შესაძლოა, საყვარელი წიგნი არა მხოლოდ ადამიანის ხასიათზე, არამედ მის მომავალ პარტნიორზეც ბევრს ამბობდეს.

სწორედ ამ იდეას ეფუძნება ახალი გაცნობის აპლიკაცია Readme, რომელიც მომხმარებლებს საერთო ლიტერატურული ინტერესების მიხედვით აკავშირებს. პროექტის ავტორები ასტროლოგიური აპლიკაციის, Co-Star-ის დამფუძნებელი ბანა გიულერი და ემილი სეგალია.

წიგნის გარშემო დაწყებული რომანტიკული ისტორიები იშვიათი არ არის. დუა ლიპასა და კალუმ ტერნერის გაცნობის ისტორიაც ამის ერთ-ერთი მაგალითია: ისინი ლოს-ანჯელესში, საერთო მეგობრის დაბადების დღის წვეულების წინ შეხვდნენ და მალევე აღმოაჩინეს, რომ ორივეს ერთი და იმავე წიგნის ერთი და იგივე თავი ახლახან ჰქონდა წაკითხული.

Readme-ს შემქმნელებმა გადაწყვიტეს, ლიტერატურა გაცნობისთვის ერთგვარ საერთო ენად ექციათ. აპლიკაცია მომხმარებლებს არა მხოლოდ საყვარელი ჟანრებისა და წიგნების, არამედ კითხვის ენის მიხედვითაც აკავშირებს. მისი მიზანი იმ ადამიანების პოვნის გამარტივებაა, რომლებსაც მსგავსი ლიტერატურული ინტერესები აქვთ.

რეგისტრაციისას მომხმარებელს 25-კითხვიანი ტესტის გავლა უწევს. მისი შედეგების საფუძველზე აპლიკაცია ადამიანებს 12 ე.წ. „მკითხველის არქეტიპიდან“ ერთ-ერთს მიაკუთვნებს. ამ სისტემის შესაქმნელად, დამფუძნებლების განმარტებით, გამოყენებულია ლიტერატურის კვლევები, ენობრივი ანალიზი და ფსიქოლინგვისტიკა.

აპლიკაციაში რეგისტრაცია ჩვეულებრივი გაცნობის სერვისებისგან განსხვავებულ პროცესს მოიცავს. მომხმარებელმა უნდა მიუთითოს ასაკი, სქესი და ადგილმდებარეობა, მოკლედ მოუყვეს სხვებს საკუთარი თავის შესახებ და აირჩიოს, რას ეძებს - რომანტიკულ ურთიერთობას, მეგობრებს თუ უბრალოდ საინტერესო საუბარს. ამის შემდეგ ის ლიტერატურულ ტესტს ავსებს, რომლის შედეგებიც სხვა მომხმარებლებს მისი ინტერესების უკეთ გაცნობაში ეხმარება.

ბანა გიულერის განმარტებით, აპლიკაციის მიზანი მხოლოდ საერთო ინტერესების მქონე ადამიანების დაკავშირება არ არის. მისი თქმით, Readme მომხმარებლებს საშუალებას აძლევს, უკეთ გაიგონ, როგორ შეიძლება განვითარდეს მათი ურთიერთობა სხვა ადამიანთან.

ტესტის შედეგები პოტენციური პარტნიორების შესარჩევად მკაცრ ფილტრად არ გამოიყენება. პირიქით, შემქმნელები მას თვითშემეცნების ერთ-ერთ საშუალებად განიხილავენ. სხვა მომხმარებლებს სრული შეფასება არ ეჩვენებათ - მათ მხოლოდ მოკლე აღწერა და ლიტერატურული თავსებადობის პროგნოზი აქვთ ხელმისაწვდომი.

გიულერი მიიჩნევს, რომ ლიტერატურული განსხვავებები ურთიერთობაში დაბრკოლებად არ უნდა აღიქმებოდეს. ამ მიდგომას ის ასტროლოგიას ადარებს, სადაც ადამიანებს შორის განსხვავებები თავისთავად უარყოფით მოვლენად არ განიხილება.

Readme ბაზარზე იმ პერიოდში გამოჩნდა, როდესაც წიგნის კითხვა კვლავ პოპულარული ხდება. ცნობილი ადამიანები საკუთარ წიგნის კლუბებს ქმნიან, კინოთეატრებში კი ცნობილი ლიტერატურული ნაწარმოებების ეკრანიზაციები სულ უფრო ხშირად ჩნდება. ამ ტენდენციის ფონზე ლიტერატურაზე დაფუძნებული გაცნობის აპლიკაციის შექმნა მისი დამფუძნებლებისთვის დროულ ნაბიჯად იქცა.

თუმცა Readme-ს მიდგომა ყველასთვის მისაღები შეიძლება არ აღმოჩნდეს. ხანგრძლივი რეგისტრაცია და ტესტის შევსება შესაძლოა დამღლელი იყოს მათთვის, ვისაც ონლაინგაცნობის სერვისების გამოყენება უკვე მობეზრდა ან ზოგადად სკეპტიკურად უყურებს ასეთ ურთიერთობებს. აპლიკაციის შემქმნელები კი მიიჩნევენ, რომ სწორედ ეს პროცესი დაეხმარება მათ იმ მომხმარებლების მოზიდვაში, ვისთვისაც კითხვა მხოლოდ გართობა არ არის და ლიტერატურას განსაკუთრებულ მნიშვნელობას ანიჭებენ.