ოვულაციის კონტროლი მხოლოდ მათთვის არ არის მნიშვნელოვანი, ვისაც დაორსულება სურს. ეს პროცესი საკუთარი ორგანიზმის უკეთ გაცნობაში, ციკლის დარღვევების აღმოჩენასა და რეპროდუქციული ჯანმრთელობის მართვაში გვეხმარება.

თუმცა, ხშირად ტესტი შეცდომით ტარდება, რაც მცდარ პასუხამდე მიგვიყვანს. რა უნდა ვიცოდეთ პროცესის სწორად სამართავად.

როგორ მივხვდეთ ოვულაციის მოახლოებას ტესტის გარეშე?

სანამ ტესტს გამოიყენებთ, დააკვირდით თქვენს სხეულს. ოვულაციის დამახასიათებელი ნიშნებია:

• გამონადენის ცვლილება: ის ხდება უფრო უხვი, გამჭვირვალე და წელვადი (ჰგავს უმი კვერცხის ცილას).

• ოვულატორული სინდრომი: ხანმოკლე, ყრუ ტკივილი მუცლის ქვედა არეში (მარჯვნივ ან მარცხნივ, იმის მიხედვით, თუ რომელ საკვერცხეში მომწიფდა ფოლიკული).

• ლიბიდოს მატება: ბუნებრივი მოთხოვნილება, რომელიც ოვულაციას ახლავს.

როგორ მუშაობს ტესტი?

ყველა თანამედროვე ტესტი აფიქსირებს ლუტეინიზირებელი ჰორმონის (LH) პიკს. ამ ჰორმონის მკვეთრი მატება ხდება კვერცხუჯრედის გამოსვლამდე დაახლოებით 24-48 საათით ადრე.
არსებობს რამდენიმე სახის ტესტი: ჩვეულებრივი ჩხირები, ჭავლური ტესტები (უფრო ჰიგიენურია) და ციფრული სისტემები, რომლებიც ეკრანზე მკაფიოდ გიჩვენებთ პასუხს.

5 გავრცელებული შეცდომა, რომელიც პასუხს ცვლის

გინეკოლოგი ასახელებს იმ მიზეზებს, რის გამოც ტესტმა შეიძლება მოგატყუოთ:

1. დილის შარდის გამოყენება: ორსულობის ტესტისგან განსხვავებით, ოვულაციის ტესტი არ კეთდება დილის პირველ შარდზე. ჰორმონის პიკის დასაფიქსირებლად საუკეთესო დროა დილის 10-დან საღამოს 8 საათამდე პერიოდი. სასურველია ტესტის გაკეთება დღეში ორჯერ - დილით და საღამოს.

2. ბევრი სითხის მიღება: ტესტირებამდე 2 საათით ადრე დიდი რაოდენობით წყლის სმა შარდს აზავებს, რამაც შეიძლება ცრუ უარყოფითი პასუხი მოგცეთ.

3. პოლიკისტოზური საკვერცხეების სინდრომი (PCOS): ამ დროს ჰორმონის დონე შეიძლება მუდმივად მაღალი იყოს, რის გამოც ტესტი დადებითს აჩვენებს, თუმცა რეალურად ოვულაცია არ მოხდეს.

4. ჰორმონალური პრეპარატები: პროგესტერონის ან სხვა ჰორმონების მიღებამ შეიძლება სურათი სრულად შეცვალოს.

5. სტრესი და კლიმატის შეცვლა: ეს ფაქტორები გავლენას ახდენს ჰორმონალურ ფონზე და შეიძლება ტესტის შედეგი გააყალბოს.

როდის უნდა მივმართოთ ექიმს?

მნიშვნელოვანია გვახსოვდეს: ტესტი მხოლოდ ჰორმონის მატებას აფიქსირებს და არა ფოლიკულის გასკდომის ფაქტს. თუ დადებითი ტესტების ფონზე ორსულობა 6-12 თვის განმავლობაში არ დგება, აუცილებლად მიმართეთ სპეციალისტს.

სასარგებლო რჩევა: თუ თქვენი ციკლი არასტაბილურია, ტესტირება დაიწყეთ მომდევნო სავარაუდო მენსტრუაციამდე 17 დღით ადრე.