ბექჰემების ოჯახში ატეხილი სკანდალი, რომელმაც პიკს 19 იანვარს მიაღწია, ახალ ფაზაში გადადის. მას შემდეგ, რაც ბრუკლინ ბექჰემმა „ინსტაგრამზე“ მშობლებთან მრავალწლიანი კონფლიქტის დეტალები საჯაროდ გამოიტანა, დუმილი მისმა მილიარდერმა სიმამრმა, ნელსონ პელტცმა დაარღვია.

„ეს სულ სხვა ისტორიაა“

83 წლის ბიზნესმენმა ვესტ პალმ ბიჩში გამართულ ღონისძიებაზე ჟურნალისტების კითხვებს უპასუხა. მიუხედავად იმისა, რომ ის ცდილობდა დიპლომატიური ყოფილიყო, მისი სიტყვებიდან ნათლად ჩანდა, რომ ბექჰემებთან ურთიერთობა დაძაბულია.



„ჩემი ქალიშვილი და ბექჰემები - ეს სულ სხვა ისტორიაა და დღეს ამის განხილვას აქ არ ვაპირებ“, - განაცხადა პელტცმა.
მილიარდერმა დასძინა, რომ ბრუკლინი შესანიშნავი სიძეა და მას და ნიკოლას ბედნიერ ქორწინებას უსურვებს. კითხვაზე, აძლევს თუ არა წყვილს რჩევებს რთულ პერიოდში, მან უპასუხა: „რა თქმა უნდა, ზოგჯერ ისინიც კი მაძლევენ რჩევებს“.

მილიონიანი „ალიმენტი“ თუ დამოუკიდებლობის ოცნება?

სკანდალს ცეცხლი ნელსონ პელტცის ქონებამაც შემატა. გავრცელდა ხმები, თითქოს მილიარდერი საკუთარ ქალიშვილს თვეში 1 მილიონ დოლარს აძლევს ჯიბის ფულად. თუმცა, წყაროებმა ეს ინფორმაცია კატეგორიულად უარყვეს და „ჰაერიდან მოტანილი ჭორი“ უწოდეს.



მეორე მხრივ, პოდკასტში The Rest Is Entertainment აღინიშნა, რომ დევიდ და ვიქტორია ბექჰემებს სურთ, ბრუკლინი ფინანსურად დამოუკიდებელი გახდეს, ნაცვლად იმისა, რომ მუდმივად მშობლების ან სიმამრის იმედად იყოს.

ბექჰემების დუმილი

სანამ ბრუკლინი და მისი სიმამრი საჯარო კომენტარებს აკეთებენ, დევიდ და ვიქტორია ბექჰემები სრულ დუმილს ინარჩუნებენ.



შეგახსენებთ, რომ ბრუკლინის მტკიცებით, კონფლიქტი მის ქორწილამდე ბევრად ადრე დაიწყო და მას შემდეგ სიტუაცია მხოლოდ გაუარესდა.