ჩინელმა მკვლევარებმა აღმოაჩინეს, რომ მხოლოდ ერთი აქტიური ჩვევა - ველოსიპედით რეგულარული სიარული, მნიშვნელოვნად ამცირებს დემენციისა და ალცჰაიმერის დაავადების რისკს, ველოსიპედით ხშირი სიარული შეიძლება იყოს ინვესტიცია არა მხოლოდ თქვენი ფიზიკური ჯანმრთელობისთვის, არამედ თქვენი ტვინის ჯანმრთელობისთვისაც.

ეს ჰუაჟონგის მეცნიერებისა და ტექნოლოგიების უნივერსიტეტის მეცნიერებმა აღმოაჩინეს.

ამგვარად, მათ, ვინც ველოსიპედით გადაადგილებას ტრანსპორტირების ძირითად საშუალებად ირჩევდა, საშუალოდ 19%-ით დაბალი რისკი ჰქონდათ დემენციის ნებისმიერი ტიპის განვითარების, იმათთან შედარებით, ვინც სხვა სატრანსპორტო საშუალებით მგზავრობდა.

რისკი კიდევ უფრო მაღალი იყო ე.წ. ახალგაზრდული დემენციის შემთხვევაში - ფორმა, რომელიც 65 წლამდე ასაკის ადამიანებს აწუხებთ. ამ შემთხვევაში, რისკი თითქმის 40%-ით დაბალი იყო აქტიურ ველოსიპედისტებს შორის.



ხოლო ალცჰაიმერის დაავადების შემთხვევაში, ველოსიპედით გადაადგილება მისი განვითარების შანსებს 22%-ით ამცირებს. აღსანიშნავია, რომ ეს დაავადება მსოფლიოში დემენციის ყველაზე გავრცელებულ მიზეზად ითვლება. ჯანმო-ს მონაცემებით, მსოფლიოში 55 მილიონი ადამიანი ცხოვრობს დემენციით, რომელთა 60%-ზე მეტი ამ სინდრომით არის გამოწვეული.

ამიტომ, მნიშვნელოვანია ამ დაავადების ახალგაზრდა ასაკში განვითარების პოტენციური რისკის შემცირება. ალცჰაიმერის დაავადების საერთაშორისო ორგანიზაციის ანგარიშის თანახმად, ამჟამად ადრეული დემენციის დაახლოებით 35,6 მილიონი შემთხვევაა და ეს მაჩვენებელი 2050 წლისთვის გასამმაგდება.
მეცნიერები თვლიან, რომ ველოსიპედით სეირნობა ჩვენს ტვინს დაავადებებისგან რამდენიმე მიზეზის გამო იცავს:



1. ფიზიკური აქტივობა ზრდის სისხლის მიმოქცევას, რაც ამცირებს ტვინში ანთებას და ააქტიურებს ტვინის უჯრედებს. გარდა ამისა, კარდიო ვარჯიში ხელს უწყობს ქრონიკული დაავადებების (როგორიცაა სიმსუქნე) წინააღმდეგ ბრძოლას, რომელიც ცნობილია, როგორც დემენციის რისკ-ფაქტორი.

2. ველოსიპედით სეირნობა თავისთავად მოითხოვს კონცენტრაციას, მარშრუტის დაგეგმვას და საგზაო სიტუაციებზე სწრაფ რეაგირებას - სხვა სიტყვებით რომ ვთქვათ, ის არა მხოლოდ ფეხებს, არამედ ტვინის ნეირონებსაც ავარჯიშებს.

მაგალითად, ველოსიპედით სეირნობისა და მუსიკის ერთდროულად მოსმენისას, თანაბრად არის ჩართული თავის ტვინის მოტორული ქერქი, ნათხემი, პარიეტალური წილი, პრეფრონტალური ქერქი, სმენის ცენტრები და ლიმბური სისტემა.



საინტერესოა, რომ ჰიპოკამპიც კი - ტვინის ის რეგიონი, რომელიც პასუხისმგებელია მეხსიერებასა და სწავლაზე - საშუალოდ უფრო დიდი იყო ველოსიპედისტებში.

ამიტომ, კვლევაში მეცნიერები ხაზს უსვამენ, რომ მათი დასკვნები უნდა იყოს მოწოდება ადამიანებისთვის მოქმედებისკენ.

გადაადგილების ისეთ რეჟიმებზე გადასვლა, რომლებიც მოითხოვს ფიზიკურ აქტივობას, განსაკუთრებით ზრდასრულ ასაკში, შეიძლება იყოს შესანიშნავი სტრატეგია ტვინის ჯანმრთელობის შენარჩუნების გრძელვადიან პერსპექტივაში.

უფრო მეტიც, ეს ბევრად უფრო ხელმისაწვდომია, ვიდრე სპორტდარბაზში სიარული, რადგან არ გჭირდებათ ბევრი ფულის გადახდა - უბრალოდ ერთხელ უნდა შეიძინოთ ველოსიპედი.

ავტორებმა გააანალიზეს დაახლოებით 56 წლის ასაკის 479,723 მონაწილის მონაცემები, მათ შორის როგორც მამაკაცები, ასევე ქალები. ჰკითხეს მათ, თუ რა ტრანსპორტით ისარგებლეს ბოლო ოთხი კვირის განმავლობაში და შემდეგ 13 წლის განმავლობაში აკვირდებოდნენ მათ ჯანმრთელობას, აღრიცხავდნენ დემენციისა და ალცჰაიმერის დაავადების ყველა შემთხვევას.