რომანტიკული ურთიერთობის დასაწყისში, როგორც წესი, არ არსებობს სირთულეები სექსთან დაკავშირებით, თუმცა, დროთა განმავლობაში, ინტიმურობის ინტენსივობა შეიძლება შემცირდეს. სურვილის თავისთავად გაჩენის მოლოდინი ზოგჯერ ზედმეტ წუხილს იწვევს: ადამიანი იწყებს ფიქრს, რომ მას რაღაც სჭირს ან სიყვარული გაქრა.

მნიშვნელოვანია გვესმოდეს, რომ სექსუალური მიზიდულობა მრავალ ფაქტორზეა დამოკიდებული. ზოგიერთისთვის სექსის სურვილი შეიძლება კომპლიმენტებით ან მსუბუქი შეხებით წარმოიშვას, ზოგს კი მეტი სტიმული სჭირდება აგზნებისთვის.
სექსის დაგეგმვა პარტნიორებს შორის სურვილისა და ვნების შენარჩუნების მთავარი ფაქტორია. გარდა ამისა, ამ მიდგომას არაერთი მნიშვნელოვანი უპირატესობა აქვს.

რეგულარული სექსი

დროთა განმავლობაში, ცხოვრებისეული თუ სხვა გამოწვევების ფონზე შესაძლოა წყვილებს შორის სექსუალური კონტაქტების სიხშირე შემცირდეს, თუმცა, სექსუალური აქტის კონკრეტული ნორმა არ არსებობს - პარტნიორები თავად ირჩევენ რიტმს, რომელიც მათ ტემპერამენტს შეესაბამება.
სექსის დაგეგმვა საშუალებას გაძლევთ შეინარჩუნოთ სტაბილურობა ინტიმურ ცხოვრებაში, რაც ხელს უწყობს ურთიერთობების განმტკიცებას და კმაყოფილების დონის ამაღლებას.

მოლოდინის ტკბილი გრძნობა

სექსუალური აქტის წინასწარ დაგეგმვით, სასიამოვნო მოლოდინში ვართ და კალენდარზე დღეებს ვითვლით. მოახლოებულ სექსზე ფიქრები შეიძლება ერთგვარ პრელუდიად იქცეს, გააღვიძოს თქვენი სექსუალური ფანტაზია და გაათბოს სურვილი.

სპონტანურობა

სპონტანური ინტიმურობა ყოველთვის არ გულისხმობს პრელუდიას და სექსამდე აგზნებისთვის საკმარის დროს. ეს შეიძლება არ იყოს საკმარისი მაქსიმალური სურვილის მისაღწევად, რაც ბუნებრივად იმოქმედებს სექსის ხარისხსა და შედეგზე. სპეციალურად გამოყოფილმა დრომ შეიძლება გადაჭრას ეს პრობლემა და დაგეხმაროთ მეტი დრო დაუთმოთ პრელუდიას.

ძლიერი კავშირი პარტნიორთან

თქვენ იგრძნობთ, თუ როგორ ძლიერდება თქვენი კავშირი პარტნიორთან, თუ ორივე ეცდებით რომ ერთად იყოთ. სექსის დაგეგმვისას წყვილები ირჩევენ ყველაზე შესაფერის დროს, რათა ოჯახურმა ან სხვა საყოფაცხოვრებო საკითხებმა ხელი არ შეუშალოს რომანტიკასა და მარტო გატარებულ დროს. ეს პოზიცია ხელს უწყობს პარტნიორთან პირადი დროის „ლეგიტიმაციას“ და მეორეხარისხოვანი საქმეების გვერდზე გადადებას, რამაც შესაძლოა შთანთქოს და მოკლას რომანტიკა.
ძლიერი და ახლო კავშირის სურვილი პარტნიორთან ქმნის განსაკუთრებულ სიახლოვეს, რაც აჩვენებს, რამდენად მნიშვნელოვანია ერთმანეთთან დროის გატარება.

როგორ დავგეგმოთ სექსი?

შემოიტანეთ ახალი იდეები

დაფიქრდით, რამ შეიძლება გააკვირვოს ან გაახაროს თქვენი პარტნიორი? ეს შეიძლება ყოველთვის არ იყოს ინტიმურობა, ეს ასევე შეიძლება იყოს მასაჟი ან რომანტიკული ვახშამი გულწრფელი საუბრებით.

ჩართეთ ხალისი

სასურველი თარიღის წინა დღეს შეგიძლიათ ჩართოთ ხალისი და ფლირტი, რითაც გაიზრდება ინტერესი შეხვედრის მიმართ. შეგიძლიათ ახალ სექსუალურ საცვლებზეც იფიქროთ, ეს გააღვივებს სექსუალური ინტერესს პარტნიორში.

გაუზიარეთ ერთმანეთს სურვილები

გაუზიარეთ ერთმანეთს ისეთი პრეფერენციები, რომელთა გამოთქმისაც ადრე გეშინოდათ. ეს ყველაფერი გააღვიძებს სურვილს, რაც აქამდე არ არსებობდა.
რა თქმა უნდა, ინტიმურ ცხოვრებაში ყველა პრობლემის ერთი ხელის მოსმით გადაჭრა შეუძლებელია. ზოგჯერ საჭიროა უთანხმოებების მოგვარება, ყოველდღიური რუტინის შეცვლა ან სიახლის დამატება. თუმცა, სექსუალური ცხოვრებისადმი შეგნებული მიდგომა უკეთესია, ვიდრე პრობლემის იგნორირება. მნიშვნელოვანია გვახსოვდეს, რომ ურთიერთობებში ჰარმონია ერთობლივი ძალისხმევის შედეგია.