გახსოვთ ყველასათვის საყვარელი პერსონაჟი „ალფალფა“ 1994 წლის ჰიტ-კომედიიდან „პატარა ყაჩაღები“ (The Little Rascals)? მისი როლის შემსრულებელი, ბაგ ჰოლი (Bug Hall), დღეს სრულიად განსხვავებული ცხოვრებით ცხოვრობს. 40 წლის ყოფილმა მსახიობმა ჰოლივუდურ ბრწყინვალებაზე უარი თქვა, „სიღარიბის აღთქმა“ დადო და ოჯახთან ერთად ცივილიზაციას მოწყვეტილ ადგილას დასახლდა.

„რადიკალური კათოლიკე ექსტრემისტი“

ბაგ ჰოლმა, რომლის ნამდვილი სახელი ბრენდონ როუანია, The Daily Mail-თან ინტერვიუში საკუთარ თავს „რადიკალური კათოლიკე ექსტრემისტი“ უწოდა.



მან გაყიდა მთელი თავისი ქონება, დახარჯა დანაზოგი და ცოლთან და ხუთ შვილთან ერთად არკანზასის შტატში, 80 ჰექტარ მიწის ნაკვეთზე დასახლდა. მისი მიზანია, სრულიად დამოუკიდებელი იყოს თანამედროვე სამყაროსგან:



ის თავად აშენებს სახლს, რომელსაც საკუთარი ჰიდროელექტროსადგური, წყალმომარაგება და ელექტრო სისტემა ექნება.

ნარკოტიკები და გარდატეხის მომენტი

მსახიობის ცხოვრებაში გარდატეხა 2020 წელს მოხდა, როდესაც ის პოლიციამ დააკავა. მიზეზი შოკისმომგვრელი იყო: ჰოლი ჰაერის გამწმენდი სპრეის (air duster) შესუნთქვისას გამოიჭირეს. მსახიობი აღიარებს, რომ მანამდე 15 წელი ფხიზლად იყო, თუმცა ჰოლივუდის „მაღალი ენერგიის“ გარემომ რამდენჯერმე გამოიწვია მისი რეციდივი.



„აღარ მინდოდა მემუშავა უაზრო სამსახურში, შემექმნა რაღაცები ხალხის გასართობად ან ყურადღების გადასატანად... მათ შორის საკუთარი თავის, როგორც ნარკოდამოკიდებულის,“ – ამბობს ჰოლი.

შვილები „ექსტრემისტებად“ უნდა გაიზარდონ

ყოფილი მსახიობი შვილებს სახლში თავად ასწავლის და აცხადებს, რომ მათ „ექსტრემისტებად“ ზრდის. ის კატეგორიულად ეწინააღმდეგება ტრადიციულ სკოლებსა და კოლეჯებს, რასაც „სისულელეს“ უწოდებს.
„ჩემი ცხოვრება იყო ერთი დიდი არაფერი.



ეს არ ყოფილა დიდი მსხვერპლი იმასთან შედარებით, რის მოცემასაც უფალი აპირებდა ჩემთვის ამ რადიკალური ცხოვრების სანაცვლოდ,“ – აღნიშნავს ის თავის YouTube ვიდეოში.

აღსანიშნავია, რომ მსახიობის მაგალითს მისმა დედამ, მამინაცვალმა და ძმამაც მიბაძეს – ისინიც იქვე, არკანზასის ტყეებში დასახლდნენ.