზოგისთვის ეს საკმარისი არ არის, ხშირად ოფლიანობა ზემოთჩამოთვლილი ფაქტორებითაც არ არის გამოწვეული და ის ადამიანს ჩვეულებრივ პირობებშიც შეიძლება აწუხებდეს - ასეთ ჭარბოფლიანობას ჰიპერჰიდროზს უწოდებენ.

ოფლიანობა – არ არის დაავადება, არც ჭარბი ოფლიანობა. ექიმების აზრით ჰიპერჰიდროზი ადამიანის ინდივიდუალურ თავისებურებას მიეკუთვნება, თუმცა, ალბათ ბევრმა არ იცის, რომ გარკვეული საკვების მიღებამ ასევე შეიძლება გამოიწვიოს ოფლიანობა.

ყავა და თბილი სასმელები

კოფეინი ასტიმულირებს ცენტრალურ ნერვულ სისტემას და აჩქარებს გულის კუნთის შეკუმშვას, რის შედეგადაც იზრდება არტერიული წნევა, ფიზიკური აქტივობის ეს იმიტაცია იწვევს ჭარბ ოფლიანობას. ამ საქმეში თავის როლს თამაშობს სასმელის ტემპერატურაც.



ცხელი ყავა, ჩაი ჯანჯაფილისა და თაფლის დამატებით ზრდის სხეულის ტემპერატურას, რაც კიდევ უფრო ზრდის ოფლიანობას. სხვათა შორის, მედიკამენტებმა, რომლებიც შეიცავს კოფეინს, ასევე შეუძლიათ გაზარდონ ჰიპერჰიდროზის გამოვლინებები, ეს გასათვალისწინებელია.

ცხარე საკვები და სანელებლები

წიწაკა, ნიორი და ძლიერი გემოს მქონე სანელებლები ენაზე მოხვედრისას ურთიერთქმედებენ გემოვნების რეცეპტორებთან და აგზავნიან ინფორმაციას ტვინში, რომ რაღაც ცხარე მიიღო ორგანიზმმა, კარგად ჩამოყალიბებული სისტემა კი მყისიერად პასუხობს სიგნალს, ორგანიზმში იმატებს ტემპერატურა და უხვი ოფლის გამოყოფაც არ აყოვნებს, ამიტომ უმჯობესია ზაფხულში თავი აარიდოთ ცხარე და ძლიერი გემოს მქონე საკვებს.

ალკოჰოლი და ენერგეტიკული სასმელები

ალკოჰოლის დალევა არა მხოლოდ იწვევს ეიფორიას, არამედ სერიოზული სტრესიც ხდება ადამიანის ორგანიზმისთვის.
ალკოჰოლი ზრდის სტრესს მთელ სხეულზე, იზრდება სხეულის ტემპერატურა, სისხლში შაქრის დონე იმატებს, ამასთან, ორგანიზმი ცდილობს ტოქსინის განდევნას, ამიტომ ღვიძლის, თირკმელების და გულის აქტივობა საგრძნობლად იმატებს, რის შედეგადაც ადამიანი ოფლიანდება.
ასევე, ენერგეტიკული სასმელები ასტიმულირებს ყველა სისტემის აქტივობას და ზრდის პულსის სიხშირეს.

როგორ ვებრძოლოთ გამოწვეულ ოფლიანობას?

თუ საკვებით მიღებული ჰიპერჰიდროზი იწვევს დისკომფორტს, მაშინ უპირველეს ყოვლისა აუცილებელია ზემოთ აღნიშნული პროდუქტების შეზღუდვა ან რაციონიდან გამორიცხვა, ასევე, მოერიდეთ ალკოჰოლსა და ყავას. საკვები არ უნდა იყოს ცხელი, უმჯობესია მიიღოთ თბილი, უარი თქვით მარილიან და ცხარე საკვებზე, შეზღუდეთ ალკოჰოლი.

თუ მკვეთრად გამოხატული ჰიპერჰიდროზი გაქვთ და ეს გიქმნით მწვავე დისკომფორტს, შეგიძლიათ გამოიყენოთ ბოტოქსის ინექციები. ბოტულინის ტოქსინი ბლოკავს ნერვულ იმპულსებს, რომლებიც აღწევს საოფლე ჯირკვლებში, ინექციის შემდეგ რამდენიმე დღეში მდგომარეობა საგრძნობლად უმჯობესდება. პროცედურა შეიძლება განმეორდეს ექვსი თვიდან ერთ წლამდე.



იმისათვის რომ არ შეგაწუხოთ ჭარბოფლიანობამ გაითვალისწინეთ შემდეგი რჩევები: რათა არ მოხდეს ჭარბოფლიანობის პროვოცირება გაითვალისწინეთ რამდენიმე რჩევა:

ატარეთ თავისუფალი სამოსი ბუნებრივი ნაჭრებისგან (ბამბა, ტილო) განსაკუთრებით ცხელ ამინდში.
ჩაიცვით წინდები დახურულ ფეხსაცმელზე.
გამოიყენეთ ანტიპერსპირანტები.
ხშირად მიიღეთ შხაპი.
მოერიდეთ სტრესულ სიტუაციებს.