1 იანვარი წლის ყველაზე მშვიდი და ნელი დღეა. დღეს ყველაფერი დასაშვებია: გვიან გაღვიძება, პიჟამათი სიარული და გოზინაყის დაუსრულებელი მარაგი. თუმცა, როცა საქმე ფილმის შერჩევაზე მიდგება, ხშირად „მარტო სახლში“ ან „რეალური სიყვარულის“ გადამეორება მოგვბეზრდა.

თუ გრძნობთ, რომ წელს ახალი ემოციები და განსხვავებული ვიზუალური ესთეტიკა გჭირდებათ, Trend-ის რედაქციამ მოგიმზადათ სია, რომელიც არცერთ სტანდარტულ დეკემბრის პლეილისტში არ შეგხვედრიათ. ეს ფილმები დაგეხმარებათ, წლის პირველი დღე ლამაზად, მოტივაციითა და სიმშვიდით დაიწყოთ.

1. Little Women (პატარა ქალები)



გრეტა გერვიგის ეს ვერსია ნამდვილი ვიზუალური დღესასწაულია. ფილმი არა მხოლოდ საახალწლო განწყობას ქმნის, არამედ ოჯახურ სითბოზე, დამოუკიდებლობასა და საკუთარი გზის პოვნაზე გვიყვება. 1 იანვრისთვის იდეალურია თავისი თბილი ფერებითა და გულწრფელი ემოციებით.

2. The Grand Budapest Hotel (სასტუმრო გრანდ ბუდაპეშტი)



თუ თქვენთვის კინო, პირველ რიგში, ესთეტიკაა, უეს ანდერსონის ეს შედევრი სწორედ თქვენთვისაა. ფერადოვანი და ცოტა ირონიული თავგადასავალი საუკეთესო „ვიზუალური ვიტამინია“ იანვრის ცივი დღისთვის. ის სადღესასწაულო განწყობას სულ სხვა რაკურსით დაგანახებთ.

3. Midnight in Paris (შუაღამე პარიზში)



ვუდი ალენის ეს ფილმი მათთვისაა, ვისაც წლის დასაწყისში ცოტაოდენი მაგია და მოგზაურობა სურს. პარიზი, ხელოვნება, ნოსტალგია და იმის გააზრება, რომ „აქ და ახლა“ ყოფნა ყველაზე დიდი ბედნიერებაა. იდეალურია ახალი მიზნების დასახვამდე დასაფიქრებლად.

4. The Secret Life of Walter Mitty (უოლტერ მიტის საიდუმლო ცხოვრება)



ეს არის საუკეთესო მოტივაცია მათთვის, ვინც 2026 წელს ცხოვრების შეცვლას აპირებს. ამბავი ადამიანზე, რომელიც ოცნებობიდან მოქმედებაზე გადადის. ისლანდიის საოცარი ხედები და ენერგიული საუნდტრეკები ძალას მოგცემთ, რომ ხვალიდან (ან თუნდაც დღეიდან) ახალი ენერგიით დაიწყოთ მოქმედება.

5. Julie & Julia (ჯული და ჯულია)



კულინარია, პარიზი, ნიუ-იორკი და მერილ სტრიპის შეუდარებელი ენერგია. ფილმი იმაზე, თუ როგორ შეუძლია საყვარელ ჰობის თქვენი ცხოვრების გარდაქმნა. 1 იანვარს, როცა სუფრასთან ისედაც ბევრ დროს ვატარებთ, ეს ისტორია განსაკუთრებულ პოზიტივს მოგიტანთ.