ბრიტანეთის სამეფო ოჯახის ახლო წყაროებმა კიდევ ერთი საინტერესო დეტალი გაამჟღავნეს განსვენებული დედოფლისა და უელსის პრინცესას ურთიერთობის შესახებ. მიუხედავად იმისა, რომ ქეითი ელისაბედ II-ს თავის „საყვარელ მენტორად“ მიიჩნევდა, მათი გზის დასაწყისი არც ისე მარტივი ყოფილა.

„მისტიკის დედოფალი“ და უსაქმური დღეები

სამეფო კორესპონდენტი კეტი ნიკოლი თავის წიგნში - „William and Harry“ იხსენებს, რომ ნიშნობამდე დედოფალს ქეითის ცხოვრების წესი სერიოზულად აშფოთებდა. იმ პერიოდში ქეითი და უილიამი დროს ძირითადად ძვირადღირებულ კურორტებზე, თხილამურებით სრიალსა და კუნძულ მისტიკზე დასვენებაში ატარებდნენ.

პრესამ მიდლტონს „მისტიკის დედოფალიც“ კი შეარქვა. მაშინ, როცა ბრიტანეთი ეკონომიკურ ვარდნას ებრძოდა, ქეითის ასეთი „ფუფუნებით ტკბობა“ დედოფლისთვის მიუღებელი აღმოჩნდა.



„ასეთი არასერიოზული დამოკიდებულება სიმდიდრის მიმართ დედოფლისთვის უსიამოვნო სანახავი იყო“, - წერს ნიკოლი.

დედოფლის ულტიმატუმი: ნიშნობამდე სამსახური უნდა იშოვო!

ელისაბედ II თვლიდა, რომ სანამ უილიამი და ქეითი ნიშნობას ოფიციალურად გამოაცხადებდნენ, მომავალ პრინცესას სტაბილური კარიერა უნდა ჰქონოდა. მისი უდიდებულესობა დარწმუნებული იყო, რომ თანამედროვე მონარქია ხალხს მაგალითს უნდა აძლევდეს, ხოლო უმუშევარი პატარძალი პრინცის იმიჯს დააზიანებდა.

„ქეითი საყვარელი გოგონაა, მაგრამ წარმოდგენა არ მაქვს, რას საქმიანობს ის რეალურად. თუ მას უილიამის ცოლობა სურს, ნამდვილი სამსახური სჭირდება“ - ამბობდა დედოფალი.

იმ პერიოდში ქეითმა რამდენიმე სფერო მოსინჯა - მუშაობდა მშობლების კომპანიაში, სურდა ფოტოგრაფის კარიერა და საბავშვო ტანსაცმლის ხაზის შექმნაც კი სცადა, თუმცა ფინანსური მიზეზების გამო პროექტი ჩაიშალა.

გაკვეთილი, რომელმაც ნაყოფი გამოიღო

ელისაბედ II-ის კრიტიკულმა შენიშვნებმა ქეითს გული ატკინა, თუმცა დაეხმარა ცხოვრებისეული მიზნების განსაზღვრაში. დღეს უელსის პრინცესა სამეფო ოჯახის ერთ-ერთ ყველაზე შრომისმოყვარე წევრად ითვლება. ის უამრავ საქველმოქმედო ორგანიზაციასა და სოციალურ პროექტს უდგას სათავეში.

კეტი ნიკოლის თქმით, დედოფალმა საბოლოოდ დაინახა ქეითის შინაგანი ძალა და მისი ერთგულება მოვალეობისადმი. მათ შორის გაჩნდა ნამდვილი ნათესაური კავშირი და მეგობრობა, რომელიც ქეითის პირველ დამოუკიდებელ სამეფო ვიზიტებსა და ვალდებულებებში მხარდაჭერით გამოიხატა.

სწორედ ელისაბედ II-ის მაგალითმა და მისმა დროულმა, თუმცა „მწარე“ რჩევამ აქცია ქეით მიდლტონი იმ ქალად, რომელიც დღეს ბრიტანელების საყვარელი პრინცესაა.