ბრიტანეთის სამეფო ოჯახის წევრებს შორის ურთიერთობა ხშირად ხდება მედიის ყურადღების ცენტრში.

გავრცელებული ცნობების თანახმად, დედოფალ კამილასა და ქეით მიდლტონს კარგი ურთიერთობა აქვთ, თუმცა 2019 წელს, გარტერის ორდენის საზეიმო ცერემონიაზე, კამილამ პრინცესა ქეითს საჯაროდ მიანიშნა, რომ ყურადღება ოფიციალური ღონისძიებისთვის მიექცია.

2019 წელს გამართულ ცერემონიაზე ქეით მიდლტონს კამილასა და სოფის გვერდით საპატიო ადგილი ეკავა. ღონისძიებას ნიდერლანდების დედოფალი მაქსიმაც ესწრებოდა. იმ დღეს მისმა მეუღლემ, მეფე ვილემ-ალექსანდრემ, ესპანეთის მეფე ფილიპე VI-სთან ერთად გარტერის ორდენის წევრის წოდება მიიღო.

ცერემონიის მიმდინარეობისას ქეითი და მაქსიმა საუბრით ისე გაერთნენ, რომ კინაღამ გამორჩათ ღონისძიების მნიშვნელოვანი ნაწილი. სწორედ ამ დროს ჩაერია კამილა: მან მაქსიმას მხარზე ხელი მსუბუქად დაჰკრა, ქეითს კი გამომხატველი მზერით მიანიშნა, რომ წინ მიბრუნებულიყვნენ და ცერემონიისთვის ყურადღება მიექციათ. ამავე დროს, სოფიმაც სწრაფად დაიკავა თავისი ადგილი ესპანეთის ამჟამინდელი დედოფლის, ლეტიციას გვერდით.

ეს ეპიზოდი იმ იშვიათ შემთხვევებს შორისაა, როდესაც კამილამ ქეითს ოფიციალურ ღონისძიებაზე პირდაპირ მიანიშნა, რომ სამეფო ცერემონიის წესები დაეცვა. მიუხედავად ამისა, სამეფო ოჯახის წევრებს შორის ურთიერთობის შესახებ გავრცელებული ცნობები მათ ახლო კავშირზე მიუთითებს. წყაროების თანახმად, კამილა რძალს ხშირად აძლევს რჩევებს და სამეფო მოვალეობების შესრულებისთვის ამზადებს.

გარტერის ორდენი ინგლისის მეფე ედუარდ III-მ 1348 წელს დააარსა. ის სახელმწიფო სამსახურში შეტანილი განსაკუთრებული წვლილის აღსანიშნავად გაიცემა. ორდენს ამჟამად მეფე ჩარლზ III ხელმძღვანელობს, ხოლო მის მოქმედ წევრთა რაოდენობა მკაცრად შეზღუდულია - ერთდროულად მასში მაქსიმუმ 24 რაინდი ან ქალბატონი შეიძლება შედიოდეს. ახალ წევრებს მონარქი პირადად ირჩევს.

ორდენის წევრები არიან ბრიტანეთის სამეფო ოჯახის წარმომადგენლები, მათ შორის პრინცი უილიამი, პრინცესა ანა და დედოფალი კამილა, ასევე უცხოელი მონარქები. მათ შორის არიან შვედეთის მეფე კარლ XVI გუსტავი, ესპანეთის მეფე ფილიპე VI და ნიდერლანდების მეფე ვილემ-ალექსანდრე.

ორდენის წევრი წარსულში ენდრიუ მაუნტბატენ-ვინდზორიც იყო, თუმცა 2025 წელს მეფე ჩარლზ III-მ ძმას გარტერისა და სამეფო ვიქტორიანული ორდენები ჩამოართვა და მისი სახელის ისტორიული ორდენების რეესტრებიდან ამოღების განკარგულება გასცა. ეს გადაწყვეტილება ჯეფრი ეპშტეინთან ენდრიუს კავშირების გარშემო ატეხილ სკანდალებს მოჰყვა.