ზაფხულის შუაგულში, წლის ერთ-ერთი ყველაზე რთული და არაპროგნოზირებადი პერიოდი გველოდება. სულ მალე, მზიან და ნატვრით ნაცხოვრებ დღეებს „ასტროლოგიური ტურბულენტობა“ – რეტროგრადული მერკური შეაფერხებს.

29 ივნისიდან 23 ივლისის ჩათვლით, ასტროლოგები გვირჩევენ, უსაფრთხოების ღვედები მყარად შევიკრათ: ზოდიაქოს ყველა ნიშანს მოუწევს დაპირისპირებებთან, გაუგებრობებთან და იმ პრობლემებთან შეჯახება, რომლებიც სასწრაფო გადაჭრას მოითხოვს.

წარსულის აჩრდილები და ოჯახური დრამები კირჩხიბის ნიშანში

პლანეტა უკან სვლას კირჩხიბის ზოდიაქოში იწყებს. ვინაიდან კირჩხიბი ოჯახურ კავშირებზე, ემოციებსა და საყოფაცხოვრებო საკითხებზე აგებს პასუხს, რეტროგრადულობის პერიოდში დღის წესრიგში სწორედ ახლობელ ადამიანებთან ურთიერთობები და საცხოვრებელთან დაკავშირებული თემები წამოიჭრება.



შესაძლოა, დაუბრუნდეთ ძველ, დაუსრულებელ საუბრებს და მოგიწიოთ იმ პრობლემების მოგვარება, რომლებსაც აქამდე შორეულ უჯრაში ინახავდით.

კირჩხიბში გავლისას მერკური წარსულისკენ მძლავრ შემობრუნებას ახასიათებს. ნოსტალგია და სევდა გაორმაგებული ძალით შემოგვიტევს. ამ პერიოდის მთავარი საფრთხე კი ისაა, რომ გაგიჩნდებათ იმ ადამიანების დაბრუნების ილუზია, რომლებსაც ერთხელ უკვე მტკივნეულად დაემშვიდობეთ.

ასე რომ, სანამ „ყოფილებს“ - იქნება ეს ძველი სიყვარული, მეგობარი თუ კოლეგა - შეტყობინებას მისწერთ, ორჯერ დაფიქრდით: ნამდვილად გსურთ იმავე ცეცხლზე ხელახლა დაიწვათ?

აქცენტის გადანაცვლება ტყუპებზე: ქაოსი საბუთებსა და გზებზე

მოგვიანებით პლანეტა ტყუპების ნიშანში გადაინაცვლებს, რაც აქცენტს კომუნიკაციაზე, დოკუმენტებზე, სწავლაზე, მოლაპარაკებებსა და მგზავრობაზე გადაიტანს. ასტროლოგები სწორედ ამ სფეროებში პროგნოზირებენ ყველაზე მეტ შეფერხებას, ორგანიზაციულ ქაოსსა და ბიუროკრატიულ ბარიერებს. მოსალოდნელია გაუგებრობები მიმოწერაში, შეცდომები ინფორმაციის გადაცემისას და საფრთხეები გზებზე.

ტექსტებზე, საბუთებსა და დიდ ინფორმაციულ ნაკადთან მომუშავე ადამიანებს განსაკუთრებული ყურადღება მართებთ დეტალების მიმართ, ხოლო მძღოლებმა გზებზე სიფრთხილე არცერთი წამით არ უნდა დაკარგონ.

ზედმიწევნით გადაამოწმეთ ხელშეკრულების ვადები, პირობები და ნებისმიერი მნიშვნელოვანი დოკუმენტი.

რისგან უნდა შევიკავოთ თავი?

ასტროლოგების მთავარი რჩევაა - არ მიიღოთ ნაჩქარევი გადაწყვეტილებები. ნებისმიერი ორაზროვანი სიტუაციის დროს მიეცით თავს დრო დასაფიქრებლად.

გარდა ამისა, ეს არ არის საუკეთესო დრო მსხვილი შენაძენებისთვის. მოერიდეთ ტექნიკის, გაჯეტების, უძრავი ქონების ყიდვას ან ძვირადღირებული რემონტის დაწყებას. ასეთი ინვესტიციები, დიდია ალბათობა, რომ მოლოდინს ვერ გაამართლებს და დამატებით ხარჯებს მოგიტანთ.



განსაკუთრებული ტაქტი გამოიჩინეთ ოჯახურ ურთიერთობებში. ძველი წყენები და უთქმელი პრეტენზიები სწორედ ახლა შეგახსენებთ თავს. კონფლიქტის მიზეზი შეიძლება გახდეს არა მხოლოდ სერიოზული უთანხმოება, არამედ ნებისმიერი წვრილმანიც: უპასუხო ზარი, არასწორად გაგებული მესიჯი ან უხეშად ნათქვამი სიტყვა. ეცადეთ, დაზოგოთ ნერვები და არ აყვეთ ახლობლების ემოციურ პროვოკაციებს.

როგორ გამოვიყენოთ ეს პერიოდი სასიკეთოდ?

რეტროგრადული მერკური იდეალური დროა უკვე არსებული პროექტების რევიზიისთვის. ახალი საქმეების დაწყების ნაცვლად, ჯობია:

• დაასრულოთ ძველი საქმეები და გამოასწოროთ შეცდომები;
• გადახედოთ ძველ შეთანხმებებს და დაუბრუნდეთ გადადებულ ამოცანებს;
• შექმნათ მნიშვნელოვანი ფაილების, ფოტოებისა და სამუშაო მასალების სარეზერვო ასლები.
• მოაწესრიგოთ სახლი, დაალაგოთ სივრცე და აღადგინოთ ურთიერთობა ნათესავებთან.

ეს თვე საუკეთესო შანსია თვითანალიზისა და წარსული გადაწყვეტილებების გადაფასებისთვის. კირჩხიბში რეტროგრადული მერკური დაგეხმარებათ, ბევრ სიტუაციას სულ სხვა კუთხით შეხედოთ, წერტილი დაუსვათ გაურკვევლობას და მშვიდობა იპოვოთ მათთან, ვისთანაც საერთო ენის გამონახვა დიდი ხანია გიჭირდათ.