ჯეისონ სტეითემი და როზი ჰანტინგტონ-უაიტლი, რომლებიც წლებია ჰოლივუდის ერთ-ერთ ყველაზე სტაბილურ და გავლენიან წყვილად ითვლებიან, საცხოვრებლად მშობლიურ ბრიტანეთს უბრუნდებიან.

წყვილმა სამხრეთ ინგლისის სანაპიროზე 20 მილიონ გირვანქა სტერლინგად შეფასებული მამული შეიძინა, რომელსაც ახლა საკუთარი გემოვნებით, დამატებით 5 მილიონად აკეთილშობილებენ.

პრივატული სამოთხე 20 ჰექტარზე

Land Registry-ის მონაცემებით, სტეითემმა თანამედროვე სტილის ვილა ჯერ კიდევ 2024 წელს იყიდა, თუმცა მასშტაბური სარეკონსტრუქციო სამუშაოები დღემდე გრძელდება. საცხოვრებელი კომპლექსი ნამდვილი ციხესიმაგრეა სიმშვიდის მოყვარულთათვის: მამულს აქვს პირადი პლაჟი, საკუთარი ტბა ნავით გასასეირნებლად და ბუნებრივი აუზი „ველური ცურვისთვის“.

განსაკუთრებული აქცენტი ბავშვებზე გაკეთდა - ტერიტორიაზე შენდება გიგანტური სახლი ხეზე, რაც წყვილის ორი შვილისთვის მთავარი გასართობი ადგილი გახდება.

ოცნება სოფლის სიმშვიდეზე

მიუხედავად იმისა, რომ როზი ჰანტინგტონ-უაიტლი მსოფლიო მოდის ინდუსტრიის ცენტრში ტრიალებს, აღმოჩნდა, რომ მისი მთავარი სურვილი ყოველთვის ბუნებასთან სიახლოვე იყო. „სახლიდან წასვლის დღიდან ამაზე ვოცნებობდი - ტალახი და ხეებზე მცოცავი ბავშვები,“ - აცხადებს მოდელი.

ფინანსური იმპერია და პირადი ფილოსოფია

წყვილის საერთო ქონება 120 მილიონ გირვანქა სტერლინგს აჭარბებს. 58 წლის სტეითემი, რომელმაც სახელი საკულტო ფილმებით გაითქვა, თავის წარმატებას მარტივი ფორმულით ხსნის: ბევრი შრომა, კარგი გარემოცვა და ერთგულება.

ახალი მამული სწორედ ამ ფილოსოფიის გაგრძელებაა - ადგილი, სადაც ჰოლივუდური „მძიმეწონოსანი“ და მოდის ხატი გლამურული ცხოვრებიდან სიმშვიდეში გადაინაცვლებენ. მამული მათ ლონდონის, ჰოლივუდისა და კორნუოლის უძრავი ქონების შთამბეჭდავ კოლექციას შეემატება.