თავდაჯერებულობა ყველას ერთნაირად არ აქვს. ზოგი ადამიანი თავიდანვე მარტივად შედის ურთიერთობაში, საკუთარი აზრის გამოთქმას არ ერიდება და ყურადღების ცენტრშიც თავისუფლად გრძნობს თავს. სხვებს კი ახალი ადამიანების გაცნობა, საუბრის წამოწყება ან საკუთარი აზრის დაფიქსირება უფრო უჭირთ.

მორიდებულობა თავისთავად პრობლემა არ არის, თუმცა თუ ის ხელს გიშლით ურთიერთობებში, ახალი შესაძლებლობების გამოყენებაში ან უბრალოდ ისე ყოფნაში, როგორც გსურთ, რამდენიმე პატარა ნაბიჯი თავდაჯერებულობის გაზრდაში დაგეხმარებათ.

1. წადით კარაოკეზე

კარაოკე შეიძლება მორცხვი ადამიანისთვის ერთ-ერთი ყველაზე რთული გამოცდილება იყოს, მაგრამ სწორედ ამიტომ არის საინტერესო გამოწვევა.

მეგობრებთან ერთად კარაოკეზე წასვლა უფრო მარტივია, რადგან მარტო არ ხართ და ყურადღებაც მთლიანად თქვენზე არ არის. სიმღერას პროფესიონალურად შესრულება საერთოდ არ სჭირდება - მთავარი ისაა, რომ ნელ-ნელა შეამციროთ იმის შიში, რას იფიქრებენ სხვები.

2. შეუერთდით რომელიმე ჯგუფს

ეს შეიძლება იყოს წიგნის კლუბი, სამოყვარულო კურსი, სპორტული ჯგუფი ან ნებისმიერი სხვა წრე, სადაც ადამიანებს საერთო ინტერესი აერთიანებთ.

როცა საუბრისთვის უკვე გაქვთ საერთო თემა, უცხო ადამიანთან კონტაქტის დამყარება გაცილებით მარტივია. დროთა განმავლობაში რამდენიმე ნაცნობიც გაჩნდება და ურთიერთობებიც ბუნებრივად განვითარდება.

3. ივარჯიშეთ

ფიზიკური აქტივობა მხოლოდ სხეულზე არ მოქმედებს. რეგულარული ვარჯიში შეიძლება საკუთარი თავის მიმართ უკეთესი დამოკიდებულების ჩამოყალიბებასაც დაეხმაროს.

გარდა ამისა, სპორტული დარბაზი, ცეკვის გაკვეთილი ან ჯგუფური ვარჯიში ახალი ადამიანების გაცნობის შესაძლებლობასაც გაძლევთ.

4. სხვებს კომპლიმენტები უთხარით

ეს ძალიან მარტივი სავარჯიშოა.

შეამჩნიეთ ადამიანში რაღაც, რაც ნამდვილად მოგწონთ და უთხარით. ეს შეიძლება იყოს ტანსაცმელი, ვარცხნილობა, საინტერესო მოსაზრება ან უბრალოდ სასიამოვნო თვისება.

ასეთი პატარა ნაბიჯები უცხო ადამიანთან საუბრის დაწყებას თანდათან უფრო ბუნებრივს ხდის.

5. ყურადღება მიაქციეთ სწორ პოზას

სხეულის ენასაც შეუძლია თქვენს განწყობაზე გავლენის მოხდენა.

ზურგის გამართვა, მხრების გასწორება, თვალებში შეხედვა და ღიმილი უფრო თავდაჯერებულად ყოფნაში დაგეხმარებათ. ამისთვის სულაც არ არის საჭირო საკუთარი თავის ძალით შეცვლა - უბრალოდ ეცადეთ, საუბრისას თავი მუდმივად დახრილი არ გქონდეთ და საკუთარ სხეულში კომფორტულად იგრძნოთ თავი.

6. ისწავლეთ რაიმე ახალი

როცა ახალ უნარს ითვისებთ, საკუთარ თავს უმტკიცებთ, რომ რაღაცის სწავლა და თავიდან დაწყება შეგიძლიათ.

ჩაეწერეთ ფოტოგრაფიის, მუსიკის, ცეკვის ან ნებისმიერი სხვა კურსზე, რომელიც ოდესმე გაინტერესებდათ. შეიძლება თავიდან რაღაც კარგად არ გამოგივიდეთ - და ესეც კარგი გამოცდილებაა. თავდაჯერებულობა იმასაც ნიშნავს, რომ შეცდომის დაშვების აღარ გეშინოდეთ.

7. გააკეთეთ ისეთი რამ, რასაც ჩვეულებრივ არ აკეთებთ

დატოვეთ ნაცნობი რუტინა და პატარა გამოწვევა საკუთარ თავს მოუწყეთ.

მაგალითად, მარტო წადით კაფეში, დაესწარით ღონისძიებას, სადაც ბევრ ადამიანს არ იცნობთ, ან სცადეთ ისეთი აქტივობა, რომელსაც აქამდე ერიდებოდით.

არ არის აუცილებელი, ეს რაიმე ექსტრემალური იყოს. მთავარია, საკუთარ თავს აჩვენოთ, რომ უცნობ სიტუაციაშიც შეგიძლიათ კომფორტულად ყოფნა.

8. დაეხმარეთ სხვებს

მოხალისეობა კარგი საშუალებაა იმისთვის, რომ ადამიანებთან ურთიერთობას უფრო ხშირად შეეჩვიოთ.

შეგიძლიათ მონაწილეობა მიიღოთ საქველმოქმედო საქმიანობაში, დაეხმაროთ ცხოველებს, ბავშვებს ან მოხუცებს. როცა სხვას ეხმარებით, ყურადღება მხოლოდ საკუთარ თავზე აღარ გაქვთ გადატანილი, რაც ბევრ მორიდებულ ადამიანს საუბრის დაწყებას უმარტივებს.

9. უცნობ ადამიანს გაუღიმეთ

ზოგჯერ თავდაჯერებულობის გასაზრდელად ყველაზე პატარა ნაბიჯიც საკმარისია.

ლიფტში, ქუჩაში, მაღაზიაში ან სამსახურში ვინმესთვის ღიმილი ძალიან მარტივი სოციალური კონტაქტია, რომელიც არაფერს გაკარგვინებთ.

შეიძლება ადამიანმა პასუხად არ გაგიღიმოთ - ამას პირადად ნუ მიიღებთ. მთავარი ის არის, რომ ნელ-ნელა შეამციროთ უცხო ადამიანებთან ურთიერთობის შიში.

თავდაჯერებულობა ერთ დღეში არ ჩნდება. ზოგისთვის ცვლილება სწრაფად ხდება, ზოგს კი მეტი დრო სჭირდება. მთავარია, საკუთარ თავს ერთბაშად დიდ ცვლილებებს არ მოსთხოვოთ - ერთი პატარა ნაბიჯი კვირაში უკვე წინსვლაა.