ყველას ჰყავს მისაბაძი ადამიანი. ალბათ, გამონაკლისი არც თქვენ ხართ. ესაა პიროვნება, რომლებითაც აღფრთოვანებული ხართ და გსურთ მას ჰგავდეთ. ის შესაძლოა იყოს თქვენი მეგობარი, ოჯახის წევრი, ცნობილი სახე ან ისტორიული პიროვნება. ისაა ადამიანი, რომელიც თქვენ შთაგაგონებთ. მაგრამ თუ დაფიქრდებით, აღმოაჩენთ, რომ სხვისთვის მისაბაძი ადამიანი, თქვენც შეიძლება გახდეთ. როგორ? მოდით, ნაბიჯ-ნაბიჯ განვიხილოთ.

1. იყავით ავთენტური

პირველი, რაც უნდა გახსოვდეთ, არის ის, რომ უნდა იყოთ საკუთარი თავის ერთგული და აკეთოთ ის, რაც გიტაცებთ. ძალიან ძნელია წარმატების მიღწევა, როცა დროის უმეტეს ნაწილს უთმობთ საქმეებს, რომლებიც ნაკლებად გაინტერესებთ. ამას ხომ დიდი ენერგია სჭირდება!

იყავით ავთენტური. გამოთქვით თქვენი აზრი, მიჰყევით გულის ძახილს, იცხოვრეთ თქვენი ცხოვრებით და ყურადღება დაუთმეთ იმას, რაც ნამდვილად მნიშვნელოვანია.

2. აჩვენეთ კომპეტენცია

მისაბაძი მხოლოდ ის ადამიანი გახდება, რომელიც არის ნამდვილი ექსპერტი იმაში, რასაც აკეთებს და აქვს ხედვა, თუ რისკენ მიისწრაფვის. ეს არ ნიშნავს რომ თქვენ უნდა იყოთ ნობელის პრემიის ლაურეატი ან თქვენი სფეროს უმაღლესი ლიდერი. მაგრამ ეს ნიშნავს, რომ თქვენ უნდა გქონდეთ კომპეტენცია იმ საქმეში, რასაც აკეთებთ.

3. იყავით მენტორი

გაუზიარეთ თქვენი ცოდნა სხვა ადამიანებს და ისაუბრეთ თქვენი ცხოვრებისეული მოგზაურობის შესახებ. ისაუბრეთ გულწრფელად და ხმამაღლა თქვით, თუ რა იყო ამ გზაზე ადვილი და რა რთული, რა დაგეხმარათ და რამ შეგაფერხათ. ისაუბრეთ, თუ რა ისწავლეთ და რა შეცდომა დაუშვით. გააზიარეთ თქვენი გზა და ხალხი თქვენით აღფრთოვანებული დარჩება.

4. იყავით თანმიმდევრული თქვენს ღირებულებებთან

კიდევ ერთი მნიშვნელოვანი მახასიათებელი, რაც მისაბაძ ადამიანებს აქვთ, არის ღირებულებათა სისტემა. ჩვენ ვხედავთ, თუ რამდენად მძიმედ შეიძლება დაეცეს ადამიანი, როდესაც არღვევს თავის ერთ-ერთ კარდინალურ ღირებულებას. იყოთ სანდო, მყარი და ღირსეული ადამიანი, არის წინაპირობა იმისა, რომ მისაბაძი ადამიანიც გახდებით.

პირველი ნაბიჯი არის იმის დადგენა, თუ რა არის თქვენი ძირითადი ღირებულებები და როგორ აჩვენებთ მათ თქვენს საქმიანობაში. თუ თქვენ აფასებთ ოჯახს, პირველ ადგილზე აყენებთ ოჯახს? თუ ჯანმრთელობაზე ზრუნავთ, ამას ამტკიცებთ თქვენი ცხოვრების წესით? იმისთვის, რომ იყოთ მისაბაძი მაგალითი, თქვენ უნდა იცხოვროთ თქვენი ღირებულებებით. ეს დააახლოებს ადამიანებს თქვენთან და დაგეხმარებათ, რომ თქვენს სიტყვას, ნამდვილად ჰქონდეს ფასი.

5. გარკვეულწილად, იყავით დაუცველი

მისაბაძი პიროვნება არ არის ის, ვინც იდეალურად გამოიყურება, რადგან რეალურად არავინაა სრულყოფილი. ვინც ცდილობს სრულყოფილების წარმოჩენას, ადრე თუ გვიან, წარუმატებლობისთვისაა განწირული. მისაბაძი შეიძლება იყოს ის, ვინც აჩვენებს, რომ ცხოვრება ბრძოლაა.

დაუცველობა დაგეხმარებათ, რომ ადვილად დაამყაროთ სხვა ადამიანებთან ემოციური კავშირი და ადვილად მოიპოვოთ სასურველი აღიარება. შიში, წარუმატებლობა, შეცდომა - ეს ხომ ის საკითხებია, რაც ყველა ადამიანს აერთიანებს. ამიტომ, ნუ შეგეშინდებათ, იყავით დაუცველი და აჩვენეთ სხვებს თქვენი ადამიანური მხარე.