ყველასთვის ცნობილია ჯონ ლენონისა და იოკო ონოს ლეგენდარული, სკანდალური და პოლიტიკური მოვლენებით დატვირთული კავშირი. თუმცა, სანამ "The Beatles"-ის სოლისტი იოკოს ცხოვრებაში გამოჩნდებოდა, ავანგარდისტმა ხელოვანმა რთული და დრამებით აღსავსე გზა გაიარა.

იოკო ონოს პირველი ორი ქორწინება მუსიკას, ხელოვნებას და ერთ დიდ ტრაგედიას - შვილის გატაცებას უკავშირდება.

პირველი ქმარი - იაპონელი კომპოზიტორი და საერთო გატაცება

იოკომ თავისი პირველი სიყვარული, იაპონელი კომპოზიტორი ტოში იჩიანაგი, ნიუ-იორკში, პრესტიჟულ ჯულიარდის სკოლაში სწავლისას გაიცნო. მათი კავშირი ექსპერიმენტულმა მუსიკამ შექმნა. ტოში მოგვიანებით იაპონური მოდერნისტული მუსიკის წამყვანი ფიგურა გახდა.



წყვილმა 1956 წელს იქორწინა. ეს ქორწინება 6 წელს გაგრძელდა და 1962 წელს განქორწინებით დასრულდა. ტოში იჩიანაგი 2022 წელს, 89 წლის ასაკში გარდაიცვალა, თუმცა იოკოს ცხოვრებაში მან წარუშლელი კვალი დატოვა, როგორც ხელოვანმა, რომელმაც მასთან ერთად დაიწყო შემოქმედებითი ძიებები.

კაცი, რომელზეც იოკო ორჯერ დაქორწინდა

იოკო ონოს მეორე ქორწინება ნამდვილ „იურიდიულ ლაბირინთს“ ჰგავდა. მან ამერიკელი კინოპროდიუსერი და ხელოვანი ენტონი კოქსი 1962 წელს გაიცნო. მათ იმავე წლის ნოემბერში იქორწინეს, თუმცა რამდენიმე თვეში ქორწინება ანულირებული იქნა - მიზეზი იოკოს წინა ქმართან დაუსრულებელი განქორწინების პროცესი იყო.



როგორც კი საბუთები მოწესრიგდა, 1963 წლის ივნისში, მათ ხელახლა დაიწერეს ჯვარი. ამავე წლის აგვისტოში წყვილს ქალიშვილი - კიოკო ჩან კოქსი შეეძინა. თუმცა, ხელოვანთა კავშირი მყიფე აღმოჩნდა და ისინი 1969 წელს დაშორდნენ - სწორედ იმ წელს, როდესაც იოკომ ჯონ ლენონზე იქორწინა.

23-წლიანი განშორება გატაცებულ შვილთან

იოკო ონოს ცხოვრების ყველაზე დიდი ტკივილი სწორედ მეორე ქორწინებას უკავშირდება. 1971 წელს, როდესაც პატარა კიოკო 8 წლის იყო, მამამისმა, ენტონი კოქსმა, ბავშვი გაიტაცა და გაუჩინარდა.



იოკო და ჯონ ლენონი წლების განმავლობაში უზარმაზარ თანხებს ხარჯავდნენ გოგონას საპოვნელად, თუმცა უშედეგოდ. იოკო მოგვიანებით იხსენებდა: „ჩემს გულში ყოველთვის იყო ცარიელი ადგილი“.



დედა-შვილმა ერთმანეთი მხოლოდ 1994 წელს იპოვა, მას შემდეგ, რაც კიოკოს თავად შეეძინა შვილები და დედასთან დაკავშირება გადაწყვიტა.

იოკო ონო დღეს: სიმშვიდე 93 წლის ასაკში

დღეს იოკო ონო საზოგადოებაში იშვიათად ჩნდება. მან დატოვა ნიუ-იორკის ხმაურიანი ცენტრი და ცნობილი „დაკოტას“ შენობა, სადაც ლენონთან ერთად ცხოვრობდა. 93 წლის ხელოვანი ახლა ფერმაში ცხოვრობს, რომელიც მან და ჯონმა 1978 წელს შეიძინეს.



ის სიმშვიდესა და ბუნებაში ატარებს დროს, შორს იმ სკანდალებისგან, რომლებიც მას ათწლეულების განმავლობაში სდევდა.