ხშირად ახალი, მკვეთრი ნივთის შეძენა გვაშინებს, განსაკუთრებით მაშინ, თუ ჩვენს გარდერობში მანამდე მსგავსი არაფერი ყოფილა. თუმცა, არსებობს ერთი დეტალი, რომლის ყიდვასაც არასდროს ინანებთ - ეს წითელი ფეხსაცმელია.

რატომ წითელი?

ხანდახან კარადას ვუყურებთ და ვხვდებით: ნივთები ბევრია, ჩასაცმელი კი - არაფერი. ყველაფერი ნაცნობია, მოსაწყენი და ინსპირაციის ნულოვანი მაჩვენებელი გვაქვს. სწორედ ასეთ დროს გვეხმარება ერთი მარტივი აქცენტი. წითელი ფეხსაცმელი არა მხოლოდ ფერია, არამედ განწყობა და სტილის მყისიერი განახლება.

ბევრს ჰგონია, რომ ასეთი წყვილი რთულ კომბინაციებს მოითხოვს, მაგრამ სინამდვილეში ის იდეალურად ერწყმის საბაზისო გარდერობს. წითელი მეგობრობს ჯინსებთან, შავ თუ ნაცრისფერ შარვლებთან, ბეჟ ტრენჩებთან და ისეთ თამამ პრინტებთანაც კი, როგორიცაა ლეოპარდი ან ზებრა.

მთავარი პლუსი: თქვენ არ გჭირდებათ ფეხსაცმლის ტონალობის აქსესუარების ძებნა. წითელი თავად არის მთავარი აქცენტი, დანარჩენი სამოსი კი მხოლოდ მის ფონად რჩება.

როგორ შევარჩიოთ მოდელი ყოველდღიურობისთვის?

თანამედროვე კოლექციები წითელი ფეხსაცმლის უამრავ ვარიაციას გვთავაზობს:

• ლოფერები და ბალერინები: იდეალურია ყოველდღიური საქმეებისთვის. ისინი კომფორტულია და უხდება თითქმის ყველაფერს. მოდის მიმდევრები მათ ხშირად წინდებთან ერთადაც ატარებენ.

• კლასიკური ნავები (Pumps): მკაცრ, ოფიციალურ კოსტიუმსაც კი ნაკლებად ფორმალურს და უფრო ეფექტურს ხდის.
  
  

• კედები და ბოტასები: მათთვის, ვინც ბევრს მოძრაობს. წითელი კედები საინტერესო კონტრასტს ქმნის ნაზ კაბებთან და ქვედაბოლოებთან.
  
  

• ჩექმები და "კაზაჩოკები": წითელი ჩექმა დიდი ხანია აღარ ითვლება ზედმეტად თამამ არჩევანად. ის პრაქტიკულია ცივ ამინდში და განსაკუთრებით უხდება ლუქებს.

საღამოს გამოსვლა და აქცენტები

საღამოს წვეულებებზე წითელი ფეხსაცმელი უპირობო ლიდერია. უბრალო, ერთფეროვანი კაბაც კი ასეთ წყვილთან ერთად დასრულებულ და ელეგანტურ სახეს იღებს.

ორი ოქროს წესი შეძენამდე:

1. კომფორტი უპირველეს ყოვლისა: არ აქვს მნიშვნელობა, რამდენად ლამაზია ფეხსაცმელი, თუ მასში სიარული გიჭირთ, ის კარადაში "დატყვევებული" დარჩება.
   
   

2. ერთგულება თქვენი სტილისადმი: თუ ექსპერიმენტების გეშინიათ, აირჩიეთ კლასიკური მოდელები (მაგალითად, წითელი ლოფერები). ისინი მოდიდან არ გადადის და წლების განმავლობაში გამოგადგებათ.
   
   

თუ დიდი ხანია ფიქრობდით სიახლეზე, მაგრამ ვერ ბედავდით - წითელი ფეხსაცმელი საუკეთესო დასაწყისია. ის არ საჭიროებს მთელი გარდერობის შეცვლას, თუმცა რადიკალურად ცვლის იმას, თუ როგორ აღგიქვამენ სხვები.