2018 წლის მაისში, უინძორის დიდებულ სასახლეში გამართული პრინც ჰარისა და მეგან მარკლის ჯვრისწერა ნამდვილ ზღაპარს ჰგავდა. სამეფო ოჯახის წევრებთან ერთად, ეკლესიის სამლოცველოს სკამებს ჰოლივუდის ყველაზე კაშკაშა ვარსკვლავები ამშვენებდნენ.



ოპრა უინფრი, ჯორჯ და ამალ კლუნები, დევიდ და ვიქტორია ბექჰემები, სერენა უილიამსი და იდრის ელბა - თითოეული მათგანი აღფრთოვანებით ადევნებდა თვალს ახალი სამეფო წყვილის დაბადებას. თუმცა, სულ რაღაც რვა წელიწადში, ეს ბრწყინვალე და ერთი შეხედვით ურყევი მეგობრობის ჯაჭვი სრულად დაიმსხვრა.



ინსაიდერები ირწმუნებიან, რომ სასექსის ჰერცოგსა და ჰერცოგინიას ჰოლივუდის ელიტასთან ყველა ხიდი დაწვეს და მათ ორბიტაზე თითქმის აღარავინ დარჩა. რაც ყველაზე პარადოქსულია, თავად წყვილი ამ იზოლაციაში საკუთარ ბრალს საერთოდ ვერ ხედავს.

გავლენიანი ამერიკელი ტელეწამყვანის, ოპრა უინფრისა და მეგანის ურთიერთობა, რომელიც 2021 წლის სკანდალური და გულწრფელი ინტერვიუთი დაგვირგვინდა, დღეს საგრძნობლად არის გაცივებული.

მიუხედავად იმისა, რომ მეგანი ოპრას მამულს ხშირად სტუმრობდა, მათ შორის ძველი სიახლოვე აღარ იგრძნობა. კულუარებში ამბობენ, რომ ოპრა  დისტანციას ინარჩუნებს - მან კარგად დაინახა, რომ ამ სკანდალურ წყვილთან ასოცირებამ მისი, როგორც მიუკერძოებელი და ობიექტური ინტერვიუერის რეპუტაცია შელახა.

დღეს ოპრა წყვილს მხოლოდ იმ მიზნით არ უშვებს ძალიან შორს, რომ მომავალში, შესაძლო განქორწინების ან მორიგი ოჯახური დრამის შემთხვევაში, პირველმა მოიპოვოს მათთან ექსკლუზიური ინტერვიუს უფლება.

ამ ცივ, ანგარიშიან დამოკიდებულებაზე ისიც მეტყველებს, რომ ოპრას არც მეგანის ახალი მედიაპროექტებისთვის დაუჭერია მხარი და არც მისი წიგნი წარუდგენია საკუთარ მრავალმილიონიან წიგნის კლუბში.

არანაკლებ დრამატულად დასრულდა მეგობრობა ჯორჯ და ამალ კლუნებთან. ქორწილის შემდეგ, ახალდაქორწინებულები კლუნების კერძო თვითმფრინავით იტალიაში, კომოს ტბაზე მდებარე მდიდრულ ვილაზეც კი სტუმრობდნენ მასპინძლებს, თუმცა, მას შემდეგ, რაც ჰარიმ და მეგანმა სამეფო ვალდებულებებზე უარი თქვეს, კლუნებმა მათთან ყოველგვარი კავშირი გაწყვიტეს.



ინსაიდერების თქმით, წყვილი მიჩვეული იყო მეგობრებისგან მუდმივად ძვირადღირებული საჩუქრების, კერძო ფრენებისა და ფინანსური რესურსების მიღებას, რადგან მიიჩნევდნენ, რომ მათ გარემოცვაში ყოფნა სხვებისთვის პრივილეგია იყო.

შოუბიზნესის კულუარებში მეგანს საოცრად ხელმომჭირნესა და მომთხოვნს უწოდებენ, რამაც ჰოლივუდის მაღალი საზოგადოება დაღალა. ამასთან, კლუნები, ისევე როგორც მსახიობი იდრის ელბა, მეფე ჩარლზის საქველმოქმედო ფონდის ერთგული მხარდამჭერები არიან და ბუნებრივია, არჩევანი ნამდვილი ბრიტანული მონარქიის სასარგებლოდ გააკეთეს.

ცნობილ მეუღლეებთან, დევიდ და ვიქტორია ბექჰემებთან არსებული მრავალწლიანი მეგობრობაც წარსულს ჩაბარდა. კონფლიქტის მიზეზი მეგანის ეჭვიანობა გახდა - მან ვიქტორია პრესაში მათი პირადი ცხოვრების დეტალების გაჟონვაში დაადანაშაულა, რამაც დევიდ ბექჰემის დიდი გულისწყრომა გამოიწვია.



მას შემდეგ ბექჰემები უფლისწულ უილიამსა და მეფე ჩარლზს კიდევ უფრო დაუახლოვდნენ, ჰარისთან კავშირი კი უბრალოდ გაქრა. მსგავსი ბედი ეწია ჩოგბურთის ლეგენდა სერენა უილიამსსაც; მიუხედავად იმისა, რომ ის მეგანის ერთ-ერთ უახლოეს ადამიანად ითვლებოდა, დღეს ისიც დისტანცირებულია, რადგან, როგორც ინსაიდერები აღნიშნავენ, სერენა უბრალოდ დაიღალა მეგანის გარშემო არსებული გაუთავებელი ინტრიგები და ხელოვნური დრამები.

მეგანის ყოფილი აგენტი ჯერ კიდევ წლების წინ, მის ვარსკვლავობამდე აღნიშნავდა, რომ მეგანს საოცარი უნარი აქვს - ადვილად დაივიწყოს ადამიანები და ყოველგვარი სინდისის ქენჯნის გარეშე იაროს წინ. დღეს, როდესაც წყვილის გარშემო მხოლოდ რამდენიმე ისეთი ადამიანია დარჩენილი, ვინც მათგან პირად სარგებელს ელის, ნათლად ჩანს, რომ ჰოლივუდის დიდებულმა ელიტამ ზურგი შეაქცია მათ, ვინც ერთ დროს სამეფო გვირგვინითა და ვარსკვლავური მომავლით იწონებდა თავს.